گفتوگۆی بێ کۆتایی نێوان ئەوانەی بڕوایان بە خەباتی چەکداری هەیە، لەگەڵ ئەوانەی پێیانوایە سەردەمی تێکۆشانی چەکداریی بەسەرچووە هێشتا بەردەوامە
گفتوگۆی بێ کۆتایی نێوان ئەوانەی بڕوایان بە خەباتی چەکداری هەیە، لەگەڵ ئەوانەی پێیانوایە سەردەمی تێکۆشانی چەکداریی بەسەرچووە هێشتا بەردەوامە، لەم رۆژانەدا کە پرسێک بەناوی پرۆسەی ئاشتی بووەتە رۆژەڤی رۆژ، دیسان مشتومڕی قووڵی سەبارەت بە پرسی بوونی چەک لە بزاوتی کوردیدا هێناوەتەوە گۆڕێ، دیارە مەسەلەی چەک هەڵگرتنی کورد هیچ کاتێک بژاردەیەکی خۆویستانە نەبووە، بەڵکو داسەپاوێکی ناچاری و رێگە چارەیەک بووە بۆ خۆپارێزی رەوا کە پرەنسیپێکی ئایینی و نەتەوەیی و یاساییە، کەواتە هەتا ئەو کاتەی مەترسیی پاکتاوی رەگەزی و کۆمەڵکوژی لەسەر کورد بەردەوامبێت، بوونی چەک پێویستییەکی دەست لێبەرنەدراوە.
لەبارەی پرسیاری دژبەرانی خەباتی چەکداری کە ئایا چەک چی بۆ کورد کردووە دەڵێین، خەباتی چەکداری لە زۆر قۆناغدا، دۆزی رەوای کوردی بەجیهان ناساند و ئیرادەی بە تاکی کورد بەخشییەوە، خەباتی چەکداری لە چەندین قۆناغی وەک 1963، 1970، 1983، 1991 حکومەتەکانی عیراقی ناچار بە ملدان بۆ دانوستان کرد، ئەوەش بەدیوێکی تردا بەواتای ئەوە بوو کە هێز سەنگی مەحەکی دبلۆماسیی و گفتوگۆ بووە، لەبەرامبەردا بۆ رای دووەمیش هەمان ماف هەیە، ئایا تێکۆشانی شارستانی چی بۆ کورد دەکات؟ لێرەدا دەڵێین ئەم خەباتە پێویستیی بە زەمینە و کەش و هەوای لەبار و سیستمێکی سیاسی کراوە هەیە و لەسەر ئاستی نێودەوڵەتییش جێی بایەخە، خۆش بەختانە هەرگیز کورد دەست بەرداری هیچیان نەبووە، بەڵام ئەوەی هاوکێشەکەی بەلادا خستووە، هێزی چەک بووە، کە دەکرێت راپەڕینی باشووری کوردستان وەک نموونەیەکی زیندوو ئاماژەی بۆ بکرێت.
راپەرین ئەگەرچی جەماوەری کوردستان رۆڵی میحوەرییان تیایدا هەبوو، یەک دەست و یەکدەنگ بڕیاری بەگژداچوونەوە و کۆتایی بە دەسەڵاتی بەعسیان دابوو، بەڵام بەبێ بەشداریی هێزی پێشمەرگە و نەخشەی پێش وەختەی سەرکردایەتی سیاسی هیچ گرەنتییەک بۆ سەرکەوتنی نەبوو.
