ڕاپۆرتی: رێباز مام شۆڕش
زیاتر لە «10» ساڵە بەڵێن بە هاووڵاتیانی کرێنشین و کەمدەرامەت دراوە، یەکەی نیشتەجێبوونیان بۆ دروست بکرێت و بەنرخێکی رەمزی پێیان بدرێت، بەڵام تائێستا هەر قسەیە و هەنگاوی پراکتیکی بۆ نەنراوە.
پرۆژەی دروستکردنی «شوقە» لە سنووری ئیدارەی سەربەخۆی راپەڕین، کە لەلایەن وەزارەتی ئاوەدانکردنەوەی هەرێمی کوردستانەوە جێبەجێ دەکرێت، زۆر سست و لاوازە و بۆتە جێی نیگەرانیی هاووڵاتیان و کرێنشینان، بەداخەوە تائێستا جگە لە تەواوکردنی چەند باڵەخانەیەک بەبێ دابینکردنی هیچ خزمەتگوزارییەک، هیچی دیکە نەکراوە تا بایی ئەوە بێت دابەش بکرێن.
نەبوونی خزمەتگوزاری گرفتە سەرەکییەکەیە
لەوبارەیەوە «هەردی وەستا قادر» سەرۆکی لقی راپەڕینی کۆمەڵەی کرێنشینانی کوردستان، بە کوردستانی نوێی راپەڕینی راگەیاند: چەندین ساڵە لە هەریەکە لە شارەکانی رانیە، حاجیاوا، چوارقوڕنە، سەنگەسەر و قەڵادزێ ژمارەیەک باڵەخانە دروستکراون کە دەیان شوقە لەخۆدەگرن، بەڵام تەواو نەکراون، ئەوانەشی تەواوکراون، بەهۆی نەبوونی خزمەتگوزارییەوە، ناتوانرێت بەسەر کرێنشیناندا دابەش بکرێن.
وتیشی؛ ئێستا رێژە و ژمارەی تەواوی کرێنشینان لە بەردەستدا نییە، بەڵام لە سنووری راپەڕین ئەوانەی فۆڕمیان لای ئێمە پڕکردووەتەوە، نزیکەی پێنج هەزار کرێنشینن، بۆیە بەدڵنیاییەوە ئەو شوقانەی دروستکراون بەشی کرێنشینان ناکەن.
لێپرسراوی کرێنشینان ئاماری شوقەکانیشی خستەڕوو و رایگەیاند « رانیە 96 شوقە، چوارقوڕنە 48 شوقە، سەنگەسەر 48 شوقە، قەڵادزێ 48 شوقە، حاجیاوا 84 شوقە، واتە کۆی گشتی شوقەکان 324 شوقە دروست کراون.
ئاماژەشی بەوەدا کە هۆکاری تەواونەکردنی شوقەکان، نەبوونی بودجەی پێویستە، ئەوانەشی تەواوکراون، تائێستا دابەشنەکراون، تەنانەت هەندێکیان لەلایەن خەڵکەوە داگیرکراون!.
چەند ساڵێکە دەستیدەستیمان پێ دەکرێت
محێدین عەبدوڵڵا، کە چەندین ساڵێکە کرێچییە دەڵێت: ئێمەی کرێنشین، ماوەی چەندین ساڵە چاوەرێی دابەشکردنی شوقەین، بەڵام تائێستا هیچ شتێک لەوبارەیەوە نەکراوە، ئەمەش کاریگەریی لەسەر دۆخی ژیانمان دروستکردووە، واشیکردووە پڕۆسەی هاوسەرگیریی کەمببێتەوە و کێشەی خێزانیش دروست ببێت.
وتیشی: چەندین ساڵە دەستی دەستیمان پێدەکەن، هیوادارین حکومەت ئاوڕێک لەو خەڵکە هەژارە بداتەوە.
ئەوەی ئێستا زۆر جێگای نیگەرانیی کرێنشینانە و دۆخی ژیانیانی هێندەی تر سەخت کردووە، بەرزبوونەوەی کرێی خانووە، بەجۆرێک کە دەکرێت بڵێین بەرامبەرە لەگەڵ داهاتی مانگانەی خێزانەکاندا.
کۆچی لادێ بۆ شار و ئاوارە
ئەیوب عەبدوڵڵا کە خاوەنی یەکێکە لە نووسینگەکانی کڕین و فرۆشتن و بەکرێدانی خانووە لە سنووری راپەڕین، هۆکارەکانی بەرزبوونەوەی کرێی خانوو بۆ کۆچی خەڵک لە گوندەوە بۆ شار و بوونی ئاوارەی سوریا و عەرەب و هاتنی ژمارەیەکی زۆر خێزانی ئێرانی دەگەڕێنێتەوە.
وەک ئەو خاوەن نووسینگەیە باسی دەکات، رۆژانە چەندین کەس سەردانی نووسینگەکەیان دەکەن بۆ خانووی کرێ، بەڵام ئەوەی هەیە کرێکەی زۆر بەرزبووەتەوە و هەموو کەس توانای بەکرێگرتنیانی نییە.
ئامینە محەمەد، دانیشتووی گەڕەکی نەورۆز، باس لە بارودۆخی کرێنشینان دەکات و دەڵێت: گوزەرانی هاووڵاتیان لە دۆخێکی زۆر خراپدایە، پێنەدانی مووچەی فەرمانبەران لە کاتی خۆیدا بارگرانییەکی دیکەی بۆ کرێنشینان دروستکردووە، لەگەڵ ئەوەی لە شارەکاندا پرۆژە هەن، بەڵام ئێمە ناتوانین لەو پرۆژانە سوودمەند بین.
وتیشی: بەهۆی نەبوونی شوێنی نیشتەجێبوونەوە لەگەڵ برا و براژنمدا دەژیم، ئەمەش لەڕووی دەروونییەوە بۆمن ناخۆشە و ئەگەر توانام هەبوایە خانووی کرێمان دەگرت، نەبوونی خانوو کێشەی خێزانی و کۆمەڵایەتی دروست دەکات و پێویستە حکومەت و لایەنە پەیوەندیدارەکان پلانی خێرایان هەبێت و ئاوڕی جددی لە هاووڵاتیان بدەنەوە.
