وەرگێڕانی لە عەرەبییەوە:
ئاوات حەسەن ئەمین
براوەی خەڵاتی نۆبڵی ساڵی 1987
جۆزێف برۆدسکی لە لینیگرادی یەکێتی سۆڤێتی جاران لە ساڵی 1940 لەدایک بووە. لە پانزە ساڵیدا وازی لە خوێندن هێناوە و خۆی سەرقاڵی کارکردن کردووە لە کێڵگەدا. هۆگری شیعرەکانی هەریەکە لە جۆن دۆن و زیسلاوی میوز بووە و وەریگێڕاون. لەسەر چالاکی سیاسی پێنچ ساڵ سزادراوە و دوای بەسەر بردنی هەژدە مانگ ئازاد کراوە.
دواتر بۆ وڵاتی نەمسا کۆچی کردووە، لەوێ ئۆدنی شاعیری ناسیوە و پێی سەرسام بووە .
لە ساڵی1977 کۆچی کردووە بۆ ئەمەریکا و رەگەزنامەی ئەو وڵاتەی وەرگرتووە.
لە ساڵی 1996 لە ئەمەریکا کۆچی دوایی کردووە و دواتر لەشاری ڤینیسیا لە ئیتاڵیا ئەسپاردەی خاک کراوە.
ساڵی 1987خەڵاتی نۆبڵی پێ بەخشراوە، لەپای نووسینە گشتگیرەکانی و بۆ روونی و رەوانی بۆچوونەکانی و بەهرە شیعرییە چڕەکەی.
ئاوازی بەلفاست
ئالێرەدا کچێکی شارە ترسناکەکە هەیە
قژە تۆخەکەی زۆر کورت دەکاتەوە،
تا کەمترینی لێ هەڵوەرێ
کاتێک کە کەسێک دەپێکێ.
ئەم، یادگارییەکانی وەکو
پەڕەشوت قەد دەکات،
داوا دەکات _ تاخت_ بکڕێت،
سەوزەمەنیش لەماڵەوە لێ دەنێت.
ئەوان ئاگر لەناو چێشتخانەکاندا دەکەنەوە.
لەوناوچانەدا گەزۆی زیاتر هەیە،
وەکو ئەوەی لەسەر زەوی...
لێرەدا دەنگی بەرز دەبێتەوە
جووڵەکەشی پەنجەرەکە دادەپۆشێ
وەکو چرایەکی سوتاو
کە تەماشای نیوە بۆرەکەی دەکەیت.
تەنوورەکەشی دەگاتە سەر ئەژنۆ،
کاتێ وەکو سەرچەفێک
وادروست کراوە شەڕانگێزیی بنوێنێ .
من خەونی پێوە دەبینم
وەکو شەیدایەک، یان کوژراوێک
چونکە ئەم شارە زۆر لەوە بچووکترە.
کە ئەبێ وابێ .....!
تاخت: پێکهاتەیەکی رووەکی نیوە بەخەڵوز بووە، وەکو سووتەمەنی بەکارهاتووە.
سەرچاوە:قصائد من شعراء جائزه نوبل
إختارها و ترجمها د. شهاب غانم، مارس 2009
