مام جەلال

״سروودی دەمی راپەڕین پەخش مەکەن، هەڵیگرن بۆ کاتی خۆی!״

باسکردن و قسەکردن لەسەر رووداوە مێژووییەکان، کارێکی پێویستە، هەم بۆ لە بیرنەچوونەوەیان، هەم بۆ سوود و عیبرەت وەرگرتن، هەمیش بۆ بە دۆکیۆمێنت کردنیان بەتایبەت گەر ئەو باسکردن و گێڕانەوانە لەلایەن شایەتحاڵ و بەشداربووەکانەوە بن. 

پرۆسەیەکی لە پڕ و سەرپێی نەبوو
راپەڕین پرۆسەیەکی لە پڕ و هەروا سەرپێی نەبوو، کە هەندێ کەس و لایەن بۆ بێ ئەهمیەت کردن ونادیدە گرتنی وا دەڵێن، بەڵکو بە پلان و بەرنامە بۆداڕێژراو بوو لە مێژ بوو یەکێتیی نیشتیمانیی کوردستان بۆ هەلێکی لەبار و شیاو دەگەڕا بۆ ئەنجامدانی.
ئەمە بە مانای ئەوە نییە دە ساڵ بووبێ نەخشەکەی داڕشتبێت، نەخێر بەڵکو هەمیشە لەبەرچاوی بووە.
بەندە نموونەیەک دەهێنمەوە بۆ سەلماندنی ئەو راستییە و بۆ ئەمەش دەیان هەڤاڵی راگەیاندنی یەکێتیی شایەتن. سەرەتای هەشتەکان لە رادیۆکەوە - دەنگی گەلی کوردستان - کە پێشتر دەنگی شۆڕشی عیراق بوو، دوای خوێندنەوەی چالاکییەکان یان گوتار، سروودی دەمی راپەڕین لێدەدرا، تا رۆژێک جەنابی سەرۆک مام جەلال، هەم بە بروسکە، هەم بەدەمیی بە هەڤاڵ ئەرسەلان بایزی راگەیاند، کە ئەوسا لێپرسراوی راگەیاندن بوو، چیتر ئەو سروودە - دەمی راپەڕین - پەخش مەکەن بۆ ئەوەی ئەهمییەت و سوودەکەی لەدەست نەدات، چونکە کاتی خۆی دێت!. 

راپەڕین پرۆسەیەکی لە پڕ و هەروا سەرپێی نەبوو، کە هەندێ کەس و لایەن بۆ بێ بایەخکردن ونادیدە گرتنی وا دەڵێن، بەڵکو بە پلان و بەرنامە بۆداڕێژراو بوو

