یەكێتیی لە دوای پێنجەمین کۆنگرەوە بووە بە حزبی خاوەن گوتار و یەكدەست و بەهێز و خاوەن سەرۆكێك، كە نوێنەرایەتیی تەواوی یەكێتییەكان دەكات
یەكێتی وەكو حزبێكی سۆسیال دیموكرات لە 50 ساڵی تەمەنیدا چەندین جار گۆڕانكاریی لە پێكهاتە و پەیكەربەندیی خۆیدا كردووە، لەدوای راپەڕینی گەلی كوردستانیشەوە کە وەک حزبێکی مەدەنیی حوکمڕان دەستیكردووە بە خەباتی سیاسی و دەوڵەتداری، هەستی بەوە كردووە كە دەبێت سیستمێكی نوێ بۆ رێكخستنەكانی خۆی دابنێت و لە رێكخستنی نهێنییەوە بۆ سیستمی قۆناغی خەباتی ئاشکرا و شارستانی، بەوەش یەكەمین وەرچەرخانی لە پەیكەربەندیی خۆیدا کرد، ئەگەرچی تا سەرەتاكانی دوای رووخاندنی رژێمی بەعسیش ناچاری دوو جۆر لەشێوازی کارکردن بوو لە شارەکانی ژێر ئیدارەی هەرێم و ناوچە دابڕێنراوەکانی ژێر دەسەڵاتی رژێمی پێشوو. بەڵام لەدوای 2003 وە بە جیهانبینی سەرۆك مام جەلال بۆ قۆناغی نوێ و بەشداربوون لە پێكهێنانی حكومەتی نوێی عیراق و بوون بە بەشێكی كارا لە سۆشیال دیموكراتی جیهان، ئەمەشیان قۆناغێكی نوێ بوو بۆ ئەوەی ئەو حزبە بە پرۆژەیەك خۆی نوێ بكاتەوە لەڕێگەی بەستنی سێیەمین كۆنگرەوە لە حوزەیرانی 2010دا، هەر لەو کۆنگرەیەشەوە پشكێك بۆ گەنجان و ژنان لە تەواوی سێكتەرە جیاجیاكانی ناوخۆی حزبدا دیاریكرا، پێكهاتەی حزب بە شێوازێكی نوێ داڕشتەوەی بۆ كرا و یەكەمجار بوو کە یەكێتی بوو بە خاوەنی ئەنجوومەنی ناوەند و هەندێك ئۆرگان و کۆمسیۆن لەو ئەنجوومەنەدا وەک پەرلەمانێکی حزبی، ئەگەرچی بەهۆی کۆمەڵێک دۆخی نەخوازراو لەسەر ئاستی حزب و هەرێم ئەو ئەنجوومەنە نەیتوانی بەتەواوەتی ئامانجی دروستکردنەکەی بپێکێت.
بیرۆكەی سازدانی دیداری یەكێتی، نوێگەرییەک بوو لە کاروباری حزبیدا تا لە نزیكەوە تەواوی ئۆرگانەكانی یەكێتی، لە ئەندامەوە بۆ سەرەوە پێكەوە گفتوگۆی كراوە و راستەوخۆ لەسەر داهاتووی حزبەکە و چۆنیەتی ئیدارەدانی هەمەلایەنەی بکەن، بەجۆرێک هەر كەسە و بیروڕاكانی خۆی دەردەبڕێت و بەمەش یەكێتی لە حزبێكی تەقلیدییەوە کردووەتە حزبێكی مۆدێرن لەسەر رێچكەی حزبە مۆدێرنە دیموكراتەکانی خۆرئاوا.
