د. بەرهەم ساڵح، سەرۆک کۆماری عیراق پێشوازیکرد لە قاسم ئەعرەجی، راوێژکاری ئاسایشی نیشتمانی و گفتوگۆیان کرد سەبارەت بە بارودۆخی ئەمنی وڵات و بەتایبەتی بۆردومانەکانی ئێران بۆ سەر ناوچەکانی هەرێمی کوردستان، کە بەوهۆیەوە ژمارەیەک شەهید و برینداری لێکەوتەوە.
لە دیدارەکەدا سەرۆک کۆمار رایگەیاند، ئەم بۆردومانەی ئێران پێشهاتێکی مەترسیدارە و مایەی قبووڵکردن نییە و پێشێلکارییە بۆ سەر سەروەری و ئاسایش و سەقامگیری وڵات و سەلامەتی هاووڵاتیان.
هەر لەو چوارچێوەیەشدا د. بەرهەم رایگەیاند، بەردەوامبوونی تۆپبارانەکانی تورکیا بۆ سەر ناوچەکانی هەرێمی کوردستان جێگای قبووڵکردن نییە و پێشێلکردنی سەروەری وڵاتە و پێویستە کۆتایی پێ بهێنرێت.
لە بەشێکی دیکەی دیدارەکەدا دووپاتکرایەوە لە پێویستی چارەسەرکردنی کێشە و دۆسێ ئەمنییەکان لەگەڵ وڵاتانی دراوسێ لە رێگەی کەناڵە دیپلۆماسییەکان لەسەر بنەمای پاراستنی بەرژەوەندییە هاوبەشەکان و دراوسێیەتی باش و پەیماننامە نێودەوڵەتییەکان و رەتکردنەوەی چارەسەری یەکلایەنە بۆ کێشە هەڵپەسێردراوەکان و پێویستی رێزگرتن لە سەروەری عیراق.
