ئارام عه‌لی عه‌زیز
لە وتارێكی هۆلیۆدیدا، نەتانیاهو لەبەردەم گۆنگرێسی ئەمریكادا، كە بە (گەورەترین دیموكراسی!)ی ناوبرد، پاڵەوانێتیی سوپاكەی لە قەتڵوعامكردنی ژن و منداڵی غەززەدا نمایش كرد. ئەوانیش 76جار چەپڵەبارانیان كرد و 52 جاریش بۆی هەستانە سەرپێ، وەكو پشتیوانییەك بۆ درێژەپێدەری كەلتوری كاوبۆی، كە لە رۆژی دامەزراندنییەوە تا ئەمڕۆ زیاتر لە 99 جەنگی بەرپاكردووە و بە سەدان ملیۆن مەدەنیی قەتڵوعام كردووە.
نەتانیاهو بڕیارەكانی دادگای تاوانە نێودەوڵەتییەكانی بە هەڵبەستراو و قەتڵوعامی ژنان و منداڵانی غەززەی بە درۆ و دەلەسە وەسفكرد و خۆپیشاندەرانی بەردەم كۆنگرێسی بە لایەنگرانی ئێران و ناڕەزایی خوێندكارانی ئەمریكا و جیهانیشی بە ئەنتی سامیزم و بە لایەنگرانی بەربەرییەت لەقەڵەم دا، لە بەرامبەردا ئیسرائیلیشی بە مێرگی دیموكراسی لە دڵی خۆرهەڵاتی ناوەڕاست و ئەمریكایشی بە هێزی خێرخواز و رووناكیی و مەشخەڵی ئازادی وەسف كرد!
نەتانیاهو پێیوایە «جیهان بە چركەساتێكی چارەنووسساز و ئەوانیش بە دووڕیانێكی مێژوویی یەكلاكەرەوەدا تێپەڕدەبن
نەتانیاهو لە وتارەكەیدا 21 جار ناوی ئێرانی هێنا و كردی بە (كراسەكەی عوسمان) و ئیسرائیلیشی «بە ئالەتی ئەمریكا» وەسفكرد و داوای لە ئیدارەی ئەمریكا كرد چەك و كەرەستەی جەنگیی پێشكەوتوویان پێبدات تا چەندی زووە هەمووان پێكەوە حەماس و حزبوڵڵا تێكبشكێنن. راشكاوانەش بە زمانێكی ئاگاداركردنەوە بە كۆنگرێسی ئەمریكای وت: «ئێستا ئێمە، ئێوە لە ئێران و ئەتۆمییەكەی دەپارێزین، ئەگەر ئیسرائیلیش پەلبەست بكرێت، ئەوا ئەمریكا ئامانجی داهاتوو دەبێت».
نەتانیاهو پێیوایە «جیهان بە چركەساتێكی چارەنووسساز و ئەوانیش بە دووڕیانێكی مێژوویی یەكلاكەرەوەدا تێپەڕدەبن لە مێژووی ململانێی نێوان خێرو شەڕدا»، لەبەرئەوە داوای لە ئەمریكا كرد چۆن هاوپەیمانی لەگەڵ ئەوروپا دژبە روسیا دروستكردووە، بەو جۆرەش ئەمریكا و ئیسرائیل هاوپەیمانییەك دژ بە ئێران لە خۆرهەڵاتی ناوەڕاستدا پێكبهێنن، بەتایبەتی لەگەڵ دەوڵەتانی (تەتبیع) بەناوی «هاوپەیمانیی ئەبراهام»، بەمەش نەتانیاهو نەك پلانی نوێ، بەڵكو بە ئیقلیمیكردنی جەنگەكەی ئاشكراكرد، كە ئەگەری هەیە لە رۆژانی داهاتوودا لە هەواڵەكاندا بیبینین.
سەرۆك وەزیرانی ئیسرائیل لە وتارەكەیدا زایۆنیزمی لە ژێر ناوی ئیسرائیلدا شاردەوە و ئیدیعای خاوەندارێتی خاكی بەنی ئیسرائیل و ئیسرائیلی پیرۆزی كرد، كە حەزرەتی ئیبراهیم و كوڕەكانی تیایدا ژیاون و حەزرەتی داود و سولەیمانیش حوكمڕانیان تێدا كردووە، بێ ئاگا لەوەی كە شوكر هۆشیارە مەحوی و تێدەگا كە ئەمڕۆ نە قودس ئورشەلیمە و نە جوگرافیای تەوراتیش بەپێی چەندین لێكۆڵێنەوەی ئاركیۆلۆجیی (د. ئیسرائیل فنكلشتاین) و لێكۆڵینەوەی فیلۆلۆجیی، جوگرافیای راستەقینەی تەوراتە، نە شێرەكەش كە نەتانیاهو لە وتارەكەیدا داوای هەستانی دەكات، هی ئەوانە، بەڵكو شێرەكەی بابلی عیراقە و دەمێكە هەستاوەتەوە و لە وشە و دەستەواژە ئاینییە بەكارهاتووەكانی وتارەكەیشی تێدەگەین، كە ئەوانیش ئاگایان لە هەستانەوەی هەیە و دەشزانن دەوڵەتەكەیان لە دواساتەكانیدا دەژی «إن غدا لناظره قریب».
