عەلی بچکۆل: یەکێتی لە سەرەتاوە بەڵێنێکی بەخەڵک دا و بەڵێنەکەی کردە کردار

10:14 - 2022-09-06
دیدار
237 جار خوێندراوەتەوە
هەڤاڵ عەلی بچکۆل

عەلی بچکۆل یەکێک لە خەباتگێڕ و تێکۆشەرەکانی رێگای کوردایەتی و سەرکردە و فەرماندەیەکی دێرینی یەکێتیی نیشتمانیی کوردستانە، ئەو یەکێکە لەو خەباتگێڕ و هەڤاڵانەی کە لەزیندان هاوڕێی شەهیدانی سەرکردە خاڵە شیهاب و جەعفەر و ئەنوەرە و لەشاخیش فەرماندەی مەیدانیی زۆرێک لە داستان و نەبەردییەکان بووە، لە دوای راپەڕینیشەوە لە خەبات و تێکۆشان بەردەروام بووە چ لە هەندەران و چ لەناوخۆی کوردستاندا و دوا پلەی کارکرنیشی تا چوارەمین کۆنگرە ئەندامی ئەنجومەنی ناوەندیی پێشوو بوو.
لەم دیدارەدا رۆشنایی دەخاتە سەر قۆناغە سەرەتایی و مێژووییەکانی تەمەنی یەکێتی و هەڵسەنگاندن و بەراوردی دەکات بە قۆناغی ئەمڕۆ و سەنگ و پێگەی یەکێتی لە هەرێم و عیراق و ناوچەکەدا بەگشتی.


سازدانی: هیوا محەمەد  

*مام عەلی وەک خەباتگێڕێکی دێرین لە ماوەی 60 ساڵی رابردوودا جێدەستی دیاربووە، نەک هەر بە شێوەیەکی ئاسایی، بەڵکو لە زۆر قۆناغدا سەرکردە و فەرماندە بووە، دوای ئەم هەموو مێژووە دەتوانێت هۆکاری ئەوەمان بۆ روون بکاتەوە لە بۆچی یەکێتی لە سەرەتای دروستبوونیدا وەک بۆمبێک تەقییەوە و بووە هێزی یەکەم لە باشووری کوردستاندا؟
-
سەرەتا بەخێر بێن و سوپاستان ئەکەم بۆ ئەم دیدارە، یەکێتی لە کاتێکدا دروستبوو کە شەوەزەنگ باڵی کێشابوو بەسەر کوردستاندا و بەعس بەتەواوی زاڵ بوو بەسەر کوردستاندا و بێئومێدی لەدوای نشوستی شۆڕش باڵی کێشابوو بەسەر خەڵکدا.
خەباتی دیموکراسیی شۆڕشگێڕانە
بەعسییەکان سیاسەتی تەعریب و تەبعیسیان گرتبووە بەر، یەکێتی لەم کاتە سەختەدا سەری هەڵدا و بووە هیواو پێشڕەوایەتی خەڵکی کرد، بۆیە هەرزوو بە شێوازێکی دیموکراسیی شۆڕشگێڕانە هاتە ناو مەیدانی خەباتەوە و پاش چەند ساڵێکی کەم ئەنجومەنی گوندەکانی دروستکرد و خەباتی کردە شێوەیەکی گشتگیر لە ناو خەڵکی کوردستاندا.
دوابەدوای ئەوە یەکێتی نەک هەر لە عیراقدا، بەڵکو لە خۆرهەڵاتی ناوەڕاستدا بووە ژمارە و رۆڵی هەبوو، بووە پشت و پەنای هەموو حزبە عیراقییەکانی دژبە رژێمی سەدام، چونکە تەنها یەکێتیی نیشتمانیی کوردستان هێزی گەورەی جەماوەری بوو لە کوردستاندا و ناوچەی ئازادکراوی فراوان و بنکەیەکی جەماوەریی فراوانی هەبوو.
یەکێتی هەر لە سەرەتاوە بەڵێنی بە خەڵک دا کە درێژە بە شۆڕش دەدات و سەنگەر چۆڵ ناکات و بەڵێنەکەشی کرد بە کردار، ئەگەرچی لە هەندێک قۆناغدا تووشی شکستی کاتییش بووبێت، بەڵام هەرگیز ئاڵای خەباتی نەوی نەکرد.

