چۆمان شەوکەت
لە رێوڕەسمێکدا کە لە هۆڵی رۆشنبیریی رانیە بەڕێوەچوو، بەڕێوبەرێتیی پەروەردەی رانیە رێزلێنانی بۆ ئەو سەرپەرشتیار و بەڕێوەبەر و مامۆستا و فەرمانبەرانەی کەرتی پەروەردە لە سنوورەکە رێکخست کە خانەنشین بوون.
رێوڕەسمەکە بە ئامادەبوونی قائیمقامی قەزای رانیە و بەرپرسانی دیکەی حکومی بەڕێوەچوو، پاش خوێندنەوەی چەند وتارێک و ئاماژەدان بە گرنگی و رۆڵی ئەو بەڕێزانەی خانەنشین بوون، هاوکات چەند چالاکییەک پێشکەشکران و رێزلێنانیش بەسەر خانەنشیناندا دابەش کرا.
لەو بارەیەوە مامۆستا ئومێد تۆفیق بەڕێوبەری پەروەردەی رانیە بە کوردستانی نوێ-ی راپەڕینی راگەیاند: ئەو رێوڕەسمە تەنها بۆ (185) سەرپەرشتیار و مامۆستا و فەرمانبەر بووە کە تا مانگی ئاداری ئەمساڵ خانەنشین بوون.
مامۆستا ئومێد وتیشی: کۆی گشتیی ژمارەی خانەنشینان لە سنووری پەروەردەی رانیە تا کۆتایی ئەمسال بۆ (232) کەس بەرز دەبێتەوە، ئەمەش لە راستیدا گرفت و کێشە لە ناوەندەکانی خوێندندا دروست دەکات، بەتایبەتی کارگوزار و پاسەوان کە خەریکە ژمارەیان بەرەو کۆتایی دەچێت.
بەڕێوبەری پەروەردەی رانیە روونیشی کردەوە کە تائێستا هیچ بڕیارێک لە وەزارەتی پەروەردەوە نەدراوە بۆ پڕکردنەوەی شوێنەکانیان.
