وتراوە كتێب مامۆستای دڵسۆز و هاوڕێی نزیكی مرۆڤە، بێ بەرامبەر راژەی مێشك و دڵی دەكات، دەبێت لەناخەوە بایەخ بەخوێندنەوەو تێڕوانینی بدەین، بیگرین بەسنگەوە، رێزی لێبگرین.
خوێنەر یان كۆكەرەوە؟
هەڵاوی كتێب و بۆنی گوڵ چونیەكن، كەواتە هەموومان قەرزارباری رێنوێنی ئەوین، لەوانەیە ئەم بابەتەی بەكورتی لێیدەدوێم هەندێك كەس لە نووسەر و خوێنەر و خاوەن بەرهەمەكە، لێمان بكەونە تەقە و نیگەرانی دەربڕین، بڵێن: بۆ رێگری لە خۆشەویستانی خوێندنەوە دەكەیت، ئەم هەندە كتێبەیان چنگ بكەوێت، ئێمە لەوەڵامدا ناڵێین ئەم دیاردە زەقە لەسەداسەد ناپەسەندە، لە هەندێك رووەوە بە رێژەیەكی كەم ئەرێنی تێدا بەدی دەكرێت، ئاخۆ زۆرینەی ئەوانەی بەپیر بانگەوازی كۆڕی پێشكەش و ئیمزای دانەرو دابەشكردنی كتێبەكەیەوە ئامادە دەبن، خوێنەری هەمیشەیین، یان كۆكەرەوەی كتێبن، كە وەریانگرت و رۆیشتنەوە تیایاندا هەیە فڕێی دەدەنە كەلەبەرێكەوە مەگەر بە رێكەوت بچنەوە سەری چاوێكی خێرای پیدابگێڕن، یان دەیدەنەوە بەكەسێكی دی یان دەیبەخشن چونكە پشتیان پێوەی نەیەشاوە. ئەمە ئەوە ناگرێتەو كە هەندێ دەزگای تایبەتی هی حكومی و حزبی و ئەهلی سەرجەمی بەرهەمی نووسەرێكی بەناوبانگ لەچاپ دەدەن، ئەگەر نرخی لەسەر دابنێین لەتوانای بەشێك لە ئەدیبان و خوێنەرانێك نییە هەتا بیكڕن، لەوانەیە گیرفانیان دەرەقەتی كڕینی نەیەت، هەروەها كەسانێك بە رەسمی بۆ ئەو مەبەستە بانگهێشت كراون مافی خۆیانە لە رێوڕەسمی بەخشینەوەدا دیاری خۆیان دەست بكەوێت.
بەخشین بە بێ بەرامبەر
هەروەها نووسەرانێك هەن لەوانەیە پێویستیان بەوەرگرتنی پارەی كتێبەكە نییە بڕیاری دابەشكردنیان داوە، ئەوە پێزانینێكی لەبیرنەكراوە كە ئەو بەرهەمانە بەخۆڕایی بڵاودەكەنەوە، چونكە بەپێویستی سەرشانی خۆیانی دەزانن ئەو راژە بچووكە ئەنجامبدەن كاریان راست بێت.
هەندێك كەس كە كتێب وەردەگرن مەگەر بە دەگمەن بیخوێنەوە، ئەگینا دەیبەخشن، چونكە پشتیان پێوەی نەیەشاوە
خراپ دابەشكردنی كتێب
بێینەوە لەسەر دابەشكردنی كتێبەكە لەناو هۆڵی ئاپۆرەدا، سەرنج دەدەین دیاردەیەكی ناشارستانی دەبینین لەلایەن هەندێك كەسانی نا بەرپرسەوە كە وترا فەرموون هەركەسە بەشە كتێبی خۆی دەستبداتێ و هەڵیبگرێت، بە شەپۆل خەڵكەكە بە پاڵەپەستۆی كورد واتەنی: بووە بە سمڕسمڕێ كلكی كەری تیا بپچڕێ، هەركەسە بۆ خۆی هەڵمەت دەبات دەورەیەكی دەستبكەوێت یان كتێبێك پتری چنگ بداتێ، ئاوا دیمەنە دزێوەكە دەكەوێتە بەرچاوان، نازانین وشەی تەریقبوونەوە لەوكاتەدا بۆ ئەوەندە كڵۆڵە و نایەتەزمان بڵێ: كوڕە عەیبە بزانن، دان بەخۆتاندا بگرن هەر بەرتان دەكەوێت، خۆزگە ئەم بیركردنەوانە سنوورێكیان بۆ دابنرایە.
ئێمە لێرەدا دەڵێین: ئەوەی لەم دابەشكردنە خۆڕاییە چاكترە بۆ یارمەتی خوێنەر ئەوەیە خاوەن بەرهەم تیراژی زۆرترو نرخی كەمتر لەسەر بڵاوكراوەكەی دابنێت، ئەم هەنگاوە یارمەتیدانێكی دروستە بۆ كڕیاری كتێب و دیسان بازاڕ گەرمییەكە بۆ سەرفبوونی، ئینجا بوارەكە تاقیدەبێتەوە كێ دەتوانێ لێی بدات و كێ دۆشداماوە؟ كێ كتێبكڕەو خوێنەری راستەقینەیە؟ كێ باری ژیانیشی ئاساییە، كەچی (دەستنوقاوە) پێی كوفرە و ناڕەوایە بڕێكی كەم پارە بداتە كتێبە باشە تازە دەرچووەكە، سەرنج دەدەین هەرگیز توخنی ناكەوێت، بەڵام كە بەلاش بوو ئەوە سەری پێوەنییە هەڵپەی خێرای بۆ دەكات، (بەلاشە بۆ سحەت باشە).
خاڵێكی تر هەیە مەرج نییە هەموو كتێبێكی كۆڕ بۆ گیراو و خۆڕایی مەرجە بنەڕەتییەكانی سەركەوتووی تێدابێت، نووسەرەكەی لەوە حاڵییە ئەگەر بیخاتە بازاڕی كتێبخانەوە لەوانەیە تاك و تەرای لێبفرۆشێت، بۆیە ئەم بیرۆكەیەی هەڵبژاردوە، گرنگ مانەوەی ناوەكەیەتی وەك نووسەرو شاعیرو چیرۆكنووس و وتاربێژ و بوارەكانی دی... تاد.
بەهەرحاڵ دابەشكردنەكە نەرێنی لە ئەرێنی زیاترە، بۆیە پێمان وایە نرخی كتێب بەمشێوەیە بخرێتەڕوو، كاڵبوونەوە و بێنازی بەخۆیەوە دەبینێت.
كتێب هاوڕێی نزیكی مرۆڤە