یەكەمین دیداری بووە هۆی ئەوەی تەواوی ئەو كێشە و گرفتانەی لە ئەنجامی چوارەمین كۆنگرەدا دروستبوون، بەهۆی گفتوگۆی خەمخۆرانەی دڵسۆزانی یەكێتییەوە وەلابنرێت و راسپاردە و پێشنیازەکانی بکرێتە هەوێنی سەرکەوتنی پێنجەمین كۆنگرە کە ئیتر لەوێوە یەکێتی بوو بە حزبی خاوەن گوتار و یەكدەست و بەهێز و خاوەن سەرۆكێك كە نوێنەرایەتیی تەواوی یەكێتییەكان بکات
هەنووکە لەسۆنگەی دەستپێکردننی دیدارە لاوەکییەکانی دووەمین دیداری گشتیدا ئەندامانی حزب چاویان لەوەیە هەمووان بە بیروڕاكانیان، داهاتووی حزبەكەیان دیاری بكەن و لە چەند راسپاردەیەکدا تەواوی پێشنیازەكانیان كۆبكرێتەوە و بخرێتەوە بەردەستی سەرۆك و ئەندامانی مەكتەبی سیاسیی و ئەنجومەنی سەركردایەتی تا هەنگاوێکی دیکەی نوێبوونەوە جێبەجێ بكرێت. لێرەدا وەك ئەندامێكی ئەو حزبە و بەشێك لە بنەماڵەی تێكۆشەران و شەهیدانی یەكێتی و نزیك لە بیروباوەڕی سوودوەرگرتن لە تواناكان و بەدامەزراوەییكردنی زیاتری یەكێتی، چەند پێشنیازێك ئاراستەی دووەمین دیداری یەكێتی و تەواوی ئەندام و سەرۆك و ئەنجومەنی سەركردایەتی دەكەین و هیوادارین بە سوودوەرگرتن لە توانای گەنجان و بنەماڵەی تێكۆشەران و رێزگرتن لە رۆڵە و نەوەی شەهیدان، یەكێتییەكەمان بەهێزتر ببینین و لە ئایندەیەكی نزیكدا ببێتەوە حزبی یەكەمی كوردستان.
دیارە گۆڕانكاری پێویستی بە پلانێكی ستراتیژی و هەستیارە بۆ خۆنوێكردنەوە و پێكهاتەیەكی نوێی حزبی سیاسی، دەبێت سوود لە وزەی گەنجان و توانای زانستی و كارامەییان لە هەموو روویەكەوە وەربگیرێت، بەتایبەتی هۆشیاریی كۆمەڵایەتی و لەڕووی ئایدیۆلۆژییشەوە ئەندام و کادر پەروەردە بكرێن ئەمەش بە كردنەوەی ئەكادیمیای حزب و بە بەشداری پێكردنی دڵسۆزانی یەکێتی و بەتایبەتی گەنجانی نەوە و رۆڵەی شەهیدان و تێکۆشەران، چونكە ئەم كەسانە هەر لە منداڵیەوە ئاوێتەی كاری حزبی بوون و بۆ درێژەدان بە رێبازی شەهیدەكانیان و دڵسۆزانی دێرینی یەكێتی، وەک درێژەپێدەری رێگاکەی ئەوان دەڕۆن و دەیانەوێت بەوپەڕی تواناوە ئەمانەتی دەستی ئەو تێكۆشەرانە بپاڕێزن و لە داهاتووشدا تەسلیم نە نەوەکانی دوای خۆیانی بكەن.
گۆڕانكاریی، پێویستی بە پلانێكی ستراتیژی و هەستیارە بۆ خۆنوێكردنەوەی حزبی سیاسی و بۆ ئەوەش دەبێت سوود لە وزەی گەنجان و توانا زانستی و كارامەییەکەیان لە هەموو روویەكەوە وەربگیردرێت بەتایبەتی هۆشیاریی كۆمەڵایەتی
بۆیە پێویستە پێكهاتەیەکی مۆدێرنتر لە رابردوو بۆ یەكێتییەكەمان دابڕێژینەوە كە زۆر گرنگە پێداچوونەوەیەكی ورد بە پەیڕەوی ناوخۆدا بكرێت بۆئەوەی لەڕووی یاساییەوە ئەو گۆڕانكارییانەی پێویستن لە پەیڕەودا لە شەشەمین كۆنگرەدا بچەسپێنرێت بە رەچاوکردنی قۆناغی ئێستا و باشتر خۆگونجاندن لەگەڵ دروشم و ئاکارەکانی سۆشیال دیموکراتدا وەک (یەكسانیی كۆمەڵایەتی، چاكسازیی ئابووری و نەهێشتنی گەندەڵی و دابینكردنی بژێوی و حكومڕانی دیموكرات).
