د.عه‌داله‌ت عه‌بدوڵڵا
ئەوەی دەیبینین، بافڵ تاڵەبانی-یە، هەمان كاراكتەری ناو ئاپۆرای بانگەشەی هەڵبژاردنی ئەنجوومەنی پارێزگای كەركوك، كە بە شێوەیەكی ئەفسانەیی و شۆكهێنەر گەیاندییە سەركەوتنی گەورەی حزبەكەی و كورد لە كەركوكدا و دانانی پارێزگارێكی كوردو یەكێتیش. ئەوەی دوێنێش کە جارێكی تر بەجۆش و هێزەوە بینیمانەوە، هەمان كاراكتەرە، بەڵام ئەمجارەیان لە مەلعەبەكەی سلێمانی و بۆ هەڵبژاردنی خولێكی نوێی پەرلەمانی كوردستان. وەك بینرا -ش هەموو جارێك وەك بكەرێكی بە ئیرادە، بزوێنەرو كۆكەرەوە، مژدەدەرو یەكلاكەرەوە، دێتەوە سەر شانۆ بۆ ئەوەی ئەوە بهێنێتەدی كە لە دەرەوەی چاوەڕوانییە، یان لە بۆشایی سیستەمی بیركردنەوەدایە.
ئەمە واقعە Reality، بگرە فاكت -ە، تەنانەت ئەگەر بۆ هەندێك هێشتا وەك دیفاكتۆش هەرس نەكرابێت!. لەوانەش زیاتر، ئەمە زادەی مافی حزبێكی سیاسیی دیاریكراوە كە كێ دەكاتە سەركردەی نمرە یەك و سەرۆكی خۆی. رێزگرتن لەم مافە، سەلماندنی وەك خۆی، سادەترین ئەركە لە ئەستۆی هەر پارتێكی تری سیاسی كە باوەڕی بە لانیكەمی فرەیی و ئازادییە سیاسییەكان هەبێت.
لە ئاست ئەم رووداوەدا، بەداخەوە، هەر لە سەرەتاوە، باڵێكی ناواقعیی ناو پارتی دیموكراتی كوردستان كەوتنە هەڵوێستێكی گرژو نائاساییەوە كە ماوەیەكە، یەك بە دوای یەك، باجی دەدەن. لەگەڵ ئەم فاكت و دیفاكتۆ و مافەدا، بەتایبەتی دوای ئەوەی كە تێگەیشتن سەرۆكی نوێی ئەم هێزە خەون و ئیرادەی هەیەو دەیەوێت حزبەكەی خۆی رێكبخاتەوەو سەربەخۆیی بڕیاری سیاسیی بپارێزێت، یان لانیكەم بە شوێنكەوتەی پارتی تۆمەتبار نەكرێت، كەوتنە هەڵمەتی میدیایی توندو دڵڕەقانە لەدژی سەرۆكی یەكێتی، كار گەیشتە ئەوەی لە میدیای رەسمیشیانەوە، گوزارشتی لێبكەن.
ئەو باڵەی پارتی، لەم هەڵوێستەدا، لە پێگەی جۆرێك لە لوتبەرزیی سیاسییەوە مامەڵەیان لەگەڵ ئەم پەرەسەندنەدا كرد. بەبێ سوودوەرگرتن لە رابردوو، گرەویان هەر گرەوێكی درشت و تەقلیدی بوو كە سەرنەگرتنی هیچ دەرفەتێكە بۆ هەستانەوەی یەكێتی. كاتێك تاڵەبانی هەموو هەوڵێكیدا بۆ ئەوەی وەك هێزێكی دۆست بمێنێتەوە لەگەڵ پارتیدا و سەیركردنی سەرۆكەكەیشی وەك سەركردەیەكی رێزلێگیراو، هات و چەندینجار دەستپێشخەری كردو سەردانی كردن، وەك سەركردەیەكی بەقەدرو ئەمەكدار، لە پێگەی هاوتایی سیاسییەوە مامەڵەی نەكرد، نەهات بیكات بە مەرج كە هەر جارێك سەردانی پیرمام كرا كەسی نمرە یەكی پارتیش بێتە دەباشان. ئەم سیم و جیمەی خستە لاوە، مام جەلال ئاسا لە سایكۆلۆژیای لایەنی بەرامبەر تێدەگات و لەبەر خراپیی دۆخی وڵات و هاووڵاتیان نەیكرد بە كێشە!، دەیانجار لەگەڵ مەكتەبی سیاسیی پارتیدا كۆبووەوە، هەوڵی زۆریدا بە گفتوگۆی برایانە جیاوازی و ناڕێكییەكان، كێشەو ناكۆكییەكان، گرفتەكانی حوكمڕانی و نادادپەروەری، سیاسەتی هەڵەی هەرێم لەگەڵ بەغداو قووتی خەڵك، پرسی هەڵبژاردن و مووچەی فەرمانبەران چارەسەر بكرێت، نەهاتنە پێشەوە. لەمەدا، بەداخەوە ئەو ئاراستەیەی(پ.د.ك) شەڕی شكاندنی ئیرادەیان لەگەڵ كەسێكدا كرد كە هێشتا نەیانناسیبوو، بۆیە ئاوها ئیتر هەموو شتێك گۆڕا، كورد وتەنی تیر لە كەوان دەرچوو!.
ئیتر تاڵەبانی وەك لە كۆنگرەیەكی رۆژنامەنووسیدا بە دەنگی بەرزو لەناو ماڵی پارتیدا، جاڕیدا: «ئیتر یەكێتی لە ئەمڕۆ بەدواوە وا بە ئوسكوتی نامێنێت، هەرچی رووبدات وەكو خۆی جواب دەدرێتەوە، چونكە، خۆی وتەنی: یەكێتی مێژووە، خوێنی شەهیدە، هێزە». بۆیە بە راستی ئەو دۆخەش لە ململانێ و پەیوەندیی نائاسایی ئێستای نێوان یەكێتی و پارتی، نە پەیوەندیی بە هەڵبژاردنەوە هەیە وەك هەندێ نەخوێندەواری سیاسی دەیڵێن، نە پرسێكی كاتییش، بەڵكو دەگەڕێتەوە بۆ ئەوەی باڵێكی پارتی نایەوێت واقعی بێت و هێشتا لە رابردوودا دەژی، كەی بەئاگا هاتەوە و بافڵ تاڵەبانی و قۆناغی نوێی یەكێتی قبووڵكرد، ئەوا ئەگەری گفتوگۆ و رێككەوتنیش لەسەر حوكمڕانییەكی باشتر زیاد دەكات، خۆ ئەگەر لەسەر ئەم فیزە سیاسییە زیانبەخشە بەردەوام بێت، ئەوا ململانێكان و سوپرایزە سیاسییەكانیش بۆ پارتی، زۆرتر دەبن!.
[email protected]
