هەر چالاكیەكا رەوشەنبیری بیت هونەری بیت و ئەو چالاكییا هەنێ بشێت بینەرەكی، خەلكەكی لدوورێن خوە خرڤە بكەت، دڤێت مرۆڤ یێ گەشبین بیت ئەم یێ پێنگاڤەكێ بەرەڤ ھشیاربوونێڤە دچین. ئەو ھشیاربوونا من دڤێت ژێ بەحس بكەم، هەمان ئەو پشت گوھـ هاڤێتنە، یا ژ سەرھلدانێ وەرە تاك ل سەر دهێتە ئاڤاكرنێ و لێ بنێرە ئەو بارۆدوخێ نۆكە ئەم تێدا، ژپرتوبلاڤەییێ و بێ باوەرییێ و قەیرانێن بەردەوام و بێ بەرنامەیی، ئەڤە هەمی ژی ئێك ئاماژەنە، كو چ پرۆژەیێن رۆھن و زەلال بۆ تاكی دئارادا نینن و دێ مینیت ئەڤ سەرباركێن برێكێن جودا دەردكەڤن چ فلمە فێستیڤال بن، چالاكیێن دییێن هونەری چ شێوەكاری یان شانۆ بیت چ سمینار و ئێڤاریێن رەوشەنبیری بن و بدیتنا من ئەڤ سەرباركێن ئەز ژێ بەحس دكەم، ئەگەر دقەبارەیێ خوەدا بەرامبەر ڤێ پشتگوھ هاڤێژتنێ دبچویك ژی بن، لێ جارا دبێژن ب سەر كەفتنا بلندترین چیا ژ پێنگاڤا ئێكێ دەستپێدكەت و رەنگە باشترین دەستپێك ژی، كو تاكەك بهێتە ئاڤاكرن و مێشكێ وی یێ ڤەكری بیت و دژیانێ بگەھیت، دێ هەر دوو بیاڤێن رەوشەنبیری و هونەری بن و ئەو دشێن ڤێ چەندێ بكەن.
بوچی من گوت رەوشەنبیری و هونەر؟ ژبەركو ئەڤ هەردوو بوارە دشێن دەرگەهێن ھزركرنێ یێن نوی ڤەكەن، ددەمەكیدا هەمی دەرگەھـ ل سەر تاكی هاتینە گرتن، بتنێ ئەو دەرگەھـ نەببیت یێ تێدا تاكەكێ بێدەنگ و ماكێ خوە د چ تشتیدا نەكەت، ڤالا ژ رەخنێ، ڤالا ژ ھزركرنێ، ڤالا ژ پەیڤا نەخێر و ڤالا و ڤالا و ڤالا و هەر گاڤا ڤییان، دێ لدویڤ یا وان بیت، ژبەركو ئەڤ ڤالاھیێن ل سەر ئێك تەخەبووین، نەشێن شیانێن درۆستێن ھزركرنێ پێ ببەخشن و راكەنە سەر پییان و ژبەرھندێ ژی، چ پرۆژە نینن كو خواندەڤا هەبن، چ پرۆژە نینن كو ناڤەندێن رەوشەنبیری و هونەری هەبن و ئەڤ ناڤەندێن هەنێ دچالاك بن و بشێن ھزرێن نوی لدوورێن خوە خرڤە بكەن و لدووماھییێ یا من دڤێت بێژم، ئەم پێدڤی بەرنامێن ھشیاركرنێی نە و ئەڤ بەرنامێن هەنێ ژی ئەگەر تاك لدویف نەگەریت، خوە بخۆ پێنەگەھینیت و بەشداری چالاكیێن رەوشەنبیری و هونەری نەبیت، باوەرناكەم ئەو گوهورینا هەمی دخوزان پەیدا ببیت؟!!
