نووسینی ئەم جیاوازییانە لە نێوان عیراق و هەرێمی کوردستان، نە پشتگیری و باوەڕ و متمانەیە بە بەغدا، نە ناشیرینکردن و نەمانی باوەڕ و ئینتیمایە بە کورد و کوردستان، بەڵکو خستەڕووی بەشێک لە راستیین.
حکومەتی فیدراڵی و دۆخی عیراق
1- کابینەی سودانی بەراورد بە کابینەکانی پێش خۆی، لە هەموویان بێ کێشەتر و بێ ئۆپۆزسیۆنتر و یەکگرتووترە.
2- ئێستا لەهەموو کات زیاتر نێوماڵی شیعە پتەوە و یەکڕیزن ئەگەر بەشێوەیەکی کاتیش بێت .
3- بەغدا بە بەرنامەیەکی داڕێژراو یارییەکی ژیرانە لەگەڵ کورد و سوننە دەکات کە هەمیشە لەکۆتاییدا بە قازانج و ویستی بەغدا تەواو بووە و سەرکەوتووبووە لە ململانێکانیان لەنێوخوی عیراقدا .
4- چوارچێوەی هەماهەنگی بە یەکڕیزییان توانیویانە کۆنترۆلی تەواوی بڕیارەکانی نێو هاوپەیمانی ئیدارەی دەوڵەت بکەن، ئەمەش سودانی و شیعەکانی بەهێزتر کردووە.
5- عیراق ئێستا خاوەنی ئابووریەکی بەهێز و یەدەگێکی زۆرە، ئەمەش پاڵپشتێکی بەهێزە بۆ حکومەت.
6- لە رووی ئەمنییەوە، عیراق کۆنتڕۆڵی ناوچەکانی خۆی کردووە و جموجۆڵی تیرۆریش تا ئاستی نەمان چووە.
7- لە رووی خزمەتگوزارییەوە، وەک پێویست نییە، بەڵام چونکە پێداویستییە سەرەکییەکانی خەڵک بەردەستە و مسۆگەر و بەردەوامە، نەبۆتە گرفتێکی گەورە بۆ کابینەکەی سودانی .
8- یاسای بودجەی سێ ساڵەی عیراق پلانێکی باشە و ئومێدی لای خەڵک دروستکردووە کە لەم سێ ساڵەدا خزمەتگوزارییەکان لە هەموو روویەکەوە بە ئاستێکی باش بەرز ببێتەوە، چەند پڕۆژەیەکی گەورە و ستراتیژی دوورمەودای ئابووری دەستی پێکردووە .
9- بەغدا لە رووی دیبلۆماسییەوە، توانیویەتی هاوسەنگی پەیوەندییەکانی رابگرێ و عیراق وەک خاڵی بەریەک کەوتنی دژبەیەکەکان بپارێزێ .
10- پشتیوانیی زیاتری کۆمکاری عەرەبی و کەنداو بۆ عیراق و هەوڵی گەڕانەوەی پێگەی سیاسی و ئابووری و جیۆپۆلەتیکەکەی، لە هەرسێ لووتکەی( میسر، عیراق، ئەردەن) خاڵێ بەهێزن بۆ عیراق .
11- ئێستا جگە لە ( ئێران و ئەمریکا) کەمتر رۆڵ و پێگە و کاریگەریی وڵاتانی ناوچەکە و جیهانیش لەسەر عیراق ماوە،
ئەوەش کە تورکیا هەیەتی زیاتر لەسەر هەرێمە نەک عیراق.
12- پڕۆسەیەکی بەردەوام لە دژی گەندەڵکاران و رادەستکردنیان بە دادگا دەستی پێکردووە و درێژەی هەیە .
13- سوپای عیراق ئێستا تۆکمەتر و پڕچەک و بەهێزە، گروپە چەکدارەکانیش ئەگەرچی زۆرو توندڕەون، بەڵام لە رووی سیاسییەوە کۆنتڕۆڵ کراون .
