سوپای سودان رایگەیاند، كۆشكی سەرۆكایەتییان لە خەرتومی پایتەختی سودان كۆنترۆڵكردەوە و هێزی پشتیوانی خێراش دەڵێت، هێشتا شەڕ كۆتایی نەهاتووە.
دوای زیاتر لە دوو ساڵ، سوپای سودان بە سەرۆكایەتی عەبدولفەتاح بوردهان، بە پشتیوانی فرۆكەی بێ فرۆكەوان، توانیویانە كۆنترۆڵی خەرتومی پایتەخت و كۆشكی كۆماری و تەواوی وەزارەتەكان بكەنەوە كە لە 2023وە لەژێر دەستی هێزەكانی پشتیوانی خێرادان.
لەلایەکی دیکەوە، هێزی پشتیوانی خێرا رایگەیاند، هێشتا شەڕ كۆتایی نەهاتووە و هێزەكانیان لە دەوروبەری كۆشكە كۆمارییەكان لە خەرتوم لە ئامادەباشیدان
ماوەی دوو ساڵە شەڕ و پێكدادانی توند لە نێوان هێزەكانی سوپا و هێزەكانی پشتیوانی خێرا بە سەرۆكایەتی محەمەد حەمدان دەقلو لە سودان سەریهەڵداوە، بەهۆیەوە نزیكەی 30 هەزار كەس كوژراون و زیاتر لە 12 ملیۆن كەسیش ئاوارەبوون، زیاتر لە 100 هەزار كەسیش روبەڕووی برسێتی بوونەتەوە.
سوپاكەی بورهان بەشی باكور و ڕۆژهەڵاتی سودانی بەدەستەوەیە، هێزەكانی دەقلوش كۆنتڕۆڵی زۆربەی ناوچەی دارفور و بەشێكی باشوری كردووە بە خەرتومی پایتەختەوە
