دانـا لوقمان
هـەمیشە جەنگەکان هۆکاری سیاسی و ئابووریی و کۆمەڵایەتی و ئایینی و رەگەزەیی و باکگراوندێکی شێواو و لێکتێنەگەیشتنیان هەیە، هەرکاتێکیش لایەنەکان بەرەو چارەسەر نەڕۆیشتن، ئەوا خەباتی چەکداری دروستدەبێت، ئەویش بەرهەمی ئەوەیە کە لە رابردوودا پڕۆژەیەکی چارەسەریانە و گشتگیر نەخراوەتەڕوو.
دڵنیام لەم سەدەیەی ئێستادا هیچ جەنگێک چ لە بلۆکی خۆرهەڵات یاخود بلۆکی خۆرئاوا، لە قازانجی خەڵکی جیهان و مرۆڤاییەتی نابێت.
هەمیشە باوەڕم وایە تاکی کۆمەڵگە لە خۆشترین ژیان بژی و سەرجەم ماف و ئیمتیازاتەکانی دەستەبەربکرێت، هەمان ئەم باوەڕەشم بۆ دەوڵەت وایە کە دەبێت خاوەنی بەها پیرۆزییەکان و خاک و سنوور و هێماکانی خۆی بێت.
سەدەی 21 زۆر جەنگ تێیدا روویدا، لەو ماوەیەدا دەیان کارەسات رۆیشتوون و هەزاران قوربانی و لێکەوتەی جیاجیای بەجێهێشت چ لە وڵاتانی خۆرئاوا کە بە وڵاتانی خۆشگوزەران ناودەبرێن، چ لە وڵاتانی خۆرهەڵات، شەڕەکان دەستیان پێکردووە و ئامارەکانی قوربانیان بڵاودەکرێنەوە، پاش ماوەیەک شەڕەکان کۆتاییان دێت، کەچی هێشتا ئامانجەکان کە ئەو شەڕەیە هەوڵی بۆ دەدا بەدینەدەهاتن، چونکە تـا ئێستا کەلتورێکی گشتیی نێودەوڵەتی دروستنەبووە بۆ چارەسەرکردنی سەرجەم کێشەکانی جیهان.
