یەکێتی بەردەوامە لە نەهێشتنی تاکڕەوی

09:22 - 2022-11-09
ئازاد ئیبراهیم ئەحمەد
160 خوێندراوەتەوە

یەكێتی لە مێژووی خۆیدا، بۆ چەندین جار لەگەڵ بەرە و هێزی تردا ناكۆك بووە، بەڵام ئەو ناكۆكییانەی یەكێتی لەگەڵ ئەوانی تردا، بۆچی بووە و لەسەر چی بووە؟
یەكێتی لەگەڵ هەموو ئەو بیركردنەوە و حزب و لایەن و كەسانەی كە ناكۆكی و ململانێ و شەڕی لەگەڵ كردوون، هیچیان بۆ بەرژەوەندیی كەسی و حزبی خۆی نەبووە، بەڵكو ئەجێندا و رێبازی یەكێتی لە دژایەتی و لە ناوبردنی تاكڕەوی و بیری توند و ئەو ماف و بنەمایانەدا بووە كە بۆ میللەت و نەتەوەی كورد و نیشتمانەكەی پێویست بووە. 
یەكێتی وەك سەرمەشقی بەرگری نەتەوەیی و نیشتمانی كورد خەباتی کردووە بۆ بەدەستهێنانی ئازادی و سەربەخۆیی و نەهێشتنی تاكڕەوی و دیكتاتۆری. 

جیابوونەوە لە پارتی  
دامەزرێنەرانی یەکێتی بەر لە دامەزراندنی یەکێتی بە زیاتر لە 10 ساڵ لە پارتی جیابوونەتەوە، ئەو جیابوونەوەیە لە بنەڕەتدا وەستانەوەی ئەو گروپە بوو لە دژی ئەو تاكڕەوی و تاك بڕیارییەی كە لە سەركردایەتی پارتیدا هاتبووە ئاراوە و مامۆستا ئیبراهیم ئەحمەد و مام جەلال و ئەو دەستەبژێرە لە هەڤاڵانی دیکەیان و لەگەڵیشیاندا دەستەیەک لە رۆشنبیران و خوێندەوارانی نزیك لە بیرو بۆچوونی ئەوان ئەو تاکڕەوییەیان پێ قبوڵ نەكراو توانیان ئەو تێزە تێیپەڕێنن و بۆ هەمیشە لەو ژینگە و دۆخە نادیموكراسی و تاكبڕیارییە بێنە دەرەوە. 
ئەم هەنگاوەی مام جەلال و هەڤاڵانی دواتر لە دامەزراندنی یەكێتیشدا بووە شوناسی یەكێتی و بۆ چەندین جاری تریش لە وێستگەكانی مێژووی یەكێتیدا دووبارە بۆتەوە و هاتۆتەوە رێی یەكێتی،  بەڵام هەر تێیپەڕاندووە.

یەكێتی و رژێمی بەعس
هیچ هێزێكی سیاسی و بزووتنەوەیەكی چەكداری لە باشووری كوردستان، یان راستتر بڵێین هیچ شۆڕشێك و خەباتێك، وەك یەكێتی، قوربانی نەداوە لە دژی دیكتاتۆرێكی وەك سەدام و رژێمەکەی لە عیراقدا. 
تەنانەت نەك لە هەرێمی كوردستان، بەڵكو لە عیراقیشدا هیچ هێزێكی سیاسی وەك یەكێتی گورزی كوشندەی لە بەعس و سەدام و بیرو رێبازە فاشیستییەكەی نەدا، لەكاتێكدا هەموو كەس و هێزە سیاسییەكانی عیراق و كوردستان بەهۆی نا ئامادەییان بۆ خەبات لە دژی بەعس، عیراق و باشووری كوردستانیان بەجێدەهێشت و ئاوارەی سنوورەكان و وڵاتانی دیكە دەبوون و نسكۆیان تووشی كورد دەكرد، بەڵام یەكێتی بە رابەرایەتی مام جەلال و بەشێک لەو دەستەبژێرە جارێكی دیكە جۆشیاندایەوە بە كوانووی تێكۆشان، دیكتاتۆری و تاك دەسەڵاتی بەعسی لە ساڵی 1991دا لە باشووری کوردستان  لە گۆڕنا و بە چەخماخەی راپەڕینی یەكێتی تاودرا.

یەكێتی و ئەنسارولئیسلام
ساڵی 2001 یەكێتی، چووە شەڕێكی قورسەوە لەگەڵ تاریك پەرستەكانی ئەنسارولئیسلام و هاوبیرەكانیانەوە، لەگەڵ دەركەوتنی ئەم گروپە لە تاریكایی ئەشكەوتەكانی هەورامانەوە، راستەوخۆ یەكێتی وەك پیشەی هەمیشەیی بۆ رەتكردنەوەیان و لەناوبردنی ئەم بیرە تەسك و تاكڕەو و دژە كرانەوە و دیموكراسییە جەنگا و توانی لەناویان ببات. 

