تێگەهێ گەوجاندنێ بۆ من بخوە تێگەهەكێ نوی بوو، رامانا وێ ژی، لادانا ھشێ مرۆڤی ژ تشتەكی بۆ تشتەكێ دی. ئەز باوەرم پرانیا خەلكی فلمێ تایتانیك دیتبیت یان چیرۆكا وی هاتبیتە بەر گوهێن وی. د (پاپورا تایتانیك)دا، نێزیكی 2230 كەس هەبوون و ژوان بتنێ 706 كەس هاتنە رزگاركرن، یانكو 1524 كەسان ژ ئەگەرێ خەندقینێ و مانا وان دناڤ ئاڤەكا زێدە ساردا، گیانێ خوە ژ دەستدان و تشتێ فلمی زوم ئێخستییە سەر، مانا ئەكتەرێ سەرەكییێ فلمی بوو، ئەو ژی پشتی چەند دەمژمێران ژ ئەگەرێ تەزیاتییا ئاڤێ گیانێ خوە ژ دەستددەت و تشتێ بۆ من و رەنگە بۆ گەلەك بینەرێن دی ئەڤێن بینەرییا فلمی كری سەیر، دلێ وان دگەل مرنا سەدان كەسان نەبوو، چ ئەڤێن كەفتینە ناڤ ئاڤێ و گیانێ خوە ژ دەستدداین، سەرەرای دناڤ واندا ژن و زارۆك ژی هەبوون! بەلكو ھیڤییا سەرەكی یا هەمیان ئەو بوو، (جاك و رۆز) هەردو ئەكتەرێن سەرەكی یێن فلمی رزگار ببن! لێ كەسەكی دل ب هەمی وان كەسێن كەتینە ئاڤێ ڤە نەبوو و ئها دبێژنە ڤێ گەوژاندن، سەدان كەسان گیانێ خوە ژ دەستدا و دەرهێنەری ھشێ مە ئێخستە سەر كەسەكێ ژ چنەیێ هاتییە و برێكێن نەدروست هاتیە ناڤ پاپورێ، كەسەكێ دز و قومارچی و ئەڤ نموونا من ئینایی، چ قەبارێ وێ مەزنتر یان ژی بچویكتر بیت، رۆژانە میناكێن وێ دكەڤنە بەرچاڤێن مە. دەهان كێشە دناڤمەدا یێن هەین كو پستوویێ هاولاتی دگرن، ژ نەبوونا كارەبا عام بگرە، گرانبوونا بهایێ ئەمپێرێ موەلیدێ بگرە، نەبوونا موچەی و ژخوە بابەتێ بۆمبەبارنكرنا گوند و رەز و باغێن خەلكی ب سەرێ خوە و گیان ژ دەستدانا هاولاتیێن سڤیل ژ ئەگەرێ بۆمبەبارانكرنا فرۆكێن بێ فرۆكەڤان و لێ ھشێ وی ب تشتەكێ لاوەكیڤە دهێتە مژویلكرن و بابەتێن سەرەكی ژی ژبیرا وی دهێنە برن! رەنگە نموونا نەهێلانا سەیێن بەرەللا ژناڤ باژێری، باشترین نموونا گەوجاندنا ھشێ راییا گشتی بیت، دڤان رۆژێن دەربازبوویدا.
