شاشەی گەلی كوردستان لەدوای راپەڕینەوە سەرمەشقی رووماڵی گەورە و گەیاندنی پەیامی نەتەوەیی و نیشتمانی بووە و هێزی گەورەی جوڵەپێكردنی رای گشتی بووە، لە میهرەبانی و مرۆڤدۆستیدا نازناوی (دایك) و لە هەڵبژاردنی سەنگەر ناونیشانی (پێشمەرگە)ی وەرگرتووە.
چەند رۆژێك پێش ئێستا كەناڵی دایك یادی دامەزراندنی بوو، یادی ئەو رۆژە تەنها بیرهێنانەوەی پێشەنگی نەبوو لە بەرنامە و پەخش، بەڵكو بیرهێنانەوەی ئەو یادەوەرییە بوو كە ئامانج لە دامەزراندنی گەلی كوردستان خزمەتكردنی تەواوی گەلی كوردستان بوو بێ جیاوازیی سیاسی و فیكری و ئایدیۆلۆژی و ئایینی، هەروەك چۆن لە ناونانی رۆژنامەی كوردستانی نوێ ئامانج لەو ناونیشانە كوردستانێكی ئازاد و سەوز و نوێ بوو، بەكرداریش ئەم كەناڵە ئەوەی جێبەجێكرد، لە هەوراز و نشێودا، بەناو هەموو ئاستەنگەكاندا و لە هەموو ئەگەرەكاندا بوو بە هی خەڵك و گەلی كردە دروشم و رۆژگارێكی دوورودرێژ مەدرەسە بوو بە تەنها هی هونەرەكانی رۆژنامەنووسی نا، بەڵكو مەدرەسەی ئیتیك و بەها بەرزەكانی پیشەكە و چۆنێتی مامەڵەی دروست لەگەڵ وەرگر، مەدرەسەی پێگەیاندنی هەزارەها كادری پێشكەوتووی ئیعلامی بوو، كە ئێستاش ئەو خوێندكارانەی مەدرەسەكەی گەلی كوردستان دەدرەوشێنەوە لەناو هەموو حزبەكاندا و هەتا ئێستاش لەڕووی پیشەیی و میدیاییەوە بە تەنگ پاراستنی ئەو بەهایانەوەن، راستە لە هەندێك وێستگەدا گاپێك لە نێوان شاشە و خەڵكدا دروستبووە، ئەم دابڕانە خراپیی (گەلی كوردستان) نەبووە، بەڵكو گەشەی خێرای تەكنۆلۆژیا و گۆڕانی سایكۆلۆژیای وەرگر بۆ كوالێتییەكی باشتر شەڕێكی دەستەویەخەی (GK) بووە بۆ ئاستێكی باشتر و دەرەقەتی نەهاتووە، سەربازە ونەكانی ئەم گەلە كوردستانییە لە كۆشش بۆ رێكردنێكی هاوتەریب لەگەڵ پێشكەوتنەكان لەهەوڵدابوون، بەڵام گەشەكردنی تەكنیك و پێشكەوتنی ئامێر و ئەزموونی میدیای بینراو زۆر لەوە خێراتر و تیژڕەوترە لە دۆخی دارایی قورسدا پێی بووێریت، ئەم ئاستەنگانە شەڕێكە دەستت بۆ پێشكەوتن دەگرێت، بەڵام ناتوانێت تاسەر بتوەستێنێت.
یەكێتیی نیشتمانیی كوردستان لە گۆڕانكاری و شۆڕشی ناوخۆیی ناترسێت، لە هەنگاوی پراكتیكیانەی خۆنوێكردنەوە و تازەكردنەوە سڵ ناكاتەوە، ئەگەر بڕیاریدا كار بۆ كەیسێك بكات، هیچ شتێك رایناگرێت، دەست بۆ دەمار بەدەماری ئەو جەستەیە دەبات و رۆحی دەكاتەوە بەبەردا، ئەمە لە هەر وێستگەیەكدا ناونیشانێكی هەبووە، ئەمجارە بۆ تۆڕێكی گەلی كوردستان بەناونیشانی (نوێكردنەوە و پوختكردنەوە) دەستیپێكردووە، پوختەی ئەم كردەیە دەبێتە ستراتیژی دوورمەودای كاركردن و خۆگونجاندنی خۆمان و راگەیاندنی یەكێتی لەگەڵ پێشهات و پێشكەوتنەكان، نەك سازاندنی دۆخی گەشەسەندوو لەگەڵ خۆمان و میدیاكەمان، ئەم ساتە مێژووییەی گۆڕانكارییەكان چەسپاندنی چوار پایەكەیە بە ئەندازەیەكی قووڵتر، پێداچوونەوەی پەیام و بەخشینی پاوەری زیاتر بە شاشە و پێسپاردنی ئەركی گرانتر و پارەداركردنی تۆڕەكە، ئەم قۆناغە شانازییەكانی دوێنێ تێكەڵی هیممەتی ئەمڕۆ دەكات و جێگەی هەمووانی تێدا دەبێتەوە و لە تۆڕێكی فرە ژانر و بەهرەی میدیایی، ئەزموون و زانست، كاروانی نوێی گەلی كوردستان تاودەدەن. یەكێتی بۆ ئەمە خوڵقاوە رچەشكێن و ئازابێت و پێویستی بەو گۆڕانكارییە هەیە، وەك چۆن خاوەندارێتیی یەكەم میدیای بینراوی دوای راپەڕینی كردە میدالی زەمەنی هەژاری بێ ئامراز و سەرچاوە، ئەمڕۆ بەهەمان هەڵمەت رچەی پێداچوونەوە و پوختكردنەوەی دەبەخشێتە دوا سەردەمی تەكنۆلۆژیا و لیبرالیزم، كە بانگەشەیەكی قووڵی پێشخستنی هوشیاریی كۆمەڵگەكان دەكەن.
بەڵێ مەكتەبی راگەیاندنی یەكێتی، هەنگاوی جدی و قورسی ناوە تا بتوانێت شۆڕشێكی زیهنی و رۆشنبیریی گەورە و گران لە كۆی سیستمی سیاسی و كۆمەڵایەتی و فیكری و پەروەردەیی لەناو كۆمەڵانی خەڵك دروستبكات، شۆڕشێكی مەدەنی و ئینسانی قووڵ بۆ گۆڕانكاریی ریشەیی هەمەلایەن لە هەموو سێكتەرەكاندا، گەلی كوردستان بڕیاری داوە پێشەنگیی ئەم رێگا پیرۆزە بەرنەداو بە ئەفراندن و كاری نوێی بواری رۆژنامەگەریی كوردی دەرگا و پەنجەرەكانی دەكاتەوە.
ئێمەی نووسەران و رۆژنامەنووس و رۆشنفیكرەكانی یەكێتیی نیشتمانی پەیمانمانداوە تا داگیرساندنی دوا مۆمی بیروهۆشیاری بۆ هەر تاكێكی كورد نەسرەوین و پێشەنگ بین.
