ئازاد جۆڵا
یەکێتیی نیشتمانیی کوردستان کاتێک خۆی وەک هێزێکی نیشتمانیی و بەبیر و هزرێکی نوێخواز و گرێدراوی خەباتی نەتەوەیی و چینایەتی و دیموکراسی راگەیاند، گەلی کوردستان لە سەر ئاستی هەر چوار پارچەکە لەو پەڕی بێ ئومێدی و هەژموونی سەپاوی داگیرکەراندا بوو.
دامەزراندنی رێکخراوێکی تازە لەم فۆرمەدا، ئومێدبەخشی تەواوی کوردستانیان و ئازادیخوازان و دیموکراتخوازانی ناوچەکەش بوو.
تەنها ساڵێک دوای دامەزراندن و راگەیاندنی بەیانی یەکێتیی نیشتمانیی کوردستان بۆچی؟
وەک مانیفێستی پێناسە و ناساندنی یەکێتی، جاڕی شۆڕشی نوێی داو ئومێدەکان گەشاوەتر و ئاسۆکان رووناکتر دەرکەوتن.
یەکێتی راستگۆ بوو لەگەڵ ناوەڕۆکی مانیفێست و جاڕدانی شۆڕشی نوێ و بەگژ مەحاڵدا چۆوە و چرای گەشی لە شەوەزەنگی دەیجوردا داگیرساند.
روویەکی نوێ بۆ شۆڕشێکی نوێوس
رابەرایەتی شۆڕشی نوێ و جیاواز لە رابردووی کرد و چەندین جار لە هەموو بوارێکدا دوژمنی بەچۆکدا داهێنا و دەستی هاوکاریی و تەنانەت گیان بەخشینیشی گەیاندە پارچەکانی تری نیشتمان و مێژوویەکی پڕ لە سەروەری بۆ خەباتی نەتەوەیی تۆمار کرد.
رابەرایەتی یەک هەڵوێستی و کۆدەنگی و راگەیاندنی بەرەی کوردستانی کرد و هەر خۆی تاکە شاسواری راپەڕین و بەعسیقڕان بوو.
خاوەنی بیرۆکەی یەکەم ئەزموونی هەڵبژاردن و دامەزراندنی ئەنجومەنی نیشتمانی کوردستانی ئەوکات بوو، پێکهێنەری یەکەم کابینەی حکومەتی هەرێمی کوردستانیش بوو.
پێداگریی مافی فیدراڵی و لە گۆڕنانی بیرۆکەی ئۆتۆنۆمی بوو.
لە دۆخێکی سەختی ئابووری و سیاسی و ئەمنیدا، پابەندی مووچە و پاراستنی یەکڕیزی و سەرکەوتنی ئەزموونەکە بوو.
تا ئێرە یەکێتی سەرمەشق و هێزی راستەقینەی گەل بوو، بەڵام شەڕی نەگریسی ناوخۆ و پیلانی داگیرکەران و بەرژەوەندی تەسکی حزبی، دەست بەکاربوون بۆ لە باربردن و شێواندی ئەم ئەزموونە و بێ هیواکرنی خەڵک بە دەسەڵاتی خۆیی.
دۆخەکەی ئەمڕۆ هەستیارە
ئەمڕۆ کە یادی 48 ساڵەی دامەزراندنی یەکێتیی نیشتمانیی کوردستان دەکەینەوە، گەلەکەمان و ئەزموونە نەتەوەییەکەمان رووبەڕووی دۆخێکی هەستیار و پڕمەترسی و لەکەدارکردنی زیاتری کۆی بەرهەمی خەبات و تێکۆشانی گەلەکەمان دەبینەوە، ئەمەش ئەو راستییەمان لێ دەخوازێ، یەکێتی وەک هەمیشە کە باوەڕی بە گۆڕانکاری و نۆێ بوونەوە و سەرکەوتن هەیە، پێویستە بگەڕێتەوە سەر هەمان رێچکەوی خەبات و تێکۆشانی گرێدراو بە بیری نیشتمانپەروەری و چینایەتی و راستکردنەوەی هەڵەکان و پاراستنی دەستکەوتەکان و رابەرایەتیکردنی گەل و نیشتمان.
بۆ دروستکردنەوە و بەهێزکردنەوەی پەیوەندییەکی تۆکمە لە نێوان یەکێتی و کۆمەڵانی خەڵک و دووبارە داڕشتنەوە و رێکخستنەوەی پەیوەندیی سیاسی و دیبلۆماسی لەگەڵ لایەنە سیاسییەکانی تری کوردستان و کارکردن بۆ گەڕانەوەی متمانە لە نێوان سەرجەم چین توێژ و پێکهاتەکانی کوردستان بە یەکێتی و ئەزموونە نەتەوەییەکەمان.
پێداگریی لەسەر قووتی خەڵک و پاراستنی دەستکەوتەکان و رێکخستنەوەی پەیوەندیی نێوان هەرێم و بەغدا لە سەر بنەمای مافە دەستوورییەکان و پاراستن و یەکلاییکردنەوەی ناوچە کێشە لەسەرەکان.
رێکخستنەوەی نێوماڵی هەرێم و دروستکردنی بەرەیەکی بەهێز بۆ روبەڕوبوونەوەی نادادی و نەبوونی شەفافیەت لە دارایی و چاکسازی راستەقینە، سووربوون و پێداگری لەسەر پاراستنی مافی مرۆڤ و ئازادی رادەربڕین و ناڕەزایی و خۆپیشاندان و گردبوونەوە،
ئەمانە و چەندین کاری تری پێویست و ئانی ئەرکە و دەکەوێتە سەر شانی یەکێتیی نیشتمانیی کوردستان.
بە دوورکەوتنەوەی یەکێتی لە رابەرایەتیکرنی گەلەکەمان، نەتەوە و نیشتمانەکەمان، ئەزموون و دەستکەوتەکانمان رووبەڕووی مەترسی و کارەسات دەبێتەوە و بەرەو ئاقار و ئایندەیەکی نادیار هەنگاو دەنێت.