*وەک ئاماژەمان پێدا یەکێتی لە سەرەتادا وەک بۆبێک تەقییەوە، لەماوەیەکی کەمدا بووە رێکخراوێکی پێشڕەو لە کوردستاندا و بە تێپەڕبوونی کاروانی ئەو خەباتە بە راپەڕین و دوای راپەڕیندا و پاشان رووخانی رژێمی بەعس و گەیشتنی مام جەلال بە پۆستی سەرۆک کۆماری عیراق و هەژموونی بەسەر عیراقی نوێ و ناوچەکەوە تا ئەمڕۆ، مێژوویەکە کە روونکردنەوەی دەوێت، بەڵام خۆت وەک تێکۆشەرێکی ئەو کاروانە یەکێتی لەمڕۆدا چۆن دەبینیت؟
-
قۆناغی سەرەتامان باس کرد کە یەکێتی چ رۆڵێکی ئیجابی بینی و چۆن رەنگدانەوەی هەبوو بۆ عیراق و ناوچەکە، دوای راپەڕینیش ئەوەی کە یەکێتی کردی، خەڵک پێشبینی نەدەکرد لە سەرپەرشتیکردنی راپەڕین و بەردەوامیدان بە کاروانەکە.

زاڵبوونی بەرژەوەندیی تایبەت
کەسێکی پێشمەرگە لە قەندیلەوە چووە بەغدا و بووە سەرۆک کۆمار، یەکێتی رۆڵی گرنگی هەبوو لە سەقامگیریی عیراق و دامەزراندنی سیستمی فیدراڵی و چەسپاندنی هەرێمی کوردستان لە دەستووردا، بەڵام بەداخەوە لەگەڵ ئەمانەشدا بەهۆی زاڵکردنی بەرژەوەندیی تایبەت لەلایەن هەندێک لە بەرپرسانەوە، گۆڕانکاریی بەسەر کاراکتەری شۆڕشگێڕانەی شاخی هەندێک لەو هەڤاڵانەدا هات و ئەو هەستە دڵسۆزیی و پاکییەیان نەما، ئەمەش لەگەڵ سیفەت و سەرەتاکانی شۆڕشگێڕییدا نەدەهاتەوە.

*ئێستاش یەکێتی لەسەر گۆڕەپانی عیراق هەژموونی هەیە و کارتێکی لاواز نییە، لە هەرێمیش یەکێک لە دوو حزبە دەسەڵاتدارەکەیە، تێڕوانینتان بۆ ئەو رۆڵە چییە؟
-
یەکێتی ئێستاش لە کوردستان بەشێکە لە بزووتنەوەی رزگاریخوازی کوردستان، رۆڵی گرنگی هەیە و کەسایەتی باشی تێدایە، کادر و سەرکردەی بەتوانای تێدا ماوە، هیوایەکی خێری تێدایە، بەڵام هێشتا ئەوە نییە کە ئێمە دەیخوازین و دەمانەوێت، ئەو پایەیەی لەسەری دامەزرا و ئەو تەکانەی کە یەکەمجار دای بە شۆڕش و خەبات، دۆخی ناوچەکەی بەجۆرێک گۆڕی، وڵاتانی دەوروبەر دەهاتنە لای سەرکردەکانی یەکێتی بۆ گفتوگۆ لەسەر ناوچەکە، وڵاتانی عەرەبی پەیوەندییان بە مام جەلال-ەوە دەکرد، بەڵام ئێستا ئەو رۆڵ و پێگەیەی لاوازتربووە.

*بەڵام رەنگە هۆکارەکان هەمووی پەیوەندیی بە ناوخۆی یەکێتییەوە نەبێت، بەڵکو بە رەوتی سیاسیی عیراق و هەژموونی دەرەکی و دۆخی سیاسی هەرێمەوە هەبێت و ئەوە بێت کە وابکات یەکێتی بۆ خۆگونجاندن لەگەڵ دۆخەکەدا بەپێێ پێویست و مەودای گەمەی سیاسی هەنگاو بنێت؟
-هەموو ئەو بارودۆخانە راستن، بەڵام گۆڕانکاریی لە ناوخۆدا بە باش یان خراپ هۆکاری سەرەکییە و کاریگەریی دەبێت لەسەر رەوشی حزبەکە، ئێمە وەک یەکێتی ئەگەر وەک جاران تۆکمە و تەبا بین ، دیسپلینمان هەبێت و یەک دەنگ بین، پەیڕەوی دیموکراسی و ناوەندێتی بکەین، بەپێی خواستی زۆرینەی کادرەکانمان و لە خزمەتی گشتیدا هەنگاو بنێین، ئەوا یەکێتییەکەمان هەر وەک جاران دەبێت، بەڵام لە ماوەکانی رابردوودا و تاڕادەیەک ئێستاش ئەمە پشتگوێ خراوە و وەک جاران نەماوە.

