لەسەرەتای دامەزراندنی یەکێتیی نیشتیمانیی کوردستانەوە تا ئەم ساتە وەختە، یەکێتی زیانی زۆری پێگەیشتووە، کاتێک ناتەبایی و پەرتەوازەیی بەدەر لە ویست و خواستی ئەو باڵادەست بووە.
دەتوانین دوو نموونەی زەق و بەرچاو بێنینەوە، کارەساتی هەکاری و هەڵگیرسانی ئاگری شەڕی ناوخۆ لە ساڵی 1994 و لێکەوتەکانیان. کاتێکیش یەکڕیزی و تەبایی و هاودەنگی باڵیان بەسەر پەیوەندیی لایەنە سیاسییەکاندا کێشاوە، بەتایبەتیش نێوان یەکێتی وپارتی، گەلی کوردستان و هەموو لایەک قازانجیان کردووە و سەنگی کورد و کوردستان لەسەر ئاستی ناوخۆی عیراق و ناوچەکە و جیهان بەشێوەیەکی بەرچاو بەرجەستە بووە.
یەکێتی هەمیشە بڕوای نەگۆڕی وابووە، یەکڕیزی و تەبایی، وێڕای دید و بۆچوونی جیاواز، مەرجی گەیشتنە بە ئەمانجەکانی گەلەکەمان.
یەکێتیی نیشتمانیی کوردستان لەوپەڕی بەهێزیدا لەشاخ، ساڵی 1984 لەسەر زمانی سەرۆک مام جەلال، جاڕی ئاشتبوونەوەی دا و بەرهەمەکەشی دوای دوو ساڵ پێکهێنانی بەرەی کوردستانی بوو.
پاش هەڵگیرسانی شەڕی ناوخۆش، یەکێتی هەمیشە بڕوای وابووە، ئاشتی و تەبایی رێگا راستەکەیە و دەرەنجامەکەشی بەدەست پێشخەریی سەرۆک مام جەلال، ئاشتی بەرقەرار بوو هەموو کوردستان لەو ئاشتییە سوودمەندبووە.
ماوەی چەند ساڵێکیشە گرژی و ئاڵۆزی لە نێوان یەکێتیی و پارتی دروست بووە، یەکێتی گلەیی لەوە هەبووە و هەیەتی.
تاکڕەوی لە حکومڕانیدا و ناعەدالەتی لە خەرجکردنی داهاتی هەرێمدا هەیە و ئەمەش قسەو گلەیی و گرژیی زۆری بەدوای خۆیدا هێناوە و بارودۆخێکی ناهەمواری هێناوەتە پێشەوە.
لەمەشدا چەندین جار یەکێتی ئەوەی دوپاتکردەوە کە ئەم بارودۆخە لە قازانجی هەرێم و خەڵکی کوردستان نییە و هەموو لایەک زەرەرمەند دەبن، ئەم راستییەش لەسەردانی وەفدە تەنیاکانی پارتیدا بۆ بەغدا رەنگیدایەوە، کاتێک چەند جارێک ئەو وەفدانە چوون و نەگەیشتنە ئەنجام، بەڵام کاتێک قەناعەتەکە گۆڕاو وەفدی هاوبەشی حکومەتی هەرێم کە نوێنەری هەموو لایەنە بەشدارەکانی حکومەتی تیابوو چوونە بەغدا، بارودۆخەکە گۆڕاو وێنە جوانەکە دەرکەوت کە وێنەی یەکدەنگی و یەک هەڵوێستییە لە مەسەلەی داکۆکیکردن لە مافە دەستورییەکانی خەڵکی کوردستان و هەر بە ئاشتی و تەبایی و هاوهەڵوێستیی، خەڵکی کوردستان سوودمەند دەبن .
