دەمارگیری و شۆڤێنیزم، بۆ؟

دڵشاد تاڵەبانی

دیاردەیەک هەیە لای هەموو کۆمەڵگەکانی جیهان، ئەویش بە کەمتر لە خۆیان روانیویانە بۆ کەسانی تر، یان نەتەوەکانی تر.
لای خۆشمان ئەمە هەبووە ئەگەرچی بە درێژایی مێژوو وەک نەتەوە، هەمیشە چاومان لە نەتەوەی سەردەست و داگیرکەر بووە و نەگەیشتووین بەو ئاستەی ئێمە ئەوان بە کەم تەماشا بکەین.
خەڵكی شار گاڵتەی بە خەڵكی خێل و گوندەكان كردووە، ناوچەیەك بە خەڵكی ناوچە یان زاراوەیەكی تر. 
كۆنتر و تا ئێستاش بەشێكی و بە ساویلكە و تا رادەی بێ ئەقڵ لە قەڵەمداوە، ئەوەش لە روانگەیەكی شۆفێنییەوە هاتووە. 
بە كارێكی خراپی دەزانم كوردیش روو بكاتە ئەوە و هەمان ئەوە بەكاربهێنین كە ئەوان بەرامبەرمان بەكاریدەهێنن. ئەوە مانای نییە و سوود ناگەیەنێت.
ئێستا لە سۆشیال میدیاکاندا تاکی كورد  دەبینم، وەك پەرچەكردار ئەوەی ئەوان دەكاتەوە.
 چەند نووسین دەبینم لەسەر نەتەوەكانی دەوروبەر كە تەنها رق و توڕەیی و رەگەزپەرستی پاڵپێوەنەرێتی و هیچ جیاوازی نییە لە هەندێك قسەی شۆڤێنییە رەگەزپەرستەكانی نەتەوەکانی تر.
هەندێک نموونە لەو بێڕێزییانە وەک فارس نەتەوە نین، فارس بەشێکن لە كورد، نەتەوەیەكی دروستكراون. شۆڤێنیەكانی ئەوانیش دەڵێن كوردی زاراوەیەكە لە فارسی، گوایە عەرەب سەدان ساڵی تر ئەمجار دەگەنە مەیمون، نەتەوە نین، زۆری تر لەم جۆڕە قسە بێبەهایانە.
فارس لە چەند وڵات حوكمڕانە، ئێران، ئەفغانستان و چەند دەوڵەتی قەفقاس، عەرەبیش دەیان دەوڵەتی هەیە، هەرچیش بن خاوەنی دەوڵەتی خۆیانن و ئێمەش هیچ.
دەڵێن گوایە تورك نییە یان نەبووە، یاخود توركمەن تورك نین، كە چی لە سەرەتای عەباسی، ئەوان بەكار هێنراون و باڵادەست بوون، خەلیفەكانیان خستۆتە ژێر دەسەڵاتی خۆیانەوە. 
غەزنەویش هەر (غەزی تورك) بووە و لە هیند تا ئاسیای ناوەڕاست و سنووری چین و روسیاش حوكمیان كردووە. عوسمانیی توركیش سەدان ساڵ تا باكووری ئەفریقایان حكومڕانیی كردووە.
هیچ نەتەوەیەک خراپ نییە، بەرپرسە سیاسییەکانیان بۆ بەرژەوەندی و پێگەی خۆیان خراپ بەكاریاندەهێنن. وتە و کردەوەی شۆڤێنیانەی کوردیش، لە لایەن شۆڤێنییەکانی ئەوانەوە دژی كورد بەكاردێتەوە و دەیکەنە هەوێنی دژایەتیکردنی کورد، وێنای ئەوە دەکەن لەبەرچاویان کە كورد هیچی نییە وا دەكات، ئەگەر كیانی هەبێت هەمومان سەردەبڕن. 
هونەر ئەوە نییە گاڵتە بە خەڵك بكەین، بەڵكو بە هەڵوێست و كردەوە خۆمان بەرز دەكەینەوە. 
ئازایەتی ئەوەیە خۆت بسەلمێنیت بۆ خۆت شتێك بكەیت. 

عەرەب، تورك و فارس بە شێوەی
جۆراوجۆر گاڵتەیان بە كورد كردووە

ئێمە کێشەی نەتەوەییمان لەگەڵ سێ نەتەوەی تر لە ناوچەکە هەیە، ئەوان ئێستا لە جیهاندا حسابی زۆریان بۆ دەكرێت، ئێمەش هیچ و هەر لایەكیش دێت گاڵتەمان پێدەكات و كڵاومان دەخاتە سەر و بە دەستی بەتاڵ بەرێمان دەکەن. 
بۆیە پێویستە ئێمە خۆمان بسەلمێنین، كەی یەكمانگرت، گەندەڵی و تاڵانی و خۆخۆری و سەپاندن كۆمەڵگاكەمانی نەتەنیەوە، باری سیاسیشمان پێشكەوت، شانازی بە خۆمانەوە بكەین و گاڵتە بە كەسیش نەكەین.