دەرباز كۆسرەت رەسوڵ*
سی و چوار ساڵ تێپەڕی بەسەر زیندووترین ساتی مێژووی هاوچەرخی نەتەوەیەكی ستەمدیدە، ئەو رۆژەی هەولێرییە تێكۆشەرەكان بڕیاریاندا شانبەشانی شۆڕشگێڕان كۆتایی بە سەردەمی ستەم و زۆرداریی بهێنن.
لە بیرەوەریی هەمووماندا ئەو وێنانەی 11ی ئازار ماون كاتێك پێشمەرگەكانی كاك كۆسرەت و شانە چەكدارەكانی ناوشار تێكەڵ بە ئاپۆڕای تووڕەیی جەماوەری هەولێر بوون، ئەوە ئەو ساتە بوو كە بەهێزترین ستەمكاریش نەیتوانی بەرگەی بگرێت و ناچاربوو چۆك دابدات لەبەردەم ئیرادەی پۆڵاینی هەولێرییەكاندا.
بانگەوازی كاك كۆسرەت لەو رۆژە پرشنگدارەدا، هێزی بە هەولێرییەكان بەخشی، خەڵك تێكڕا هاتنە سەر شەقام و بڕیاریاندا ئیتر زوڵم و ستەم دەبێت كۆتایی بێت. دواجار هەر بەیەكەوە دەست لەناو دەست ئەو بۆشاییە كارگێڕییەی كە بەمەبەستی خنكاندنی خەڵكی كوردستان دروستكرابوو، پڕكرایەوە لەڕێگەی بونیاتنانی دامەزراوە فەرمییەكانی هەرێمی كوردستان و هەولێر بووە پایتەختی ئەم كیانە كوردییە. هەر لەبەر ئەمەیە دەڵێین راپەڕین ساتی شانازییبوونمانە بە كوردبوون و هەولێریبوون، شانازیمان؛ بەوەی دەتوانین لە سەختترین بارودۆخدا داهاتوو بونیاتبنێین.
راپەڕینە جەماوەرییەكەی یازدەی ئازاری 1991 خاڵی وەچەرخان بوو لە مێژووی بزووتنەوەی رزگاریخوازی كورد، وێستگەیەك بوو بۆ گواستنەوەی خەبات و گۆڕینی فۆرمی مانەوەی نەتەوەیەك لە خەباتی چەكدارییەوە بۆ دامەزراندنی دامەزراوەی شەرعی و مەدەنی.
بێگومان وانەكانی راپەڕینی بەهاری 1991 دژی رژێمی بەعس، گەلێك زۆرن، لە هەر گۆشەیەكەوە لێی بڕوانین، ئەزموونێكی لێ وەردەگرین، گرنگترین وانەش ئەوەیە، هیچ شۆڕش و بەرخودانێك بەرهەمی نابێت، ئەگەر هاووڵاتیان و كۆمەڵانی خەڵك بەردی بناغەكەی نەبێت.
لە یادی راپەڕیندا بەپێویستی دەزانین ئەوە دووپاتبكەینەوە كە خەڵكی كوردستان خۆیان ئەم ئەزموونەیان بونیاتناوە، بۆیە شایەنی باشترین خزمەتن، پێویستیان بە ئارامی و خۆشگوزەرانی زیاترە، بۆیە بەڵێن دووپاتدەكەینەوە كە هەمیشە لە خزمەتی خەڵكی خۆماندا بین، بەجددی كاربكەین بۆ ئەوەی ئامانجەكانی راپەڕین بەتەواوی بەدیبهێنین.
بە دەرفەتی دەزانم، لەم رۆژە پیرۆزەدا، سەری رێز و نەوازش بۆ شەهیدانی راپەڕین و سەرجەم شەهیدانی كوردستان دانەوێنم، كە بە خوێنی ئاڵیان ئەم ئەزموونەیان بونیادنا.
*ئەندامی مەكتەبی سیاسیی
یەكێتیی نیشتمانیی كوردستان
