د.عەدالەت عەبدوڵڵا
ئاساییە لە هەنگاوی یەكەمدا، پارێزگاری كەركوك، دڵنیایی پاراستنی پێگەو پۆستەكان بەو هێزە سیاسییانە بدات، كە كورسییان لە ئەنجوومەنی پارێزگاكەدا هەیەو هێشتا بڕیاری بەشدارییان لەحكومەتی لۆكاڵیدا نەداوە. لەوەش ئاساییتر دووپاتكردنەوەی نوێنەرایەتیكردنی هەموو پێكهاتەی خەڵكی پارێزگاكەیە نەك تەنها ئەوانەی كە ئیدارەی كەركوكیان پێكهێناوە.
لەدەرەوەی گوتار Discourse، ئەوەی كە هەڵوێستێكی ستراتیژییە، بریتییە لە بڕیاردان لە ئەولەوییەتی جوگرافیای خزمەتكردن لە پارێزگاكەدا. راستە، لەسایەی پارێزگاری پێشوودا دۆخی خزمەتگوزاری و ئاوەدانی لە گەڕەكە كوردییەكاندا خراپترە، بەڵام بەدەستهێنانی متمانەی پێكهاتەكانی تری پارێزگاكە، لەئێستادا، دەسكەوتێكی مەعنەویی گرنگە، گرەوێكە بۆ راستكردنەوەی ئەو وێنە شێواوەی كە چەند ساڵێكە، بەتایبەتی لەكاتی كەمپینی هەڵبژاردندا، لەلایەن هەندێ هێزی سیاسیی توركمان و عەرەبەوە كێشراوە لەبارەی مەترسییەكانی ئەگەری گەڕانەوەی كورد وەك دەسەڵاتی نمرە یەك لە پارێزگاكەدا.
ئەم ستراتیژە، كە بریتییە لە پێشخستنی پێشكەشكردنی خزمەتگوزاری لە گەڕەكە توركمان و عەرەبەكاندا، دەلالەتی سیاسی و ئیداریی زۆری دەبێت، بەتایبەت ئەگەر لە ماسمیدیاوەو لەسەر ئاستی عیراق و هەرێمایەتی، بەشێوەیەكی پرۆفیشناڵ، ماركێتینگی سیاسیی بۆ بكرێت. هاوكات ئیحراجییەكی سیاسیی گەورەش دەبێت بۆ نوێنەرانی ئەو بەشە لە توركمان و عەرەبی شارەكە كە بوونی پارێزگارێكی كوردیان لێكرابووە دێوەزمەو كۆتایی دنیا!. هەر بە تەنها هەڵمەتی دوو هەفتەی رابردووی پاككردنەوەی شارەكە، كە گەیشتۆتە كۆكردنەوەی زیاتر لە 23 هەزار تۆن خۆڵ و خاشاك و زبڵ و دانانی سەدان حاوییەی گەورەی زبڵدان لە گەڕەكە جیاجیاكانی كەركوكدا، بەسە بۆ سەلماندنی دەستپێكی ئەو ئیحراجكردنە. ئێستا بێشك هاووڵاتییەكی زۆری بەویژدان لە شارەكەدا هەن كە دەپرسن: شارێك خەمخۆری راستەقینەی هەبوایە، چۆن ئاوها لە زبڵ و خاشاكدا نوقم دەبوو؟ هەر لە ئێستاشەوە ئێمە چەندین گرتەی ڤیدیۆیی یوزەرە توركمان و عەرەبەكانی ناو تۆڕە كۆمەڵایەتییەكان دەبینین كە ستایشی نۆبەرەی كارەكانی پارێزگاری نوێ دەكەن.
كەواتە، راسپاردەی عەقڵانی بۆ پارێزگارو تیمی كوردی ئەوەیە، ئەو ستراتیژە لەبواری جیاجیادا بگرنەبەر، كەم و زۆر نەكەونە ژێر كاریگەریی بیركردنەوەی تەسكی نەتەوەییەوە. ئەمڕۆ سەلماندنی ئەوەی پارێزگارێكی دادپەروەر هەر لە كورد دێت، هەر خۆی باشترین كوردایەتییە. دروستكردنی قەناعەت لای ئەوانیتر كە هیچ جیاكارییەكی رەگەزی لە شارەكەدا نییە بەسە بۆ ئەوەی سبەی رۆژ بەشە توركمان و عەرەبە ناڕازییەكەی ئێستا هەر لەژێر فشاری ویژدانی لایەنگرانی خزمەتكراویاندا لەسایەی پارێزگارێكی كورد، زیاترو زۆرتر ئیحراج ببن. بە رستەیەك، كوردایەتی پشتگوێخستنی ئەوانیتر نییە، بەڵكو راكێشانی ژیرانەیانە بۆ ناو بازنەی هاوبەشیكردن، هەستكردن بە دڵنیایی، هەڵگرتنی بەرپرسیارێتی، چێژی ئاشتی و پێكەوەژیان، باوەڕهێنان بەوەی هەمیشە كردەی بكەر پێوەرە، نەك ناسنامە نەتەوەییەكەی.