مام جەلال وەک پێشمەرگەیەک لە قەندیلەوە چووە بەغدا و بووە سەرۆک کۆمار، یەکێتی رۆڵی گرنگی هەبوو لە سەقامگیریی عیراق و دامەزراندنی سیستمی فیدراڵی و چەسپاندنی هەرێمی کوردستان لە دەستووردا، بەڵام بەداخەوە لەگەڵ ئەمانەشدا بەهۆی زاڵکردنی بەرژەوەندیی تایبەت لەلایەن هەندێک لە بەرپرسانەوە، گۆڕانکاریی بەسەر کاراکتەری شۆڕشگێڕانەی شاخی هەندێک لەو هەڤاڵانەدا هات

*لەم هەرێمی کوردستانەدا نزیک بە 60 ساڵ دەبێت کە ململانێ لە نێوان پارتی و یەکێتیدا هەیە، ئەگەرچی لە هەندێک قۆناغدا ئارامیی بەخۆوە بینیوە، تا ئەمڕۆشی لەگەڵدا بێت، گرژیی هەر هەیە، بەمەش ناتوانین بڵێین پڕۆژەیەکی یەکدەنگی هەیە لە هاوپەیمانێتییەکدا کە هەموو حزبەکان لە خۆیان کۆبکەنەوە و هەڵوێستێکی سیاسیی یەکگرتوویان هەبێت بۆ هەرێم بەرامبەر بە بەغدا. دەبێت ئەم دوو حزبە سەرەکییە چی بکەن تا ئەمە  بێتە دی؟
ئێمە کاتێک باسی مێژوو دەکەین، هەموان خەتاکە دەخەینە سەر رابردوو، دەڵێین لەبەر هەڵەی فڵان کەس ئەو قۆناغە سەرکەوتن بەدەست نەهاتووە، هەموو شۆڕش و راپەڕینەکان شی دەکەینەوە و هەریەکەمان ئەوی تر تاوانبار دەکات، تا ئەمڕۆش خەڵک هەر بەم جۆرە هەڵسەنگاندن دەکات، کورد مەبەستی نییە وەک قەوارە هەبێت، ئێستا خەڵک ئینتیمای نەتەوەیی و نیشتمانی و خۆشەویستی بۆ خاک لاوازبووە، لە هیندستان بڕیاریان دا کە قوماشی بەریتانی نەکڕن، کەسێک دەیویست پارچەیەکی سپی بکڕێت، یەکێک پێیوت مەیکڕە، چونکە شۆڕش بڕیاری داوە نەیکڕین، بەڵام لەبەرئەوەی کەسەکە هەر سوور بوو لەسەر ئەوەی بیکڕێت، کەسی دووەم خوێنی لە پەنجەی خۆی هێناو بە قوماشەکە سڕی تا کڕیارەکە پەشیمان بکاتەوە، ئەو پەرۆشییە لای ئێمە نەماوە. 

زۆر و بۆریی حزب
لەلایەکی ترەوە هێندە حزب دروست بووە و زۆر و بۆریی پێوە دیارە، هەریەکە کۆمەڵێک مادە و بەندی لە پەیڕەوی خۆیدا نووسیوە و هەڵوێست بە راست و چەپدا وەردەگرێت بەبێ ئەوەی لەکاتی پێویست و جێگردا بێت.
ئەمە وەک هەڵخەڵەتاندنی خەڵکە، بۆیە ئەو هەستە پیرۆزانە لای تاک نامێنێت. 
ئەگەر بمانەوێت کوردستانێکی ئازادمان هەبێت، سوپایەکی ئازادمان هەبێت، ئابوورییەکی پتەو و رۆشنبیرییەکی سەربەخۆی ئازادمان ببێت، کۆمەڵگە ماف و ئەرکی دیاریکراو بێت، ئێمە دەبێت پێکەوە هەوڵی بۆ بدەین و یەکترمان  پەسەند بێت.

