له‌تیف فاتیح فه‌ره‌ج
پێکەوەبوونی کەرکوکیانە لە کەرکوک، کەرکوکی بوون بەو جۆرەی ئەسیری شاعیر خەونی پێوە دەبینی، وەلانانی نەیاری و ناکۆکی بەتایبەتی بۆ کورد تەنها رێگە راستەکەیە، بۆ دوو مەبەست، یەکەم ساڕێژکردنی ئەو رابردووە پڕ کەندو لەندو ناجۆرە، کە زۆرجار بە دەردی مامرەکە دەچین، دووەم بنیاتنانەوەی ئایندەیەکی باش، ئایندەیەک کە چیتر مەترسییەکانی عەرەباندن و تاراندن کەس وێڵ و سەرگەردان نەکەن.
کوردی کەرکوک هەموو هەڵبژاردنێک سەرەڕای پەرش و بڵاوی حزبەکان و پێکەوە نەبوونیان، ئەوان قسەی خۆیان دەکەن، ئەمجارەش زۆربەیان قسەی خۆیان کرد، هەر هەنگاوێک پێچەوانەی ئەم پەیامەی کەرکوکییەکان بێت، دواتر بەزیان بۆ بزاوتی سیاسی و کۆمەڵایەتی و تەنانەت پێکەوەیی کەرکوکییەکان کۆتایی دێت، بۆیە ناکرێت لەبری هەڵگرتنی مەشخەڵی پێکەوەیی، دەست بۆ ئاگرەکە بەرین، مەشخەڵەکە رێگەکە رووناک دەکاتەوە و ئاگرەکە وڵاتێک دەسووتێنێت، نەک هەر دەستێک، دۆزینەوەی دەرفەت و دەرچە کاتیشی گەرەک بێت، زۆر باشترە لە پێوەدانی دەرگاکە و ناچارکردن بۆ لێدانی زەنگی دەرگایەکی تر و دواتریش لەقاودانی یەکتر.
کوردی ئاوەزدار ئەوەیە چاوەکانی بەرلە بینینی هەرکەس برا هاوزمانەکەی خۆی ببینێت، پەروەردەی سیاسی ئێمە لە سەردەمی قەڵەم و عەرزوحاڵی بەڕێوە، تا قرمژنی گولـلە بەزار و لەسەر کاغەز برایەتی و پێکەوەیی و یەکڕیزی بووە، بەڵام لە کرداردا هەمیشە بەربەست و لەمپەری خۆکردانە و خۆکوردانە، لەتەک گرێکوێرەکانی نەیارانی کورددا هاتوونەتەوە، دوای هەر شکستێکیش، دەست لە ئەژنۆ دانیشتووین.
ئێستا ئیدی کاتی هەڵوەشانەوەی ئەو قەدەرەیە، بۆ ئەمەش کەرکوک سەنگی مەحەکە، حاجی قادر وتەنی: «گەر رێک نەکەون، هەروا دەبنە خەرابەئاباد»، خۆ رێکەوتن مانای باب و فەرزەندی نییە، بۆ ئەوەش نییە ئەوانی تر پەراوێز بخرێن، رێکەوتن جگە لەوەی راستگۆییە لەگەڵ دروشم و بانگەشە و پەیامەکان، بۆ ئەوەشە کەرکوکییەکانیش لە تەبایی و تەناهیدا بژین.
خەڵکی کەرکوک زیاتر لە خەڵکی هەر کوچە و کەنارێکی دیکەی دنیا، پێویستیان بەوەیە پشویەک بدەن و لەو نەیارەتی و ناجۆرییە دروستکراوەکان دوور بکەونەوە، دەرمانی دەردی کەرکوکییەکان لە دەرەوەی کەرکوک و لای دەر و دراوسێ نییە، لای کەرکوکییەکان خۆیانە، ئەگەر لە ناوخۆدا تەبایی و رێکی هەبێ، هەزار پیلان و تەڵەکە و تەڵەی دەر و دراوسێ بە پوولێک، بۆیە ئیدی کەرکوکییەکان دەیانەوێت وەکی ئەو عالەمی خودایە لە ترس و نیگەرانی و ئایندەی خراپ رزگاریان ببێت، ئەمەش مێرخاس و خاتوونی ئازا و بوێری دەوێت، کەرکوکیش لیپە لەو جۆرە عەگید و تەوارانەی دەتوانن کاری مەزن بکەن ئەگەر دەست نەخرێتە رێگەیان.
پێویستە سیاسییەکانی کەرکوک ئەوە بزانن لە دەرەوەی خۆشیان، خەڵکی دیکە هەن دەکرێت هەموو پرس و راوێژ بە یەکتر بکەن و پێیان وانەبێت هەقیقەت بەس لای ئەوانە و لای کەسی دیکە نییە. هەقیقەت لە کۆکردنەوەی هەموو پارچە ئاوێنەکاندایە بۆ بینینی تەواوەتی وێنەکە، دەشێت مەلایەک، نووسەرێک، دوکاندارێک، تەلەبەیەکی زانکۆ، خاتوونێکی ماڵەوە، یان هەر بابایەکی دیکە سەرنجی دروستی لابێت، ئەمە زۆر باشترە لەگوێگرتن لەغەوارەیەک کە رەنگە ئامانجی خەراپی هەبێت.