بڕیاردان لەسەر جێبەجێکردنی پلانی راپەڕین 
لێرەوە دێمە سەر ئەسڵی مەسەلەکە، نزیکەی چوار مانگ پێش راپەڕین و کاتێک یەکێتی بڕیاریدا پلانی راپەڕین جێبەجێ بکات و ئەرکەکان بەسەر هێزی پێشمەرگە و ئۆرگانەکاندا دابەش بکات، مەکتەبی راگەیاندن و لە مەکتەبیش ئیزگەی دەنگی گەلی کوردستان، ئەرکێکی گەورەو مێژوویی بەرکەوت. بۆ ئەو مەبەستە لێپرسراوی مەکتەبی راگەیاندن کە ئەوسا رەحمەتی کاک قادری حاجی عەلی بوو، لەگەڵ بەرپرسی ئیزگەی دەنگی گەلی کوردستان، کاک ئازاد چالاک و چەند هەڤاڵێکی تر بانگ کران بۆ کۆبوونەوەیەکی تایبەت بەسەرپەرشتی رەحمەتی کاک نەوشیروان، لەو کۆبونەوەیەدا وێڕای باسکردنی نەخشە و پلانی راپەڕین، رۆڵی راگەیاندن دیاریکراو چەند ئەرکێک بە ئیزگە سپێردا کە بریتی بوون لە:
یەکەم: نووسینی چەند بانگەوازێک، بە عەرەبی بۆ سوپای رژێمی بەعس، تیایدا پێیان رابگەیێنرێ، رژێم بەهۆی گرتنی وڵاتی کوێتەوە، تووشی روبەڕووبوونەوەیەکی سیاسی و دیبلۆماسی بووەو هاکا تووشی شەڕیش هات لەگەڵ سوپای هاوپەیماناندا، ئەوان جیاوازن لە رژێمی بەعس، هیزی پێشمەرگە و گەلی کورد دژی رژێمن، نەک ئەوان و هەرکاتێک بینییان هیزی پێشمەرگە و خەڵک راپەڕین، بێلایەن بن و رووبەڕوویان نەبنەوە و ژیانیان پارێزراو دەبێت.
دووەم: چەند بانگەوازێک، بۆ چەکدارە کوردەکانی سەر بە رژێم بنووسرێ و داوایان لێبکرێت، بەهۆی ئەو بارودۆخە تازەیەوە، خۆیان لە رژێم بە دوور بگرن و لەهەر رووداوێکدا بێنە پاڵ پێشمەرگە و جەماوەر دژی رژێم.
سێهەم: زنجیرەیەک گوتار بە کوردی و عەرەبی لە بارەی بارودۆخەکە و وەزعی خراپی رژێم، بۆ خەڵکی کوردستان و عیراق بنوسرێت، تیایدا بەوردی بارودۆخەکە هەلبسەنگێنرێ و خەڵک ئامادەبکرێت بۆ هەر پێشهاتێک.
چوارەم: چەند بانگەوازێک بنوسرێت و تیایدا داوا لە جەماوەری کوردستان بکرێت، لەکاتی روودانی روبەرووبوونەوەی هێزی پێشمەرگە و جەماوەر لەگەڵ هێزەکانی رژێم و دامودەزگاکانی، دامودەزگا و فەرمانگە خزمەتگوزارییەکان بپارێزن و تێک نەدرێن.
پێنجەم: بڵاوکردنەوەی هەموو ئەو بروسکانەی بە جفرە نوسراون درەنگانی شەو، بۆ رێکخستنی شارەکان و مەفرەزە پارتیزانەکان و مەفرەزەکانی سرک - سوپای رزگاری کوردستان - کە لە نێو شارەکانی کوردستان بوون. 
شەشەم: هەموو کارەکانی تری راگەیاندن رابگیرێن و توانای سەرجەم کادیر و کارمەندەکان، بخرێنە پاڵ توانای کارمەندانی ئیزگەوە.
حەوتەم: ستافی ئیزگە بکرێنە دوو بەش، بە نووسەر و بێژەر و ئەنسات و تەکنیککار و بێ سیمەوە، بۆ هەردوو ئامێری پەخشەکە، کە یەکێکیان 41 مەتری و ئەوی تریان 75 مەتری بوو، بەر لە ماوەیەک لە جێبەجێکردنی پلانی راپەڕین، ئیزگەی 41 مەترییەکە بە ستافەکەیەوە بچێتە گوندی زەڵێی نزیک شێنێ، نزیک بارەگای کاک نەوشیروان و 75 مەترییەکەش بە ستافەکەیەوە لە سەقز بێت و وێڕای پەخشی رۆژانەی خۆی، کە لە سەعات چوارەوە دەستی پێدەکرد، لە ئامادەباشیدا بێت بۆ جووڵە بۆ هەر شوێنێک پێویست بێت. بێژەری کوردی 41 مەترییەکە، کاک باست حەمە غەریب بوو، 75 مەترییەکەش کاک چیا بوو، جگە لە بێژەری عەرەبی.
هەشتەم: راهێنان لەسەر پەخشی راستەوخۆ لەلایەن بێژەرەکانەوە و هەروەها بەرە بەرە زیادکردنی پەخش بۆ چەند سەعاتێک، بەندە بەر لە جێبەجێکردنی ئەو پلان وبڕیارانە، لە ئەلشەڕارە بووم، لە دابەشکردنەکەدا بەر رادیۆی 75 مەترییەکە کەوتم.

سروودەکە لە رۆژانی راپەڕیندا پەخش کرا
بە شانازییەوە هەڤاڵانی ئیزگە، بە هەردوو شەپۆلی 41 و75 یەکەوە، بە رێنمایی هەڤاڵانی سەرکردایەتی و بەرپرسی راگەیاندن، ئەرکەکانیان بە باشترین شێوە جێبەجێکرد و سروودی دەمی راپەڕینیان دەیان جار، لە رۆژانی راپەڕیندا و لەسەر داواکەی سەرۆک مام جەلال لە کاتی خۆیدا پەخش کرد.

ژمارەیەک لە هەڤاڵانی ئیزگەو چەند میوانێک، سلێمانی گردی عەلی ناجی، بارەگای ئیزگە، رۆژانی راپەڕین.
راوەستاوەکان لە راستەوە: نەناسراوەتەوە، شوان کەریم کابان، ئازاد چالاک، بەختیار، قادر ئەحمەد، قادر حاجی عەلی، عەتا حاجی عەلی، پشتیوان عەبدولرەحمان، عومەری حاجی عەلی،حەداد. دانیشتوەکان لەراستەوە: نەناسراوە، نەناسراوە، ئاری چالاک، دلۆڤان، مامۆستا ئیکرام، سەیدا کاروان یوسف، سەربەست فەتاح.