*باسی سوپای یەکگرتووت کرد، سوپای لەم جۆرە یەکێکە لە سیفەتەکانی دەوڵەتداری، ئێمە وەک حەز دەمانەوێت، بەڵام ئایا رێگە دەدرێت کە سوپایەکی لەم چەشنەمان هەبێت، یان بەم هەموو هێزە چەکدارییە هەمەجۆرەوە، کە هەندێکیان سەربە عەشیرەتن و هێندەی سەربە حزبێک بن، ئاخۆ دەکرێت سوپای یەکگرتوو پێکبهێنین؟

-تەزبێحێک ئەگەر پەتەکەی بپچڕێت، هەموو دەنکەکانی دەوەرێت، سوپای یەکگرتوو لە رێگەی تەبایی کوردەوە بەدی دێت، لەشکرێک پێک بێت کە دوور بێت لە ئینتیمای حزبی و ئیشکردن بۆ حزب، دەکرێت لەشکرێک لە لاوانی نیشتمانپەروەری ئەم گەلە پێکبێنین، نابێت لە سوپاکەدا هەرکەس هەوڵی چەسپاندنی بیروباوەڕی سیاسیی خۆی بدات.
دەبێت هێزێک دروست بکرێت، مەشقی تایبەتی پێبکرێت، بۆ پارێزگاریکردن لە قەوارەی هەرێمی کوردستان و خەڵکەکەی، بەڵام ئەمە ئاسانە؟ لە کاتێکدا زەمینەی تەباییمان نییە و چەندین ساڵە پەیوەندییە ناوخۆییەکانمان هەڵکشان و داکشان بەخۆیەوە دەبینێت، لەولاشەوە بە نەیار دەورە دراوین و لە بۆسەدان بۆمان پیلانمان لێ دەگێڕدرێت، ناتەبایی ئێمەش وایکردووە کە نەتوانین ئەو پیلانانە تێکبشکێنین. 

*بەڵام ئاخۆ لایەنە سیاسییەکان خواستیان لەسەر دروستبوونی ئەم تەبایی و یەکڕیزییە هەیە؟
-
زۆر بەداخەوە، بەدەم عەیبمان نییە، گوێ لە وتەبێژی هەر حزبێک دەگریت، بە لێدوان هەموومان یەک لەیەکتر دڵسۆزتر و لەسەر هەقترین و پێمانوایە ئەوەی دەیڵێین دەبێت خەڵک بە قسەمان بکات چونکە راستین، بەڵام چونکە یەک هەڵوێست نین و تەبا نین، من پێموایە ناتوانین هیچ هەنگاوێک بەرەو پێشەوە بنێین، یان زۆر خاو هەبگاو دەنێین کە لەئاستی مەترسییەکاندا نییە.

*هۆکارەکە  کاریگەریی دەرەکییەکانە یان بێ متمانەیی ناو لایەنە سیاسییەکانی کوردستانە  بە یەکتری؟
-
بەبڕوای من کاریگەریی دەرەکی لە 50 ٪ زیاترە،  بەڵام خۆشمان هێندە تەبا نین کە بتوانین رێژەی ئەو کاریگەرییە دەرەکییە کەم بکەینەوە، ئەگەر خۆمان یەک بووینایە، هەموو ئەو کاریگەرییانەمان پووچەڵ دەکردەوە.

*لە دوای راپەڕین و  قۆناغی دوای نەمانی بەعسیشەوە، لە قۆناغی شەڕی پەرلەمانیداین، شەڕی دەنگدان و بەدەستهێنانی کورسی، قۆناغی دروشمی گڕداری شۆڕشگێڕانەمان بەجێهێشتووە، ئاخۆ ئێستا دەتوانین لە دەستووری عیراقیش بچینە دەرەوە و هەوڵی پێکهێنانی قەوارەی سەربەخۆ بدەین؟
-
ئێمە سەرەتا دەبێت ناکۆکییەکان دەستنیشان بکەین، ئێمە ناکۆکیمان لەگەڵ عیراقدا نییە و دەتوانین پێکەوە بژین و پێکەوە ژیاوین، راستە شەڕی یەکتریمان کردووە، بەڵام تا ئەم ساتە، ئێمە عیراقین، ئەگەرچی ئێمە نیشتمانی خۆمان هەیە و کاتی خۆی بەدەستی وڵاتانی زلهێز پارچە پارچە کراوین، بەڵام ئێمە سەر بەم عیراقەین و  کاتی ئەوە نییە باس لە جیابوونەوە بکەین، چونکە بۆمان ناچێتە سەر، ئێمە لانیکەم ئێستا هیچ لەو مقەوماتانەمان نییە کە بۆ دەوڵەتداریی سەربەخۆ بشێت، ئێمە نابێت بێین لە ناکۆکییە دوورەکەوە دەست پێبکەین، سەرەتا دەبێت شەڕی مافەکانی خۆمان بە پێی یاسا و دەستوور بکەین و داکۆکی لە مافەکانمان بکەین.

