شۆڕشەكانی گەلی كورد هەر لەسەردەمی شێخی نەمرەوە تا ئەمڕۆ، گەرمبووە لە خەبات و وڕس نەبووە لە قوربانی و توندبووە لە رووی داگیركەراندا.
شانبەشانی شۆڕشێكی گەرم، مامەڵەی نەرم و نەرمی نواندن و دانوستانیش گرنگن، دەتوانین بڵێین ئەم بابەتە یەكێك بووە لە خەسڵەتە ناوازەكانی سەرۆك مام جەلال و رێبازەكەی بەتایبەتی لەكاتی سەركەوتنی گەل و شكاندنی هێزی دوژمندا، زۆر بە ئاگاییەوە حیكمەتی پەیڕەوكردووە لە سەرجەم مامەڵەكانیدا.
ئەم نەرمی نواندنە، بەرامبەر هەندێك لە پێشهاتە ناوخۆیی و ئیقلیمییەكان زۆرجار وەك خاڵی لاواز خوێندنەوەی بۆ كراوە، بەڵام پاش تێپەڕبوونی كات و تێپەڕاندنی دۆخەکە و هێوربوونەوەی ئاڵۆزیی و كێشە و گرفتە مەترسیدارەکان، ئەوكات درک بە راستی هەڵوێستەکەی مام جەلال کراوە و وتراوە بەڕاستی مام چاكی پێكا لەو نەرمی نواندنە و ئێستا ئەگەر حیكمەتی سەرۆك مام جەلال نەبووایە، دۆخەكە زۆر ئاڵۆزتر دەبوو.
سەركردە دەبێت هەمیشە دووربین بێت، خوێندنەوەی تەواوی هەبێت بۆ گۆڕانكارییەكان و هەڵسەنگاندنی ژیرانەی هەبێت بۆ سەرجەم پێشهاتەكان، هەموو مەترسییەك بە هەند وەربگرێت و دەرفەتەكان بۆ قازانجی میللەتەكەی بەكاربهێنێت، كەڵك لە بچووكترین زانیاری وەربگرێت و وریابێت لە بڕیارداندا، ئەگەرنا بچووكترین هەڵەی سەركردە، چارەنوسسازدەبێت و زیانی گەورەی سیاسی بەدوادا دێت و دوور نییە لەدەستدانی قەوارەی حكومڕانی و یان لاوازبوونیشی لێبكەوێتەوە.
بەداخەوە وەك پێویست كەڵك لەو حیکمەت و ئەزموونە وەرنەگیراوە، چونكە كەسایەتییەكی كوردی وەك سەرۆك مام جەلال هەر لە سەرەتای لاوێتیدا بەرپرسیارێتی سیاسی و خەمی میللەتەكەی لە ئەستۆدەگرێت و پاشان وەك سكرتێری گشتی حزبێکی شۆڕشگێڕی نوێ، لەگەڵ هەڤاڵەكانیدا دژی گەورەترین دیكتاتۆر دەوەستێتەوە و رابەرایەتی کایەی خەبات دەكات.
بە شاهیدی بیانییەكان و سەرجەم سەركردەكانی كورد و وڵاتانی عەرەبی و فارسەكان و تەنانەت توركەكانیش، سەرۆك مام جەلال یەكێك بووە لە كەسایەتییە سیاسییە دانا و زانا و بیرمەندەکان لە جیهاندا، بە كارێزما و حیكمەتەكانی ئەو، كورد رۆژ بەڕۆژ پێگەی زیاتر بەهێزتردەبوو لە ناوچەكەدا و دۆستەكانی زۆرتردەبوون.
لە دوای بەشداریشی لە پڕۆسەی ئازادیی عیراقدا، بە هەوڵی بێوچان و بەشداریی كارای سەرۆك مام جەلال، عیراقی نوێ دروستبوو، ئەنجومەنی حوكم پێكهێنراو هەڵبژاردن بۆ پەرلەمان بەڕێوەچوو و حكومەت پێکهێنرا و بۆ دوو خولی یەك لە دوای یەك پۆستی سەرۆكایەتیی كۆماری عیراقی فیدراڵی بەڕێوەبرد.
هەموو هەنگاو و دەستپێشخەرییەك بۆ ئاشتی و پێكەوەژیان شایانی دەستخۆشییە، چونكە دۆزی رەوای كورد وادەخوازێت و واقیعەکەی ئەوە دەسەپێنێت كە هەمیشە لە خاڵە جەوهەرییەکان و پڕەنسیپە نیشتمانی و نەتەوەییەکاندا یەكگرتووبێت.
بۆیە نەرمی نواندن بەشێوەیەکی تایبەتی لە ناوخۆدا و بەشێوەیەکی گشتیش لەسەر ئاستی ئیقلیمی و نێودەوڵەتی، بە مانای سازش نییە، هێندەی بە مانای ئەوەدێت کە دۆزی کورد هەمیشە نەیاری لە دۆست زیاترە، بۆیە قەدەری ئەو گەلە وایە بە گوێرەی هەڵکەوتەی جوگرافیی وڵاتەکەی و ئەگەر سەرکردە سیاسییەکانی نەرمی نواندن نەخەنە بەرنامەی کاری خۆیانەوە، ناتوانن هەتا سەر سەرکێشی بە چارەنووسی میللەتەکەیانەوە بکەن، دیارە نەرمی نواندن تا ئەو ئاستەی کە شکۆی خاک خەڵکەکەی و قەبارەی قوربانیدانەکانیان پارێزراوبێت، ئەگەرنا ئەو گەلە لەوە زیاتر بەرگەی قوربانی و ماڵوێرانبوونی بێ ئەنجام ناگرێت و پێویستە لەبەری ئەو نەرمی نواندنەش چەند دەستکەوتێکی نەتەوەیی و نیشتمانی بچننەوە.
كاتی ئەوە نەماوە کە کات بە دژایەتی یەكتریی و سوکایەتی و ناوزڕاندنی یەکتری بکوژن، دەبێت هەموان هەوڵبدەین لایەنگر و دەنگ و دۆست بۆ خۆمان و دۆزەکەمان زیادبكەین، كاتی ئەوەیە واز لە بینین و هەڵڵاکردن لەسەر هەڵەی یەكتریی بێنین و هەرلایەنە و هەڵەکانی خۆی چاک بکات و زیاتر گرنگی بە خزمەتی هاووڵاتیان بدەین، چونكە خەڵك ئەمڕۆ هۆشیارە و تەنها خزمەتی دەوێت نەک دروشمی بێ ناوەڕۆک.
