پێکهێنانی حکومەت، یان هەڵوەشاندنەوەی پەرلەمان؟
رووداوەکانی چەند رۆژی رابردووی عیراق کە چەک بووە ئامرازی یەکلاییکردنەوەی ناکۆکییەکانی نێوماڵی شیعە، پێمان دەڵێن ئەستەمە پڕۆسەی سیاسیی عیراق بە رێچکەی ئاسایی و یاسایی خۆیدا بڕوات لەبەرئەوەی لەمپەڕەکانی بەردەمی هێندە زۆرن، لە ئان و ساتێکدا سەرلەبەری قابیلی وەرچەرخانە، بێگومان ئەگەر رێگەکانی چارەسەریش نەگۆڕێن هێمنی و ئارامی شەقامیش کە لە دوای پەیامەکەی سەید موقتەدا سەدر بۆ خۆپیشاندەرانی شوێنکەوتەی بۆ کۆتاییهێنان بەو بارگرژییانەی هاتنە ئارا، کاتی دەبێت!
چارەسەری ریشەیی قەیرانەکانی عیراق لەم قۆناغەدا پێکهێنانی حکومەت و کابینەی نوێیە، ئەگەرچی لە دوای هەنگاوەکەی سەدر چانسێکی باش هەیە بۆ چوارچێوەی هەماهەنگی کە هەنگاوەکانی بۆ ئەو مەبەستە خێراتر بکات، بەڵام لە راستیدا ئەم بژاردەیە بێ سەرئێشە نابێت و پێموایە کێشەکانیش قووڵتر دەکاتەوە، چونکە لە بنەڕەتدا هۆکاری مانگرتن و خۆپیشاندانی شوێنکەوتووانی سەدر، رەتکردنەوەی ئەو بژاردەیە بوو، بۆیە لایەنە سیاسییەکان لەپێش هەمووشیانەوە چوارچێوەی هەماهەنگی پێویستە رێگەی دووەم هەڵبژێرن کە بریتییە لە هەڵوەشاندنەوەی پەرلەمان و ئامادەکاریی بۆ هەڵبژاردنێکی تری پێشوەختە.
بێگومان هەڵوەشاندنەوەی پەرلەمان بە رێکاریی دەستووریی و یاسایی دەبێت، ئەویش بە دوو رێگە؛ یا پێویستە مستەفا کازمی سەرۆکی ئەنجومەنی وەزیران بە رەزامەندیی سەرۆک کۆمار داوای هەڵوەشاندنەوەی بکات، یا بە دانیشتنێکی پەرلەمان و داواکاریی سێیەکی ئەندامانی دەبێت، ئەوسا بە دەنگدانی زۆرینەی رەهای ئەندامان لەسەر داواکارییەکە، ئەنجومەنی نوێنەرانی عیراق خۆی هەڵدەوەشێنێتەوە.
لە پێش هەڵوەشاندنەوەی پەرلەمانیش، کێشەیەکی تر کە ناکۆکی لەسەرە و یەکلانەکراوەتەوە یاسای هەڵبژارنە، بۆیە پێویستە لایەنەکان لەسەر پرسی یاسای هەڵبژاردن پێش هەڵوەشاندنەوەکە پێکهاتبن کە ئاخۆ هەر بەو فۆڕمەی پێشوو هەڵبژاردنێکی تر بکەن، یان یاساکە هەموار دەکەنەوە و هەر پارێزگایەک دەکرێتەوە یەک بازنەی هەڵبژاردن.
رێگە راستەکە کۆتاییهێنانە بە بارگرژییەکانی شەقام و دوورکەوتنەوەیە لە بەکارهێنانی ئەو کارتە بۆ یەکلایی کردنەوەی ناکۆکییەکان، لە جێی ئەوە کۆبوونەوە و کۆکردنەوەی لایەنە ناکۆکەکانە تا لەسەر بنەمای دەستوور و لێکتێگەیشتن، گفتوگۆی پێکهێنانی حکومەتی نوێ یا دووبارە ئەنجامدانەوەی هەڵبژاردن بکەن، بەبێ ئەو بژاردەیە، هەر هەنگاوێکی تاک لایەنە نەک چارەسەری دۆخەکە ناکات، بەڵکو قەیرانەکان قوڵتر دەکاتەوە.