*ئێستا لە حکومڕانیی هەرێمدا کە لە زۆر قۆناغدا زۆربەی حزبەکان بەشداربوون لە بەڕێوەبردنیدا، دوترێت کە دەڤەری سلێمانی و هەڵەبجە و گەرمیان و راپەڕین لەلایەن حکومەتی هەرێمەوە پشگوێ دەخرێت، ئەوەش بە گوێرەی لێدوانی زۆرێک لە پەرلەمانتاران و بەرپرسانی لۆکاڵی ئەو شوێنانە، رای ئێوە لەو رووەوە چییە؟
-
من نازانم بە وردی لە چیدا پشتگوێ دەخرێت، ئەوە ئەوانە دەزانن کە خۆیان لە وردەکارییەکاندان، بەڵام ئەوەی من دەیزانم و دڵنیام ئەوەیە لەم حکومڕانییە خۆماڵییەدا کە دوو ئیدارەیی بەئاشکرا هەستی پێدەکرێت. ئەوەی دەسەڵاتی هەبێت شتە باشەکان بۆخۆی دەبات، بەڵام دەبێت یەکێتی لەرێگەی تیمەکەیەوە لە حکومەت پێداگریی بکات لەسەر ئەو خاڵانەی کە باس لەوە دەکەن و لەگەڵیشیدا کەمتەرخەم نەبێت لە ئاوەدانکردنەوە و فراوانکردنی خزمەتگوزارییەکان لەو ناوچانەدا کە راستەوخۆ لە ژێر هەژموونی خۆیدایە. دەبێت ئەم شەڕە لەناو حکومەتدا بکرێت بۆ بەدەستهێنانی دادپەرەوەری لە خزمەتگوازرییەکاندا و دەبێت شارەکانی هەرێم هەموو بە یەکسانی سەیر بکرێن.

*زۆر باستان لە گرنگیدان بە تەبایی و یەکهەڵوێستی کرد، ئاخۆ بەڕای ئێوە لە ئەگەری کشانەوەی یەکێتیدا لە حکومەت، چی روودەدات؟
-
من پێموایە ئەوە لۆژیکی نییە و نا واقیعییە، ئەگەر یەکێتی لە حکومەت بچێتە دەرەوە، چونکە ئەوە وەک ئەوە وایە کەسێک بە قاچێکەوە بمێنێتەوە، پاشان نازانم  بۆچی یەکێتی لە حکومەت دەربچێت؟ مەگەر بە هەوڵ و خەباتی خۆی بناغەی ئەم حکومەت و دامودەزگایانە پێکنەهاتووە؟ لەبری ئەوەی بچمە دەرەوە پێداگریی زیاتر دەکەم بۆ چەسپاندنی داخوازییەکان، چونکە بەرلە هەمووان پارتی و یەکێتی دەبێت هەرێمی کوردستان بە هی خۆیان بزانن.

