هۆشدارییان بدەنێ، سەرکۆنەیان مەکەن

بۆ پاراستنی سەروەریی وڵات، دەبێت لە کاتی داگیرکردنی بستێکی خاکی وڵاتەکەت، خێرا دوو بست لە خاکی داگیرکەرەکە دەستبەسەردا بگریت، ئینجا بچیتە دانوستانەوە لەگەڵی، ئەوکات بۆت دەبێتە خاڵی بەهێز.
هاتنی تورکیا بۆ ناو خاکی هەرێم، دەمێکە و دەگەڕێتەوە بۆ کاتی دوای نەمانی رژێمی بەعس کە 21 ساڵ لەمەوبەر بووە، دروستبوونی ئەو بۆشاییە لە هەرێم و هاتنەسەری بەرژەوەندییە حزبی و کەسییەکان، وایکردووە کە پێگەی تورکیا لە ناوچەکانی ژێر دەسەڵاتی پ.د.ک بەهێز و فراوان بێت.
حکومەتی فیدراڵی لە بەغدا زانیاریی لەسەر ئەمە هەبووە، بەڵام رەنگە بەرامبەر گۆڕینەوەی بە شتێکی تر لێی بێدەنگ بووبێت یان دەستی بەچاوییەوە گرتبێت تا خۆی وانیشان بدات کە نەیدیوە.
داگیرکاریی بە هەنگاوی لەسەرخۆ
ئەم داگیرکارییە لەسەرخۆ و درێژخایەنە لەم چەند رۆژەی رابردوودا تەقییەوە  و کەوتە بەر چاو و گوێی هەموان، بەجۆرێک کە دەیان گرتە ڤیدیۆیی هاتنی هێزەکانی تورکیا بە کۆپتەر و تانک و زرێپۆشەوە لە تۆڕە کۆمەڵایەتییەکان بڵاوبۆتەوە، هێشتاش وەزیری دەرەوەی عیراق بە مەترسیی دانانێت و سنوورداری دەکات، گوایە بەوجۆرە نییە کە باسی لێوە دەکرێت.
دەربڕینی ناڕەزایی ئەنجومەنی وەزیرانی حکومەتی فیدراڵی، تەنها بۆ رازیکردنی دەنگە دژەکانی هاتنی تورکیایە کە لەشەقامی عیراقی بەرز بۆتەوە، چونکە جگە لەمە زۆر لایەنی سیاسی، بێدەنگیی عیراقیان بەلاوە سەرشۆڕی و قبووڵکردنی بەزاندنی سەروەریی عیراقە. 
دەبوو زۆر لە ئێستا پێشتر و زووتر، حکومەتی عیراق ناڕەزایی دەرببڕیبایە و بەتوندی داوای وەستان و کشانەوەی ئەو هێزەی بکردایە کە لە پێشێلکاریی و بەزاندنی سنوور و شکاندنی یاسا نێودەوڵەتییەکان زیاتر ناکرێت ناوی دیکەی لێبنرێت.
وەفدەکەیان بناردایە بۆ ئەنقەرە بۆ پێدانی هۆشداری
دەبوا ئەو وەفدە ئەمنییەی بە سەرۆکایەتی قاسم ئەلئەعرەجی ناردوویانە بۆ هەولێر تا لە نزیکەوە بزانێت چی روویداوە، بیان ناردایە بۆ ئەنقەرە بە کۆمەڵێک هۆشدارییەوە، ئەوان دەزانن هاتنەناوەوەی تورکیا بۆ دهۆک و دەوروبەری، راستییە و تەنها قسەی میدیاکان نییە، خۆیان دەزانن  کە چۆن لەگەڵ ئەنقەرە رێکەوتن و چرای سەوزیان داوە پێیان کە بێن، بەڵام ئەم جموجۆڵانە هیچیان بۆ راگرتنی یان دەرکردنی ئەو سوپایە نییە، بەڵکو بۆ چۆنێتیی جێبەجێکردنی پیلانە پێشوەختەکەیە کە لە هاتنی سەرۆکی تورکیاوە تا وەزیری دەرەوە و بەرگرییەکەیانەوە دەستی پێکرد و دارێژرا.

