دەربارە
|
پەیوەندی
|
ئەرشیف
سەرەتا
نوێ
کوردستان
عیراق
جیهان
وتار
راپۆرت
ئەدەب و هونەر
ئابووری
کەلتور
دیدار
هەمەڕەنگ
وەرزش
دووتوێ
ژینگە
مەڵتیمیدیا
ماندووم . . . رێگاكان ماندووم
11:14 - 2025-04-10
ئەدەب و هونەر
65 جار خوێندراوەتەوە
کەریم دەشتی
كام رێ هه‌یه نه‌مبڕیبێ
كام لافاو هه‌یه
وه‌ك مه‌له‌وانێكی باڵشكاو لێمنه‌دابێ؟
كام با هه‌یه له‌گه‌ڵ خۆیا نه‌یبردبم،
كام ژین هه‌یه منی تیادا نه‌مردبم؟
كام مه‌رگ هه‌یه دووباره
من تیایدا رانه‌بووبمه‌وه؟
من هه‌م بوون و هه‌م نه‌بوونم
هه‌م عه‌ده‌م و هه‌م سووڕانه‌وه‌ی گه‌ردوونم.
له هه‌موو شوینێ ئاگرێكم جیهێشتووه
من رێگاوانێكی ماندووم
هه‌ر پارچه‌یێ له ئاوازم
له بن تاشه‌یێ كه‌وتووه.
هه‌ر سه‌دایێ له ته‌نبوورم
له هاوارێكەوە هاتووه.
له هه‌ر شوێنێ بارگه‌ی خۆم لێ هه‌ڵخستبێ
ئاگرێكم كردۆته‌وه و ئاگردانم جێهێشتووه.
له‌هه‌ر به‌نده‌ر و كه‌نارێ
له‌هه‌ر بێشه و بێشه‌ڵانێ
رووناكیم كۆكردۆته‌وه و
گه‌ڵای شیعرم راخستووه.
ماندووترم له‌و دره‌خته‌ی
چی رێبواره به ناو وێنه‌ی تێپه‌ڕیوه
ساتێ له‌ژێر سێبه‌ره‌كه‌ی نه‌خه‌وتووه.
له‌هه‌ر شوێنێ كه له‌نگه‌رم تیا گرتووه
ئاگرێكم بۆ یادگار جێهێشتووه،
سه‌دان دڵۆپه فرمێسكم لێ رشتووه.
من چه‌ند ماندووم
له‌وه‌ته‌ی هه‌م
شیری گه‌رمی هه‌دادانم نه‌چه‌شتووه.
تیری یاد
من بەندەی ناو کوورەی گەرمی یادەوەریم
رابردوو چەشتەی ئەبەدییم
بەردەوام مەینەتباری ناو،
گەردوونی نادیاریی تۆم.
کە شەو و رۆژ
وەک دژوارترین خەونی خۆش
ئەو سەرەم پڕ برین دەکات
دەمکات بە کۆیلەی دڵی خۆم،
سەختە دیلی دەستی خۆت بی و
بەڵام هەرگیز پێی نەزانی،
هەم جەللادی رۆحت بیت و هەم قوربانی.
سه‌خته‌نداز
ته‌مه‌ن به‌رده‌وام
كه‌مه‌ندی داغ و سفتی خۆی داوێ
بۆیه من ده‌بێ
ده‌ست و دامێنی برووسك بگرم
نه‌وه‌ك گه‌ردنی
كه‌نه‌فت و ماندووی منی به‌ركه‌وێ.
ئاخر من راوچیی هه‌وره‌تریشقه‌م
ئه‌وه‌ی بیه‌وێ
په‌یكه‌ری سه‌ختی مه‌حاڵ ببینێ،
ده‌بێ به شان و ملی ئه‌ندێشه‌ی
قووڵدا سه‌ركه‌وێ.
دوا تیشك
له شوێنێ نیت و شه‌وقت دونیای داگرتووه
ئه‌ی ناسیاو، چی پله و پایه‌ی هه‌بوونه
له پێشوازی هاتنه‌وه‌ی تۆدا كه‌وتووه.
تاوێ هه‌دادانم پێ ببه‌خشه
خه‌ریكه زه‌ویی ته‌واو ده‌بێ،
هێنده به دواتا خاك و خۆڵیم ته‌ی كردووه.
تۆزێ له‌دره‌وشانه‌وه‌ی خۆت كه‌مكه‌وه
تا قه‌یرێ بیناییم به‌ركه‌وێ،
تاوێ له سینه‌م وه‌ره ده‌ر
با دیده‌م پڕ شه‌به‌نگی هه‌زار ره‌نگت بێ.
كه‌مێ مه‌ودای باڵنده‌ی
ناو ته‌متوومانی رۆحم بده،
تا وه‌ك ئه‌ستێره‌ی سیوه‌یل
له تاریكستانی ئه‌م بوونه به‌ده‌ركه‌وێ.
#ئەدەب و هونەر
بابەتە پەیوەندیدارەکان
خانمی یەکەم له کۆنگرەی یەکێتی ژنان: ستراتیژێکی نیشتمانی بۆ بەرەوپێشبردنی پێگەی ژنان
2025-04-21
کوردستان
مەکتەبی سیاسیی یەکێتی: پشتیوانیی خۆمان بۆ رۆژنامەنووسانی وردبین و راستبێژ دووپاتدەكەینەوە
2025-04-21
کوردستان
پەیامی مەکتەبی راگەیاندن و هۆشیاریی یەکێتی بۆ رۆژی رۆژنامەگەریی کوردی
2025-04-21
کوردستان
زۆرترین بینراو
جینۆساید لە چیرۆکی منداڵاندا
2025-04-17
ئەدەب و هونەر
من وەک دایکێک چاوەڕوانتم
2025-04-17
ئەدەب و هونەر
سنێلە و سەردەمێ تەکنۆلۆجیایێ
2025-04-20
دووتوێ
نەفرەتی لاساییكردنەوە
2025-04-17
هەمەرەنگ
چەرخەلەی چالاكییەكانی هەفتە
2025-04-15
هەمەرەنگ
رێژەی جیابوونەوە لە دهۆک لە کەمبوونەوەدایە
2025-04-15
ڕاپۆرت
دەزگاکانی باکوور، رۆژئاوا و رۆژهەڵاتی کوردستان لە پێشانگەی نێودەوڵەتی هەولێر بۆ کتێب
2025-04-16
ڕاپۆرت
سەرۆك بافڵ: لەگەڵ پارتی لەسەر چەند پرەنسیپێكی حوكمڕانی نزیكبووینەتەوە و جارێ بناغەی حوكمڕانییەكە بەهێز دەكەین
2025-04-20
کوردستان
