تەها عەبدوڵڵا
دەكرێ ئەو بازاڕە بەو جۆرەی لە رۆژانی هەینی لەناو سەنتەری شاری هەولێر هەیە بەردەوام بێت، بەڵام پارێزگا شوێنێكی تایبەتیان بۆ دابینبكات
ئەگەر لە دوای نیوەڕۆی رۆژانی هەینی سەرێك لە سەنتەری شاری هەولێر بدەی، بۆتدەردەكەوێت كە ئەم شارە لەم رۆژەدا چەندە بێ سەروبەر و بێ چاودێر و ناڕێكە، لەوكاتانەدا جگە لەوەی ناتوانی بە ئۆتۆمبێل پێیدا بڕۆیت، تەنانەت هەندێكجار بە پیادەش تووشی زەحمەتی زۆر دەبیتەوە، ئەوەیش بەهۆی قەرەباڵغی و جەنجاڵی خەڵك نا، بەڵكو بەهۆی بەكارهێنانی شەقام و شۆستەكانەوەیە بۆ فرۆشتن و ساغكردنەوەی كەلوپەلی فرۆشیاران، كە زۆربەیان لە پێداویستی و كەلوپەلی ناوماڵ پێكدێن.
راستە پێویستە رێگری لە خەڵكی كاسب و كەمدەرامەت نەكرێت و كاربكەن و كەلوپەلەكانیان ساغ بكەنەوە، بەتایبەتی لەم بارودۆخە سەختە ئابوورییەی هەرێم تێیكەتووە، بەڵام دەتوانرێت بە جۆرێك رێكبخرێتەوە، كە نەبێتە ئاستەنگ بۆ هاتوچۆ و شێواندنی سیمای شاری هەولێر، وەك پایتەختی هەرێمی كوردستان.
دەكرێ ئەو بازاڕە بەو جۆرەی لە رۆژانی هەینییدا لەناو سەنتەری شاری هەولێر هەیە بەردەوام بێت، بەڵام پارێزگا شوێنێكی تایبەتیان بۆ دابین بكات، چونكە مانەوەی بازاڕی لەو جۆرە، كە لە زۆربەی وڵاتان هەیە و زۆر پێویستە، لەلایەك بۆ كاسبكاران، لەلایەكی تر بۆ كڕیاران، چونكە زۆربەی پێداویستی ماڵ و خێزانەكانی تێدایە و نرخی گونجاو هەرزانیان هەیە، بەڵام ناكرێت لە سەنتەری شار و بازاڕی گەورەدا بێت، بەتایبەتی لە رۆژانی هەینی، چونكە خەڵكانێك هەن دەیانەوێت بۆ بەسەربردنی كاتێكی خۆش و پیاسەكردن، روو لە بازاڕی گەورەی شار بكەن، یان كەسێكی بیانی دەیەوێت سەردانی بكات، كەچی بوونی بازاڕی رۆژانی هەینی و هێنانی كەلوپەلەكانیان بۆسەر شۆستە و شەقامەگشتییەكان، ئاستنەگی زۆریان دروست دەكات.
بۆیە پێویستە رێكخستنی شار و پاراستنی سیما و ژینگەكەی، لەسەرووی هەموو بەژەوەندییەكی ترەوە بێت، بەجۆرێك رێكبخرێتەوە هاووڵاتیان بتوانن بە ئاسانی و بەپیادە هاتوچۆی تێدا بكەن، لەهەمانكاتدا كاسبكاران لە شوێنێكی تری گونجاو لەكاری خۆیان بەردەوام بن و بژێوی ژیانیان دابین بكەن، بەمەش هاووڵاتیان پێداویستییەكانیان بەنرخێكی گونجاو دەست دەكەوێت، لەهەمانكاتدا خەڵكی دیكەش بۆ بەسەربردنی كاتەكانیان دەتوانن سەردانی سەنتەری شار و بازاڕی گەورەی هەولێر بكەن.