وا پێویست بوو، ئەو وەفدە ئەمنییەی بە سەرۆکایەتی قاسم ئەلئەعرەجی ناردوویانە بۆ هەولێر تا لە نزیکەوە بزانێت چی روویداوە، بیان ناردایە بۆ ئەنقەرە بە کۆمەڵێک هۆشدارییەوە

لاوازیی هەڵوێستی حکومەتی فیدراڵی لەوەدایە کە دەبینێت بەبەرچاوییەوە نەک بستێک، بەڵکو سەدان هێکتار زەوی وڵات داگیرکراوە، بەڵام خۆی لێبێدەنگ دەکات و ناپرسێت دەیان کۆپتەر چی دەکەن بەسەر ئاسمانی ئامێدییەوە؟ 
ناپرسێت بۆچی ئەو سوپایە شوێنێکیان تەلبەند کردووە و لەسەریان نووسیوە قەدەغەیە هاتنەناوەوە بۆ ناو خاکی تورکیا، ئەگەرچی جێگەکە خاکی عیراقە، لەمە ئیهانەکردن زیاتر چییە؟
دەبێت حکومەتی فیدراڵی وەک هەنگاوی یەکەم، باڵیۆزی تورکیا بانگ بکات و هۆشداریی بداتێ، لەگەڵیدا لای ئەنجومەنی ئاسایشی نێودەوڵەتی، سكاڵا تۆمار بکات، لەگەڵیشیدا جموجۆڵێکی سەربازیی بکات لەو ناوچانەی کە سوپای تورکیای لێیە.
ئاخر بۆچی ناپرسن، تورکیا چیداوە لە شنگال؟ ئەوێ کەسەر بە عیراقە و چارەسەری کێشەکانیان پەیوەستە بە حکومەتی خۆجێی نەینەواوە؟
هەموو ئەو بیانووانەی تورکیا هەیەتی، دەکرێت لەلایەن حکومەتی فیدراڵییەوە بەجۆرێک مامەڵەی لەگەڵ بکرێت کە لەبەرژەوەندیی عیراقیش هەنگاو بنرێت، نەک هەر ملکەچی هەڕەشەکانی تورکیا بن لە گرتنەوەی ئاوی دیجلە و فورات، لە رێی بەکارهێنانی یاسا نێودەوڵەتییەکانی سەبارەت بە ئاوی هاوبەشی نێوان وڵاتان.
پێدەچێت لاوازیی هەڵوێستی حکومەتی فیدراڵی، هاوکاریکردنی سوپای تورکیا لەلایەن پ.د.ک وە وایکردبێت کە دەستیان بەسترا بێت لەوەی کاتێک ئەمان چاوساغیان بن، ئیتر چۆن دەتوانن ئەوان رێگرییان لێ بکەن و رایانبگرن؟ چونکە هاتنی سوپای فیداڵی لە بەغداوە بەرەو هەرێم، دەبێت لەسەر داوای حکومەتی هەرێم خۆی بێت، بە پێی دەستوور.
ناڕەزاییەکانمان بە هەند وەرناگرن
زۆرێک لە سیاسییەکانی بەشدار لەناو حکومەتی فیدراڵیدا، پێیان وایە کە حکومەتی هەرێم(بەتایبەتی پ.د.ک) هێنەری ئەو سوپایەیە، ئیتر چۆن داواکانی ئێمە بە هەند وەردەگرن کە دەڵێین نابێت بەغدا بێدەنگ بێت، ئەوان دەڵێن شکاندنی ئەو سەروەرییە لەلایەن تورکیاوە بە هاوکاریی ئەو حزبەیە لە خودی هەرێم، بەمەش جارێکی تر دەمانبەنەوە بۆ پەرتەوازەیی نێو ماڵی کورد، لەم بەشەی کوردستان، ئیتر بۆچی گلەیی لە نەیارانمان بکەین؟ کە کورد خۆی فەرشی سووریان بۆ رابخات و بە کۆڵوانەی زەردەوە پێشیان بکەوێت؟