هەیڤا ئادارێ بۆ كوردان گرنگیا خوە یا تایبەت هەیە، چ ئەڤ گرنگییە بۆ رۆژێن خۆش بزڤریت، وەكی نەوروزێ و سەرھلدانێ و چ ژی بۆ رۆژێن نەخۆش بزڤریت، وەكی كیمیا بارانكرنا هەلەبچە و كوچا ملیونی. لێ پرسیار لڤێرە ئەڤەیە، كورد چەند شیاینە مفای ژڤێ هەیڤێ وەربگرن، ئەڤ هەیڤا هەمی ب ئادارا كوردان ناڤدكەن؟ دا ھندەك هەلسەنگاندنێ بكەین و ژ سەرھلدانێ دەستپێبكەین، ئایا سەرھلدانێ شیا ئارمانجا خوە ب پێكیت؟ ئەگەر بەرسڤا مە نەخێر بیت، رەنگە بێوژدانی بیت، ژبەركو ئەم نۆكە خودان پەرلەمان و حكومەت و هەرێمەكا سەربەخۆینە و ئەگەر بەرسڤا مە بەلێ ژی بیت، دێ بەلێیەكا لەنگدار بیت. ل حوكمرانییا مە بنێرە، هێشتا تارمایێ دوو ئیدارەییێ بڤێ هەرێمێ ڤە دیارە، هێشتا پێشمەرگە دبن كونترولا حزباندایە و ژخوە ئەگەر خوە زێدەتر شور بكەینە ناڤ خەلكی، كۆ مە بڤێ نڤیسینێ مەبەستە، مووچێ وی یێ بوویە یاریكرن و دەستێ وی یێ ل سەر دلێ وی، ئایا دێ ددەمێ خوەدا گەھیت یان دێ هەیڤەك دبن چیت؟ ئەگەر مووچە نەهاتە بلاڤكرن ژی، نەكەس دزانیت چ لێهات و نە كەس پرسیارێ دكەت و ئەگەر مووچەی ژی دانینە ئالیەكی، ل ژین و ژیارا وان بنێری و دگەل باژێری بەراورد بكەی، دیمەنێ تاوەرێن بلند ل ناڤ باژێری، دیمەنێ پرۆژە و كومپانی و مۆل و شقە و مەزرەعێن سەرێن گرا و ترۆمبێلێن (ئاخر مودێل)، دێ ھزركەی باژێر و خەلكێ باژێری ژیانەكا های های دەرباز دكەن. ژخوە ئەگەر ل نزیكتر بەرێخوەبدەین، بگشتی خەلكەكێ هەژار دێ بینی، دا ل هەژاریێ ژی بگەرین، تو كەسەكێ نابینی ئەگەر قەردارێ پارێ كارەبێ و ئاڤێ نەبیت و ژخوە باج و رسوماتێن سەپاندی ب سەرێ خوە، سزایێن كامیرێن چاڤدێرییێ ب سەرێ خوە و نە تو دزانی ئەڤ پارە كیڤە دچیت و هەر گازندەییا بهێتەكرنێ ژی، دێ كوردینی بتە هێتە فرۆشتنێ و ژخوە بازرگانێن یارییا ب ژیانا خەلكی دكەن، هەر لێبگەرە. هەژاری و بێكاری ل ئالیەكی و چ پرۆژە و چ پلانێن نێزیك و دویر نینن بۆ خوشتركرنا بارۆدوخێ ژیانێ و دیارە ئەڤە قەدەرا مە كوردانە و (دەستێ ل بن بەری)یە، نە ئەم دزانین خوە برێڤەبەین و ئەگەر خوە پرێڤەبەین ژی، دێ دبەریكێن ئێكودوو خەبتین.
