بەشداربیت لە كاروانێكی مەزن

09:58 - 2024-06-01
ستران عەبدوڵڵا
121 خوێندراوەتەوە

حزبایەتی و کۆڕ و كۆبوونەوەی سیاسییەكان، كردە و كۆششی دەستە جەمعین، گەردیلە وزە و توانای جیاجیای پەرت و كەرتن کە  لە كردەی پێكەوەیی و رێڕەوی گشتی لەجیاتی ئەوەی پێكدا بدەن و بەریەك بكەون دەبنە تابلۆیەكی گشتگیریی، ئەگەر رەنگی جیاش بن و لە تەنی جیاوازیش پێكهاتبن، لە جووڵەی گشتی ئاڕاستەكراوی یەك ئامانجدا دەبنە هێزی تەواوكار.

چەند خۆشە كە بەشێك بیت  لە بزووتنەوەیەكی مەزن، بزووتنەوەی رزگاریخوازی گەلی كوردستان، بەشێك بیت لە كاروانێكی جاویدانی نزیك بە پەنجا ساڵە

کۆیایەتی و خۆیایەتی
لەبەر ئەوەیە كاروانی مەزن ئەگەر هی ئەندێشەی ئازادیخواز و تەنانەت هی بیری لیبراڵ و تاكەكەسیش بن، وەختێ پێكەوەن خەسڵەتی تاكێتی  لە دەستدەدەن و خەسڵەتی سۆشیالیست و كۆیی و کۆکاری لە خۆدەگرن، تەنانەت (كۆیایەتی و خۆیایەتی) ،بە ئیدیۆمە كوردییەكە، دەبنە گشتی و كوردستانیی و نیشتمانی.

ئەمە (یەكێتی) و (نیشتمانی) و (كوردستان)یە.
نووسەر بیت یان پێشمەرگە، رێكخستن بیت یان هەڵسوڕاو، كادری پیشەیی و دیموكراتی بیت یان شاعیر و ئەدیب و فەیلەسوف، لە تابلۆ گشتییەكەدا بەشێكی لە كاروانێكی مەزن. دیوانی شیعر و غەزەلیشت بە جیا بێت پێش دیوان لە گۆڤار و بڵاوکراوەی گشتیدا بەرهەمی تۆ و هی تر و هی ئێمە پێکەوە لە ستایل و ستاتیکایەکی جوان و دەستەجەمعیدا پەخش و پەرێشان دەبن.
تەنانەت یاداشت و بیرەوەریش هەقە بچنە خزمەتی مێژووە گشتییەکەوە دەنا دەبنە نامەی وەداع و دەستلێکبەردان. 

شانازیی گەورە یەکێتی بوونە
یەکێتی و کوردایەتی و بزووتنەوەی گشتی وان. قەینا كەمێك بە خۆت و بە فیكر و بە خەیاڵی بەربڵاوی تایبەتمەندی خۆتەوە بنازە، بەڵام قەت شانازییە گەورەكەت لەبیرنەچێت. 
 چەند خۆشە كە بەشێك بیت  لە بزوتنەوەیەكی مەزن، بزووتنەوەی رزگاریخوازی گەلی كوردستان، بەشێك بیت لە كاروانێكی جاویدانی نزیك بە پەنجا ساڵە، كاروانی یەكێتیی نیشتمانیی كوردستان بە سەرۆكایەتی مام جەلال و رێبازەكەی، بە فەرماندە و قەڵەممەندە و پێشمەرگە و ئەندام و لایەنگیرییەوە، لەم مێژووەدا تۆ بەشێکی لە رەوتێکی شەپۆڵ و قوڵپدەری دروستکراو لە گۆشت و خوێن، تۆی بەرێز رەنج و مەرەکەب و ئارەقت بۆ رشتووە و هی تریش خوێن و فرمێسک. 
كۆی دیمەنەكە وایە و كۆی كۆششەكە هەر دەبێ وا بنووسرێتەوە، دەنا نامۆیی دەتكوژێ، لەبەر ئەمەشە ئەدەبیاتی چەپ پێش ئەوەی دەست بە جووڵەی شۆڕشگێڕی و كۆمەڵایەتی بكات، ئەم نامۆیی و ئیغترابەی بە نووسین و تێفکرین ئەفرۆزە کرد و لەقاودا، چونکە رەوتی تەنیا و نامۆ   بیابانێكی وەحشتناكە، ئەگەر بەتەنیا بیبڕی و بیپێوی گورگ دەتخوا، پێشئەوەی بە زمانی یەكێتیانە و پێکەوەیی بڵێی (گورگمان دی و نەترساین).
بێگومان لە كاروانی مەزندا ئەگەر سۆپەرمان یان سۆپەرهومەنیش  پێویست بێت هەر دەبێ  لەپێشدا دەیان و سەدان (مان) و (هومەن) لەكایەدا بن تا تۆ (سۆپەر) و (قەڵغان)یان بیت.
ئەوانەی نامۆن و لەناو كاروانی مەزندا هەست بە غوربەت دەكەن یان  سەودای كەسییان لە كەللـەدایە، یان رەنگە پێشیانوابێ كاروان وێڵە و کاتی بەشکردنی غەنیمەی دەوڵەتی سەلاجیقەی رۆم و سەلاجیقەی شام هاتووە و دەبێ بەشێکی تاڵانی لێ باربکەیت! نەخێر برام کاروانەکە ماوە و مەزنە، بچۆرەوە ناوی تا رێڕەوەكەی، ئەگەر لایداوە، راست بكرێتەوە.
قەینا تایبەتمەندبە، بەڵام لەناو گشتێکی فراواندا، تەنانەت لە دونیای ئەمڕۆشدا بۆیە كێشەكان چارەسەر نابن، چونكە سیاسەت و بزووتنەوە لە ئەسڵدا كاری دەستەجەمعین، كەچی سۆپەرەكان كاری پێکەوەیی و جەماعیان پێناكرێت، بۆیە هەروا پێكوتەن، هەروا خولاوەن بەدەوری بازنەی بەتاڵدا. 
هەڤاڵی من كوردایەتی و دیموكراتی و حزبایەتی هیچ نین جگە لەوەی گرنگە بەشێك بیت لە كاروانێكی مەزن، لە ناو كاروانێک بیت بە رێبەرایەتی  مام جەلال، لە شۆڕشی نوێ و لە بزووتنەوەی نوێ و  لە كوردستانی نوێ، لەگەڵ مامە ریشە بیت، لە شەڕی حەمك و لە نەبەردی قەیوان -ماوەت و هتد...

ئەمەیە چیرۆكی پێكەوەیی، ئەمەیە داستانی نزیك بە پەنجا ساڵەی یەكێتیی نیشتمانیی كوردستان.

وتارەکانی نوسەر