دحەفتیا بوریدا و ب بەرهەڤبوونا جەنابێ پارێزگارێ دھوكێ، لیژنا داكوكیان ل ئازادیا رۆژنامەنڤیسان و مافێ رۆژنەمانڤیسان ل سەندیكا رۆژنامەنڤیسێن كوردستانێ، راپۆرتا خوەیا ژمارە (33) یا توماركرنا پێشێلكاریێن بەرامبەر رۆژنامەنڤیسان بۆ سالا 2024ێ راگەهاند. هەر چەندە پێشێلكاریێن پارێزگەها دهۆكێ بتنێ حالەت (9) بوون، لێ بابەتێ من ل سەر كێموزێدەھییا ژمارا ڤان پێشێلكاریان نابیت، بەلكۆ ئەگەر مە بڤێت پارێزگەها دهۆكێ پێشبكەڤیت، كو ئەز ژی وەك خودانێ ڤێ گوتارێ و سەرپەرشتیارێ ڤێ پاشكویێ ئێك ژ ئاكنجیێن وێمە، بۆ من پێشكەفتنا پارێزگەهێ ژ هەر پارێزگەهەكا دی گرنگترە، بوویە ئەز دێ هندەك خالان ئێخمە بەرچاڤ، ئەگەر ئەم رۆلی پێبدەین، ئەم دێ پارێزگەها خوە ژهەمی روویەكیڤە بەرەڤ پێشبەین، ئەو ژی ئەگەر رۆلەكێ بەرچاڤ ب رۆژنامەنڤیسی بهێتەدان، ئەو ب ئازادانە دیڤچوونێن خوە بكەت، زانیاریێن خوە بلاڤبكەت و ل سەر راوەستییان بۆ وان دیڤچوونان هەبیت، دێ پرانییا كێمۆكاسی هێنە چارەسەركرن، ژبەركو هەر رەخنا بهێتەگرتن یان راپۆرتا بهێتە دروستكرن، گرێدایی سازیەكا حكومییە یان جهەكێ رێڤەبرنێیە و هەر سازیەكێ ژی بەشێ خوە یێ راگەهاندنێ هەیە. دەما من لدەستپێكێ ئاماژە ب ئامادەبوونا جەنابێ پارێزگاری دایی، من مەبەست بوو، كو ئەو دشێت ل سەر هەمی ڤان سازیێن حكومی راوەستیت و دەستهەلاتا وی دسەر هەمیان رایە، وان ئەكتیف بكەت و گڤاشتنێ ل سەر وان بكەت، رۆژنامەنڤیس نەچار نەبیت بچیت ل دەستێ دوویێ و سیێ بگەریت كو پێزانینا دروست بدەست خوەبێخیت و رەخنەگرتن ل سازیێن رێڤەبرنێ و حكومەتێ، چ جارەكێ شكاندنا پارێزگەهێ نینە هندی خزمەتكرنا پارێزگەهێ یە، ژبەركو دێ دیڤچوون بۆ وێ كێموكاسیێ هێتەكرنێ و دێ هێنە چارەسەركرن. لێ ئەگەر ئەڤ بەشێن راگەهاندنێ د ئەكتیڤ نەبن، پێزانین ژ دەستێ دوویێ و سیێ بن، ئێك هەوال دروست ناهێنە ڤەگوهاستن و ناڤودەنگییا وێ سازیێ و پارێزگەهێ بخوە دێ كەڤیتە بەرگومانێ و وەك ئەم دزانین راگەهاندن هەمی تشتەكی سەراڤ دكەت، ئەڤە ژبلی بابەتێن یاسایی و تە ئەڤ پێزانینە ژ كیڤە ئیناینە؟ ژخوە ئەگەر ئەو پێزانینە ژی ددروست نەبن و رۆژنامەنڤیس كەتە بەرامبەری دادگەهێ و سزادانێ، ئەڤە دوو جارا ناڤودەنگییا پارێزگەهێ هاتە شێواندن، ژبەركو دژی ئازادییا رادەربرینێ یە. یامن دڤێت بێژم، ئەگەر مە بڤێت ئەم رێڤەبرنەكا باش بكەین، رۆژنامەنڤیس دشێت باشترین چاڤ و گوھـ و زمانێ ئیدارا پارێزگەهێ بیت.