هەرێمی کوردستان نەیتوانیووە پەیوەندییەکی تەندروست و هاوسەنگ و پێویست دروستبکات لەگەڵ ناوەند و وڵاتانی ئیقلیمی و جیهانی، ئەمەش وایکردوە هەرێم ببێتە قوربانی پیلانگێڕی
هەرێمی کوردستان و حکومەتەکەی
1- هەرێمی کوردستان بەخراپترین قۆناغەکانی مێژووی خۆیدا تێدەپەڕێ، ئەمەش بەهۆی سیاسەت و بەرنامە و کرداری ئەم کابینەیەوە و دابڕانی بەتەواوی لە خەڵک و نەبوونی هیچ جۆرە پشتگیری و متمانەیەک لەلایەن خەڵکەوە بۆ حکومەت.
2- هیچ کاتێک نێوماڵی کورد هێندەی ئێستا پەرتەوازە و چەقبەستوویی سیاسی پێوە دیارنەبووە، نەبوونی یەکگوتاری و یەک هەڵوێستیی هەرێم، وایکردووە بەغدا بە ئارەزووی خۆی و بە پلانێکی دوورمەودا کار لەسەر لاوازترکردنی هەرێم و قەوارە سیاسییەکەی بکات .
3- هەرچەندە کورد بەشێکە لە هاوپەیمانیی ئیدارەی دەوڵەت و پێکهێنانی کابینەکەی سودانی، بەڵام بەهۆی نەبوونی هەماهەنگی و یەک هەڵوێستیی کورد لە کابینەکەدا، بێ رۆڵتیرن پێکهاتەیە .
4- هەرێم خاوەنی قەرزێکی زۆر و کەڵەکەبووە، ئەمە جگە لە داڕووخانی سەرخان و ژێرخانی ئابوورییەکەی .
5- لە رووی ئاسایش و سەقامگیرییەوە، هەرێمی کوردستان بۆتە تاقیگەی دەزگا هەواڵگرییەکان و جیهان ،خاک و خەڵکەکەی بۆتە سووتماکی درۆنەکان .
6- ساڵانێکی زۆرە خزمەتگوزارییەکان لەهەرێمی کوردستان لاوازە، یاخود وەستاوە، ئەمەش هۆکارێکی تری کوشتنی زیاتری ئینتیمایە.
7- ماستەرپلان و بەرنامە و بڕیار و نییەتێک، تەنانەت پڕۆژەیەکی ستراتیژی دوورمەودای کاریگەر و بونیادنەر لە هەرێمدا نییە .
8- هەرێمی کوردستان نەیتوانیووە پەیوەندییەکی تەندروست و هاوسەنگ و پێویست دروستبکات لەگەڵ ناوەند و وڵاتانی ئیقلیمی و جیهانی، ئەمەش وایکردوە هەرێم ببێتە قوربانی پیلانگێڕی.
9- عیراق وڵاتێکی سەربەخۆیە و وڵاتانی جیهان بەپێی رێکارە نێودەوڵەتییەکان مامەڵەی لەگەڵدا دەکەن، ئەمە جگە لە کۆمکاری عەرەبی، بەڵام لەهەموو دونیا گەلێک نادۆزیتەوە لە کورد بێ خاوەنتر و پشت و پەناتر بێت.
10- تا ئێستا یەک بەرپرسمان نەدیت لەم هەرێمە پڕ گەندەڵییە سزا درابێت، یاخود داواکرابێت یان دوورخرابێتەوە!
11- هێزی پێشمەگەی کوردستان دوای هەوڵ و داوا و هەڕەشەی چەندین ساڵەی هاوپەیمانان و وڵاتانی دۆست، ئێستا لە هەمووکات زیاتر پەرتەوازە و ناڕێک و پڕ کێشەن، هەرێم تا ئێستاش خاوەنی هێزێکی نیشتمانی بەهێزی پڕ وورە و باوەڕ نییە .
12- هەرێم لەماوەی 32 ساڵی ئازادی و دیموکراسی نەیتوانیوە لەکاتی خۆی و بەشێوەیەکی متمانەپێکراو هەڵبژاردنەکان بەڕێوەببات و دەستاودەستی دەسەڵاتی ئاشتیانە و دیموکراسییانە پیادە بکات.
