گومڕاکردنی خەڵک سوودی نییە

09:35 - 2022-12-08
ئەرسەلان مەحمود
157 خوێندراوەتەوە

سیاسەت و حزبی راستەقینەی نیشتمانی، ئەوەن کە خاك و خەڵك و حكومەت وەك پێویستیی راستەقینە دەبینێت نەك وەك ئەوەی مەجاز و میزاج و بەرژەوەندییە تایبەتە كەسی و سیاسی و حزبییەكانی سەرۆك و سەركردەكانی خۆی دەیانەوێت. 
خۆبژێوی كەسێتی و سیاسی و حزبی لەسەر كەوڵی ئەوانیتر جگە لەوەی مایەپووچی و نیشانەی بەتاڵییە لەهەگبەدا، چەواشەكارییەكە بستێك چییە بڕ ناكات لە دڵ و دەروونی خەڵك و گۆڕەپانی حەقیقەت و واقیعیدا.
ئامانج لە لێدوانە بەراوردكارییە زۆر و زەوەندەكانی بەشێك لە كەسەكانی پارتی لەسەر شار و شارۆچكە و دێهاتەكانی هەرێم و كوردستان بە گشتی، رەنگڕێژكردنی حزبیانەی كۆمەڵگە و جۆگرافیای كوردستانە، شێواندن و گۆڕینەوەی ناسنامەی كوردی و كوردستانییەكەیە لە زیهنیەتی خەڵكدا بەشوناس و دیمۆگرافیا و دیماگۆگیەتی حزبی، لەوەش نزمتر چاندنەوەی تۆوی ناوچەگەرێتیی و پەرتكردنی یەكەی نیشتمانی و نەتەوەییە لە بیركردنەوەی تاكدا و گشتاندنییەتی لە بۆتەی یەكەی دەستەجەمعی حزبی رووتدا. 
لێ‌ نە هەولێر پارتییە و نە دهۆك، نە سلێمانی زەرد دەبێ‌ و نە كەركوك، نە هەڵەبجە دەخەڵەفێ‌ و نە گەرمیان سارد دەبێتەوە لە ئینتیمانی نیشتمانی، نە شارەزوور دەبەزێ‌ و نە راپەڕینش دەترازێ‌ لە شاڕێگە رەسەنە كوردستانییەكەی خۆی. 
لەبەر ئەوە حیكمەت لەم حكومڕانە و عەقڵیەتە گومڕاگەرە چەندە، ئەم جۆرە چەواشەكارییەش لە ئەداو لێدوان و هەڵاتنە لە حەقیقەت و واقیعە هەر هێندە بڕ دەكات.
بستێك لەم هەرێمی كوردستانە نادۆزیتەوە غەرقی كێشە و كێماسیە كۆمەڵایەتی و ئیداری و سیاسییەكە نەبووبێت، خەڵكی لەزاخۆوە تا خانەقین شاهێدی ئەم حەقیقەتە تاڵەن، كەواتا كرۆك لەكێشەكەدا ئەم شار و دەسەڵاتی خۆجێی لەو شاردا نییە، كێشەی هەرە گەورە و بنەڕەتی و سەرەكییەكە حكومەت خۆیەتی. ئەم عەقڵییەتە كەڕ و كوندەیە ناتوانێ‌ تێبگا و هیچ ببیستێت. 
ئەم سیستمە رەق و تەق و دەق پێگیراوە پەتی و پەتیارە هەرێمییەیە وەك با ئاوڕ لە هیچ بەهایەك ناداتەوە، جگە لە خۆی ناتوانێ‌ هیچ شتێك ببینێت، حكومەت كاتێك لە حكومەتی شار و شوێن و باندێكەوە دەبێت بە حكومەتی هەموان و خەڵك، هاوسەنگ بێت لە بڕیار و راسپاردە و دەستەبەری‌ كەش و هەوای ئازاد و ئاسایش و پێشكەشكردنی پڕۆژە و خزمەتگوزارییەكاندا، بە شار و شوێن و حزباوی‌ كردنی كێشەكانی هەرێم و ئەم مشتومڕە چەوەشەكار و خراپەكارییە لە ئەداو ئیدارەداندا، دۆخەكە و ژیانی خەڵك ناگەیەننەوە كەناری ئارامی و ئاوەدانی نیشتمانی، هەڵەن هەر زۆریش لە هەڵەدان ئەوانەی  رەتكردنەوەی تاكڕەوی و رەخناژۆكردنی ئەم حكومڕانێتییەی ئێستای هەرێم بەدژ و دوژمنایەتی حزبی تێدەگەن.
ملنەدانی درێژخایەن و نەهاتنە ژێر باری دیالۆگ و نەدۆزینەوەی چارە بنەڕەتییەكان رێبەرێكی گۆمڕاگەرە لە بیركردنەوە و سەركردایەتیكردنی‌ نەهێشتنی كێشەكاندا، هەزار هێندەی تر، تەنانەت تا قیامەت هەرچی ئامڕازی چەواشەكار هەیە بەكارببرێت، بستێك چییە نەك هەر پاشەكشە بە كێشە و ئاریشەكان ناكات، هەزار ئەوەندەی تر قاڵ و قووڵتریان دەكاتەوە. 

حكومەت كاتێك لە حكومەتی شار و شوێن و باندێكەوە دەبێت بە حكومەتی هەموان و خەڵك، کە هاوسەنگ بێت لە بڕیار و راسپاردە و دەستەبەری‌ كەشوهەوای 
ئازاد و ئاسایش و پێشكەشكردنی پڕۆژە خزمەتگوزارییەكاندا

ئەمڕۆ هیچ لەوە گرنگتر نییە تەواوی كێشەكان وەك كێشەی پەیوەست بە ژیان و گوزەرانی خەڵك و نیشتمانسازی‌ ببیندرێن، چونكە بنەما و رەگی كێشەكانیش هەر ئەوەن، داپۆشینی كێشەكان بە فرتوفێڵ و چەوەشەكاری‌ سەرچیخ بردنی خەڵك كردار و كردەوەی گەمژانە و شاردنەوەی ژەهری كوشندەن لەژێر هەنگوینی شریندا، خەڵك خەڵەتاندن عاقیبەتەكەی دیارە، خۆ خەڵەتاندنە.

وتارەکانی نوسەر