كـه‌ژاڵ ئه‌حمه‌د
كورد دەڵێت: قسە بەستەزمانە، هەموو كەسێ پێی دەوێرێت! ئەمە لەو سۆنگەیەوە وتراوە، كە لەڕێی قسەوە مرۆڤ دەتوانێ ئیدیعای خەسڵەتگەلێك بكات بەهیچ جۆرێك تێیدا بوونی نییە یان رەخنە لە كەسانێك بگرێت لەسەر هەڵوێست و هەنگاوێك كە بۆ خۆیشی پێشتر بەو هەڵوێست و هەنگاوەدا تێپەڕیووە. لەگەڵ ئەوەیشدا قسە بە وتراو و نووسراوییەوە، ئەو هێزە نەرم و كاریگەرەیە كە دەتوانێ خەڵكی بخاتە ژێر كاریگەریی و ركێفی خۆیەوە، بەمەیش (قسە) ئەو بەستەزمانەی هەموو كەس پێی دەوێرێت، هێزی ئەوەی هەیە بە هەموو كەس بوێرێت و بەرەو لای خۆی بەكێشیان بكات. بە بۆچوونی من ئەو دوو ناوەندەی زۆرترین قسەیان تێدا بەكاردەبرێت ، گفتوگۆی سیاسیی و ئایدۆلۆژین. لە گفتوگۆی سیاسیدا ئەگەر تێبینیتان كردبێت، ئەوانەی بە وەهمی ناڕازیی بوون خۆڵدەكەنە چاوی خەڵكەوە لە هەموو كەس زیاتر قسەدەكەن، گوێگر بە رێگەی پێچاوپێچی باس و خواسەكاندا دەبەن، لە شێوەی گشتیاندا ئاڵۆز دەردەكەون لەكاتێكدا تێگەیشتن لێیان زۆر ئاسانە، ئەوان موعارەزەن بۆئەوەی خێرەومەندێك بیانگەیەنێتە دەسەڵات، ئەگەر ئەو دەستەڵاتە هەر ئەوەیش بێت كە شە و و رۆژ رەخنەیان لێ گرتبێت و قسەی ناشیرینیان پێ وتبێت. نووسەری وا هەیە لە وتارێكدا سەركۆنەی ئەوانە دەكات كە تا دوێنێ لەبەرەی ناڕازییەكاندا بوون و ئەمڕۆ لەگەڵ دەسەڵاتدان، لەكاتێكدا خۆی لەبیری چۆتەوە لەڕابردوودا بەرپرسی كەناڵێكی دەسەڵات بووە و لە ئێستادا ناڕازییە! ئازیزان ئەم بەڕێزانە هەڵە لە ژیان تێگەیشتوون، هیچ عەیبەیەك لە بابەتی لەگەڵ دەسەڵات بوون و ناڕازیی بووندا نییە، بەڵام بەومەرجەی بزانیین كەی لەگەڵ دەسەڵات و لەكەیدا دژ بە كێ دەبین. عەیبە گەورەكە لە نەزانینی هەڵبژاردنی لایەنەكەماندایە لە كاتی گونجاودا، بۆ نموونە لەسەردەمی بەعسدا دەبووایە دژ و ناڕازیی بین، لەم سەردەمەدا دەبێت لەگەڵ حوكمی كورد و بەرەنگاربوونەوەی ئاڵنگارییەكاندا بین و خۆمان ئامادەبكەین بۆ هەڵبژاردنێكی بێگەرد و سنگفراوان، هەڵبژاردنی ئایدیاكەمان و ئەو هێزە نیشتمانی و نەتەوەیی و راستگۆیەی باوەڕ و ئومێدمان پێیەتی زۆر گرنگە، لەبەرئەوەی مرۆڤی بێ بیروباوەڕ و بەرژەوەندیی و خودپەرست، ئەوە شتومەكە مرۆڤ نییە. هەر كورد وتوویەتی: قسە هەزارە و دووانی بەكارە، كەواتە بۆچی كات بەفیڕۆ بدەین و گوێ لە هەزار قسەی بێ بەها بگرین، مادام دوو قسە بەكارە كە دەزانین چییە؟!