هەروەک دیدار و دواتر کۆنگرە دابەشكردنی دەسەڵات لە سەرەوە بۆ ئۆرگانەکانی خوارەوە بکاتە ریتمی کارکردن بۆ هاندانی ئەندامانی گەنجی یەكێتی لە ئاستی مەڵبەند و كۆمیتەكان تا بە بەردەوامی ئەو پەیوەندییەیان هەبێت و لە هەرەمی خوارەوە بتوانن چالاكانە و بە كارایی بیروڕای خۆیان بگەیەنێن بە سەرووی خۆیان و بەمەش دەتوانین بڵێین دەبێت(دیداری یەكێتی) ئەو کایەیە بێت کە رۆڵێكی گرنگ و كاریگەر ببێنێت و دەبێت لەڕووی یاساییەوە لە پەیڕەوی ناوخۆدا جێگیر بكرێت و بەپێی ماددەكانی ئەو پەیڕەوە دەسەڵاتەكانی دیاریبكرێت بۆئەوەی دیدار لانیکەم وەك پلنیۆم و كۆنگرەی (ئیستیسنائی) خاوەن هێزی بڕیار بێت و بوارێكیش بێت بۆئەوەی كادری نوێ بهێنرێتە پێشەوە و ببێتە هۆی رەخساندنی دەرفەت بۆ بەشداری پێكردنی گەنجان لە تەواوی سێكتەرە جیاجیاكانی حزبدا. ئەم هەنگاوەش بە دامەزراندنی چەندین ئۆرگانێكی تایبەت بە گەنجان دێتەدی كە راستەوخۆ لەنێو رێكخستنەكانەوە بێت نەك وەک ئێستا کە بەشێك لە رێكخراوەكان بەشداری پێكردنیان لاوازە لە ئەرکی حزبیدا. ئەمەش پێویستی بە تەرخانكردنی كات و بودجەی تایبەت پەروەردەکردنی حزبییە.
بۆ ئەم مەبەستەش دەبێت پەیمانگای كادران كارابكرێتەوە و سوود لە خاوەن پسپۆڕییە جیاجیاکان وەربگیرێت و سەركردە دێرین و بە ئەزموونەكانمان کە خاوەنی مێژوویەكی پڕ سەروەریین، میوانداریی بكرێن تا لەو پەیمانگایە وانە لەبارەی ئەزموونی سیاسی و کاری حزبیی خۆیانەوە پێشكەش بكەن و چۆنێتی مامەڵەكردنیان لەگەڵ تەنگژە و پێشهاتەكانیشدا بخەنەڕوو وەک هەوڵێک بۆ پێگەیاندنی گەنجی سەرکردە بۆ ئایندە.
بەشێک لەو گەنجانە، یادگاریی شەهیدان و تێکۆشەرانی دێرینی یەكێتین كە بەخوێن و ماندووبوونی ساڵانێکی تەمەنیان ئەم یەکێتییەیان گەیاندووەتە ئەمڕۆ، بۆیە ئەگەر ئەمڕۆ خۆیان شەهید بووبن یان توانای خەباتیان نەمابێت، دەبێت رۆڵەو نەوەی ئەو شەهید و تێكۆشەرانە بەپێی تواناو شارەزاییان لە ئۆرگانەكانی یەكێتیدا جێیان بكرێتەوە بۆئەوەی درێژە بەرێبازی خەباتگێڕانەی باوانیان بدەن و لەكۆتاییشدا پێشنیاز دەکەین لە راسپاردەکانی دووەمین دیداردا بۆردێك بۆ گەنجان لە چوارچێوەی مەكتەبی رێكخستندا بكرێتەوە و لە ئۆرگانەکانی خوارەوەشدا بەش و هۆبەی تایبەتیان بۆ بكرێتەوە.
