وتار و کردار پێچەوانەی یەکن

09:55 - 2023-02-28
ئازاد جۆڵا
256 خوێندراوەتەوە

زۆربەی جار ئاڵوگۆڕی دەسەڵات لە دوو رێگاوە دەبێت، ئەگەر کۆمەڵگە و سیستمی وڵاتەکە دیموکراسی بێت، ئەوا هەر چوار ساڵ جارێک یان زیاتر لە رێگەی هەڵبژاردنێکی پاک و بێ گەردەوە دەسەڵات ئاڵوگۆڕی پێدەکریت، جا ئەم ئاڵوگۆڕە لە حزبێکەوە بۆ حزبێکی تر بێت یان هەر لە هەمان حزبدا، بەڵام بە کارنامە و رەنگە بە دەوڵەتمەدارێکی تازەوە بێتە گۆڕەپانەکەوە، جاری واش هەیە هەر لە رێگەی هەڵبژاردنی ئازادەوە سیستمی سیاسی وڵات گۆڕانکاریی ریشەیی بەسەردا دێت و کۆی سیستمی سیاسی و ئابووری و جڤاکی گۆڕانی بەسەردا دێت. 
ئەگەر کۆمەڵگە و سیستمی وڵاتەکە نادیموکراسی و خۆسەپێن بێت، ئەوا ئەم دەسەڵات و شێوازی حکومڕانییە کە بۆ ماوەیەکی درێژ بەردەوام دەبێت و زۆرجاریش بە کودەتا یان خوێنڕشتنێکی زۆر گۆڕانکاریی یان ئاڵوگۆڕی سیاسی و حکومڕانی بەسەردا دێت. 
جیا لە هەموو جیهان، ئەوەی لە کوردستان هەیە و دەبینرێت نموونەیەکی جیاواز و سەیرە، چونکە گوتارەکان و رەفتارەکان رێک پێچەوانەی یەکترن، بۆ نموونە، هەرێمی کوردستان خۆی وەک نموونەیەکی دیموکراسی و ئاشتییانەی دەستاودەستی دەسەڵات و ئەزموونی حکومڕانییەکی دیموکراسی و ئازادیخواز و پێشکەوتنخواز لە ناوچەکەدا دەناسێنێ، کەچی ماوەی 31 ساڵە هەڵبژاردن کرابێی یان نا، هەر بەتەنها لەلایەن دەستەبژێرێکی دیاریکراوەوە لە حزب و دەستە و چەند کەسانێکی دیاریکراو حوکمی ئەم هەرێمەیان کردووە و تائێستاش هەر بەردەوامە، لەگەڵ ئەوەشدا هەمیشە خۆیان وەک دیموکراتخواز و نیشتمانپەروەر و دڵسۆزی راستەقینەی گەل ناساندووە.

 

کە باس لە باوەڕبوون بە ئازادییەکان و پاراستنی مافی مرۆڤ دەکەن، وەک ئەوە وایە بە درێژایی ئەم 31  ساڵە تەنها بۆ جارێکیش لەژێر دەسەڵاتی ئەواندا مافی مرۆڤ پێشێل نەکرابێت

 

 

بەڵێنەکانی پێش هەڵبژاردن
 کابینە لەدوای کابینە بەڵێنی گەورەتر دەدەن، دەڵێن چاکسازیی راستەقینە دەکەین و دزی و گەندەڵی بنەبڕ دەکەین، وەک ئەوە وایە لە ماوەی 31 ساڵی رابردوودا ئەوان دەسەڵاتدار و حکومڕان نەبووبن و ئەوە حزب و لایەن و خەڵکی تر بووبن دەسەڵاتدار و بکەری هەموو ئەو گەندەڵی و کەموکووڕییانەی پێش خۆیان بووبن و لەسەر دەستی ئەوان دەیان وەزیر و بەرپرسی باڵا خرابێتە نێو زبڵدان و لە کونجی زیندانەکاندا بناڵێنن. 
کە باس لە دیموکراسی و پڕۆسەی هەڵبژاردن دەکەن، ئەوەندە ملکەچی دیموکراسی و ئەنجامەکانن، وەک ئەوەی ئەوان لە ماوەی ئەم 31  ساڵەدا لانیکەم 8 جار هەڵبژاردن و دەستاودەستی دەسەڵاتیان کردبێت و هەڵبژاردنەکانیش لە گوڵ پاکتر و بێگەردتر بووبن.
یەکڕیزیی و تەبایی تەنها لێدوانە 
کە باس لە پێویستیی یەکڕیزیی و تەبایی دەکەن ئەوەندە دەنگیان دلێر و کوردپەروەرانەیە، وەک ئەوەی بە درێژایی مێژوو چ لەسەردەمی شۆڕش و چ لەدوای راپەڕینی خەڵکیش تاکە گوللەیەکیان بە رووی یەکتر و کوردکوژیدا نەتەقاندبێ و دڵۆپەخوێنێکی کورد بەدەستی کورد نەڕژابێ . کە باس لە نەیار و لایەنی بەرامبەر دەکەن هەمیشە بە بەرژەوەندیخواز و خیانەتکار ناویان دەهێنن و تاوانباریان دەکەن وەک ئەوەی ئەوان هیچ جارێک چاوساغیی دوژمنان نەبووبن و داگیرکەریان نەهێنابێتە سەر خەرمانی خۆێنی خەڵکی ئەم هەرێمە وێرانکراوە و نەبووبنە کەواسووری پێش لەشکری داگیرکەران. 
کە باس لە باوەڕبوون بە ئازادییەکان و پاراستنی مافی مرۆڤ دەکەن، وەک ئەوە وایە بە درێژایی ئەم 31  ساڵە تەنها بۆ جارێکیش لەژێر دەسەڵاتی ئەواندا مافی مرۆڤ پێشێل نەکرابێت و تاکە کەسێکیش لەسەر بیروڕای جیاواز تیرۆر یان بەناحەق زیندانی یان ئازار و ئەشکەنجە نەدرابێت و سووکایەتی پێ نەکرابێ.
سەروەریی یاسا دەستەواژەی خۆدەرخستنە
کە باس لە سەروەریی یاسا دەکەن بە دەنگێگی زۆر گڕەوە دێنە سەر شاشەکان و دەڵێن لە کوردستاندا کەس لەسەرووی یاساوە نییە، یان هیچ کەسێک بەدەر نییە لە یاسا، وەک ئەوەی زیندانەکانی ئەم هەرێمە خاڵی بێت لە بێ تاوان و پڕبێ لە عەنتەر و یاسا شکێن و جاسووس و دز و گەندەڵەکان، یان سیستمی دادگا و دادوەرییمان تا سەرئێسقان ئازاد و سەربەخۆ و دادپەروەربێ.

ئەنجومەنی بەڕیوەبردنی هەرێمێکی سویسرا لە گۆڕەپانی شار کۆدەبنەوە

 

وتارەکانی نوسەر