*ئێمە سنوورێکی زۆرمان هەیە بە ئێرانەوە، بەتایبەتی لە دەڤەری ژێر هەژموونی یەکێتیدا، تاچەند باشە بۆ خەڵکەکەمان پەیوەندیی لەگەڵ ئەم وڵاتەدا بپارێزین و گرنگی پێبدەین و خۆمان نەخزێنینە ناو ململانێ نێودەوڵەتییەکان و شەڕی جەمسەرەکانەوە لە ناوچەکە؟
-
لەو بارودۆخەی ئێمەدا لەم هەرێمەدا بۆ هەولێریش و ناوچەکانی دیکەش گرنگە نەک هەر سلێمانی،  پەیوەندیی ئابووریی لەگەڵ ئێران بۆ ئێمە زۆر گرنگە و شوێنێکی دیکەمان نییە بۆ ئاڵوگۆڕی بازرگانی، لە رووی سیاسییشەوە دەبێت وا بیرنەکەینەوە کە نابێت خاوەنی بڕیاری خۆمان بین، نابێت وابین هەر لایەنێک چۆنی بوێت وامان بەکاربهێنێت، بەڵام لەهەموو حاڵەتێکدا پاراستنی پەیوەندییەکان لەگەڵ ئێراندا کارێکی باشە.

*ساڵانێکە تورکیا هێزی هێناوەتە ناو خاکی هەرێمەوە و بە هەموو جۆرێک  خەڵک دەکوژێت و بۆردومانی ناوچەکان دەکات، لە کوێ بیەوێت بە درۆن بۆمبێک بەردەداتەوە، سنووری نێودەوڵەتی دەبەزێنێت، گوێ بە ناڕەزاییەکان ناوخۆیی و عیراقی و نێودەوڵەتییەکان نادات، چۆن وابکرێت رێگریی لەو حاڵەتە بکرێت؟ 
-
تورکیا بە نیازە بگەڕێتەوە بۆ سەردەمی عوسمانییەکان و بەشێک لە هەرێمی کوردستان و زۆر ناوچەی دیکەش داگیر بکات، ئەم خواستەی تورکیا روونە بەپیی لیدوانی بەرپرسە باڵاکانیان، مێژووش سەلماندوێتی کە ئەمریکا هێندەی هاوکاریی تورکیا دەکات، هێندە لەگەڵ خواستەکانی ئێمەدا نییە، راستە لە زۆر قۆناغدا ئێمە پاڵپشتییەکی باشی ئەمریکامان کردووە، لە رووخاندنی رژێمی بەعس و لێدانی داعش، ئێمە گرنگین بۆ ئەمریکا، بەڵام بەلای ئەوانەوە تورکیا گرنگترە و ئەو گرنگییەی بەوانی دەدەن، بە ئێمەی نادەن.
عیراق کە زووتر رێگەی بەوە داوە بۆ چەند کیلۆمەترێک بێتە ناو خاکی هەرێمەوە، ئەمە بۆی بۆتە بیانوویەک کە گوایە بە مافی خۆی دەزانێت، لەلایەکی دیکەوە ئێمە ئەگەر خەتای خۆمان نەبێت، درۆن نایەت لە ناوجەرگەی خۆماندا بمانکوژێت، خۆزگە خۆمان رێگربووینایە.

*جەنابتان یەکێکن لە کادرە سەرەتاییەکانی کۆمەڵەی رەنجدەرانی کوردستان و یەکێتیی نیشتمانیی کوردستان، بە هەموو ئەو مێژووە سەختەی لەو پێناوەدا خەباتتان کردووە، تا ئێستا شانازیی دەکەیت بە یەکێتی بوونی خۆتەوە؟
-
لە کەسێکەوە بۆ کەسێکی تر جیاوازە، لە هەموو ئەو مێژووەی یەکێتی بوونم پەشیمان نیم، پێشم ناخۆشە یەکێتی وەک یەکێتییەکەی جاران نەبینم، بە هەزاران تێکۆشەرمان هەن ئاوڕیان لێنادرێتەوە، شانازیی بە یەکێتییەوە دەکەم، بەڵام لێشی ناڕازیم، چونکە بە پەرۆشەوە دەمەوێت  لەوپەڕی باشیدا بێت، دەبێت یەکێتی کارێک بکات حزبەکانی دیکەش لە دەوری خۆی کۆبکاتەوە، ئەوە یەکێتییەکەی جاران بوو. ئەرکی ئێمە بوو کە یەکێتییەکی فراوان لەناو کورددا دروست بکەین.

*ئێستا ئومێدێک هەیە بۆ ئەو یەکێتییە؟
-
ئەی چۆن نییە؟ هیچ شتێک مەحاڵ نییە، 

*دوا وتەت بۆ کوردستانی نوێ.
-
زۆر سوپاستان دەکەم بۆ ئەم دیدارە و هەمیشە سەرکەتووبن. 

بابەتە پەیوەندیدارەکان