منی لێ نیم

12:49 - 2022-12-27
دووتوێ
251 جار خوێندراوەتەوە

عەباس ساڵح

منی لێ نیم
دێیتەوە بۆ ئەم ماڵە
بەباڵای دارچنارەکەدا دەڕوانی
لە ئاوی کوپەکە دەخۆیتەوە
یەکە یەکە پلاکی گڵۆپەکان دادەگیرسێنی
بە پلیکانەکاندا سەردەکەوی بۆ قاتی سەرەرەوە
کتێبخانە بێ نازەکە دەبینی
سەرو خواری ژوورەکان دەکەیت
ئایەتێکی سەردیواری یەکێ لەژوورەکان دەخوێنیتەوە
دەچیتە ژووری میوان کەمێ دادەنیشی
دەگەڕێی تێر دەگەڕێی
کەسێ نابینی لێی بپرسی بڵێی کوا..
منی لێ نیم 
من نەماوم

رۆژێ دێ
رۆژێ دەگەڕێتەوە
لە جاران جوانترە
پرچەکانی بە پەلکی نێرگز بەستوە
لێوەکانی رەنگ کردوە بە پەڕەی گوڵاڵە سوورە
گۆنای وەک مانگی تابانە
گوڵێ دێتەوە کراسێکی ئاودامان پەمەیی لەبەردایە
ستیانێکی رەش لە ژێریا
دوو بەچکە مامزی سرک 
چاوشارکێ دەکەن
گوڵێ دێتەوە
هەموو گیانی جوانییە
پڕ لەبەستەو گۆرانییە..

نوێبوونەوە
گوڵ چۆن ئاونگی گرتووە
ئاسمان چۆن ئەستێرەی گرتووە
بەهار چۆن جوانی گرتووە
هەرچۆنی سەرنج ئەدەی
من بووم بەدرەخت و تۆش بە گوڵ
بڕوات ببێ من تۆم گرتووە


بابەتە پەیوەندیدارەکان