لە قاوی بدەین

با لەسەر بێدەرەتانی و لەگەڵ بێئاسۆیی و بنبەستی سیاسی و بێپەروایی زیمامدارانی حوكمڕانی رانەیەین. بە دەریچە دۆزین و چارەسەر هەڵكڕین بەرەنگاری ئەم چەقبەستنە ببینەوە.
گرنگە؛ ئەم رۆحی بێپەروایی و رێی بنبەستە لە قاوبدەین. هەمیشە لەبیرمان بێت گەلەكەمان، بەتایبەتی نەوە تازەكانی میللەتەكەمان، شایانی چانسی باشترن لە چانسی زەمانی خۆمان، چونكە بەهرە و تواناكانیان ئەو هەقەی بۆ كردوون بە هەقی نیمچە زگماكی.
دۆخی وڵاتمان دژوارە، راستە، گەمارۆ و دەڵەمەیی دەستكەوتەكانمان بوونەتە دیاردە، ئەمەشیان هەر راستە، بەڵام بەراورد لە نێوان ئەمڕۆمان و رابردووی نزیك، كە هیچمان نەبوو وەك دەستمایە وەبەرهێنانی تیادا بكەین و هیچمان نەبوو خەم بۆ لەدەستچوونی بخوێن، بەراوردی وا بەڵگەیە لەسەر ئەوەی دەتوانین و پێمان دەكرێت.
هێشتا كەرەستەكانی دەستمان دەسكەلای باشی جووڵەن، دەستووری وڵات، كە بەرهەمی كۆشش و كردەی (باوكە دامەزرێنەرەكانی دیموكراسی)ی عیراقن لە سایتی دامەزراوە رەسمییەكانی، لە نموونەی ئەنجومەنی نوێنەران، بە پیدیئێف ماون، دەستكاری نەكراون و نیەتی هاككەرانی سیاسی؛ رۆحی دایكی یاساكانی عیراقی بیمار نەكردووە. هێشتا كەركوك، لەولای قەرەهەنجیر و ئاڵتوون كۆپرییەوە، لە شوێنی خۆی ماوە و پژمینی لەرزینی سووكی بوومەلەرزە تراژیدییەكەی توركیا و سوریا جێی لە دڵی كورد و كرمانج لەق نەكردووە. هێشتا لای خۆمان قودسە و هیوامانە لای ئەوانی تریش دڵ بێت.
هێشتا نەفەوتاوین و ماوین، ئەگەرچی باوی ماویەت نەماوە، بەڵام نەفەسی خەباتی میللی ماوە و گەشە دەكات و پەیوەندی بە ئایدیۆلۆژیای باو و دێرینەوە نییە. گەرەكە بەو نەفەسەوە كۆششی سیاسیی هەمەلایەنە پەرەپێبدەین. هەم لە ناوخۆ بە لە قاودانی مەیلی ستەم و جیاكاری و هەمیش روو لە دەرەوە، بە وەستانەوەمان بە رووی ئوێنبازی سیاسەتی سەردەست، كە گەرەكێتی قاچ و قوچی دەستكەوتەكانیان بكات، دەستوور وەلاوەبنێ، یان بەبیانووی خراپیی ئەم بڕگە و ئەویترییەوە بمانباتەوە چوارگۆشەی یەكەم.
لەناو ئەو دەستوورەدا قسە هەیە لەسەر مادەی 140 و نەخشەڕێگا باڵانسی پەیوەندیی دروست لە نێوان كوردستان و پایتەختی فیدراڵی بە نزیكەی پەنجا یاسای دوایی داڕێژراو، دەورەدراوە، ئەنجومەنێكی ئیتحادی قەرارە هەبێت تا وەك فلتەری تایبەتمەندی نێوان زۆرینەی پێویستی دیموكراسی و كەمینەی تایبەتمەند و هەقدار، دادخواز بتوانێت بواری پێكەوەیی و بەردەوامی بكاتەوە. ئەمانە جەوهەری تەوافوقن، كە هێشتا لە عیراق حاكمە، سەرەڕای دژوارییەكانی پێشوو.
لە ئاست ئەم پرسەدا، كارەكتەری پتەومان گەرەكە داكۆكی بكات، چونكە كێشەكە لە مەدرەك و مەسنەد نییە، كە هەیە، كێشەكە لە ئیرادەی كار و ئیدارەی سیاسەتە، یانی بنچینەی كێشەكە ئەوەیە، كە عەزمی نیشتمانی و ئیرادەی كارمان دەوێت.
ئەمە نەبێ، بێگومان هەڕەشەكان سەریان بۆی دەخورێ و شانەی نوستووی گرفت و ناكۆكییەكان وەخەبەردێنەوە.