خەڵک ناسنامەی یەکێتییە و گەڕانەوە بۆ خەڵک دروشمی یەکێتییە

وەك هەر شۆڕش و خەباتێكی دیكەی یەكێتی، لەم جەنگەشدا یەكێتی ژمارەیەكی زۆر قوربانی بەخشییە ئازادی و دیموكراسی و رەتكردنەوەی تاكڕەوی تاریكپەرستی و لەم جەنگەشدا یەكێتی لە 22ی ئەیلوولی 2001دا تەنها لە گوندی خێڵی حەمەدا 42 شەهیدی بەخشییە ئازادی و دیموكراسی.
ئەم جەنگە بۆ یەكێتی نەك تەنها جەنگێك بوو دژی بیرێكی ژەنگ گرتووی دۆگما، بەڵكو جەنگێك بوو دژی ئەو ویستەی كە خەونی كۆمەڵگەی كوردی بگێڕێتەوە بۆ تاریكی و داخران و بیری سەدە تاریكەكان و سەدەی نەفامی، بەڵام دواجار یەكێتی ئەم ویست و پیلانەشی لە گۆڕنا و لە مێژوودا تۆماریكرد كە جارێكی دیكە لەسەر بنەما دیموكراسی و مۆدێرن و نەتەوەیی و نیشتمانییەكەی پاشەكشێ ناكات و شەڕی هەر بیرو ویستێك دەكات كە دژی كورد و نەهجی یەكێتی و دیموكراسی و هاوبەشی سیاسی بێت.

جارێكی دیكە یەكێتی و بەعس
لەساڵی 2003دا، ئەمریكا و هاوپەیمانەكانی، بە یارمەتی یەكێتی لە باشووری كوردستانەوە، توانییان گورزی كوشندە لە سیستمی دیكتاتۆری و تاك ئاراستەیی بەعس لە عیراقدا بوەشێنن و بۆ هەمیشە لەناوی بەرن و عیراق لەژێر حوكمی تاكڕەوی و تاكدەسەڵاتی و دیكتاتۆریدا رزگاری ببێت.
سەركردە باڵاكانی ئەمریكا لە 2003دا ویستیان بنكەی ئەنچەرلیكی توركی بۆ ئەو مەبەستە بەكاربهێنن، بەڵام توركەكان رەتیانكردەوە ئەنچەرلیك بۆ لەناوبردنی سەدامی دیكتاتۆر و فاشیست ببەخشن بە ئەمریكا، بۆیە یەكێتی لەپێناوی دیموكراتیزەكردنی عیراق و ئاواكردنی خۆری دیكتاتۆری لە عیراق، كۆمەكی بە ئەمریكا و هاوپەیمانەكان كرد، باشترین بەڵگەی ئەم پاڵپشتییەی یەكێتی بۆ ئەمریكییەكان و ئیشكردنی پێكەوەییان لەپێناوی رەتكردنەوەی تاکڕەوی لە عیراق، چیرۆكی «تورەكە لەسەركراوەكان»ە كە لەگەڵ یەكێتیدا ئەو بابەتەیان چارەسەركرد.

یەكێتی و رێكخراوی  تیرۆریستی داعش
لەگەڵ دەركەوتنی رێكخراوی تیرۆریستی داعش لە سوریا و عیراق، زۆر هێز و حزبی سیاسی پێیانوابوو كە ئەم رێكخراوە تیرۆریستییە رەنگە ببێتە جیرانێكی باش و لە ئایندەدا هیچ كێشە و ئاریشەیەك بۆ هەرێمی كوردستان دروست نەكات، بەڵام هەر زوو یەكێتی ئەم بۆچوونەی رەتكردەوە و لێنەگەڕا داعش وەك هەڵگری بیرێكی توندڕەوی تیرۆریستی دەستی بگاتە هەرێمی كوردستان و تاكڕەوی و بیری توندی خۆی بخزێنێتە مێشك و بیری تاكی كوردەوە، بۆیە یەكێتی لە ماوەی چەند ساڵی رابردوودا و بە دواین رووداوی شەوی 7/11/2022ی گوندی كچانی قەرەداغیشەوە كە هێزەكانی یەكێتی و ئاسایشی خۆرئاوای سلێمانی توانییان رووبەڕووی باندێكی تیرۆریستی داعش ببنەوە و دوو تیرۆریستیان بكوژن و تیرۆریستێكیش دەستبەسەر بكەن، یەكێتی بەردەوام شەڕی هەم تاكڕەوی كردووە و هەم بیری تاكڕەویش. لەم پێناوەشدا چەندین هەزار شەهید و قوربانی بەخشیوە و زۆرترین شەهیدی هەیە لە سەنگەری ئازادی و دیموكراسی و هەرگیز لەم مەبدەئە بنەڕەتییەی خۆی پاشەكشێ ناكات.

مامەڵەی تاكڕەوانە لەگەڵ یەكێتی
حزبێكی گەورەی وەك یەكێتی كە مێژوویەكی گەورەی هەیە لە سەرنگومكردن و لەناوبردنی بیری تاكڕەوی و بیری توند و نادیموكراسی و دیكتاتۆریی، ئەستەمە دوای نزیكەی پێنج دەیە خەبات بۆ ئازادی و دیموكراسی و هەزاران شەهید بۆ خاكی كوردستان، ئێستا پاشەكشێ بكات و ببێتە دۆڕاوی گۆڕەپانەكە، هەروەها پێویستە ئەو لایەنانەش كە بە بیر و ویستی تاكڕەوییەوە مامەڵە لەگەڵ یەكێتی دەكەن، ئەوە بزانن كە یەكێتی پێشەوا و سەرمەشقی دژە تاكڕەویی بووە و وێستگەكانی مێژوو شایەتی بۆ دەدەن كە چەندان خەونی تاكڕەوی و دیكتاتۆریی لەگۆڕناوە.

وتارەکانی نوسەر