رێکخراوی تیرۆریستیی داعش، دوای لێسەندنەوەی ئەو رووبەرە خاکانەی کۆنترۆڵی کردبوون و کۆتاییهێنان بەو کۆمەڵکوژییانەی لەسەر هاووڵاتییانی وڵاتانی جیاجیا کردبوونی بە نەتەوەی کوردیشەوە، بە رەسمی کۆتایی بە دەسەڵاتەکەیان هێنرا، بەڵام هێشتا مەترسیی گەورەن لەسەر زۆر ناوچە و ئاسایشی خەڵک، بەتایبەتی رۆژئاوای کوردستان، هەروەها لە ناوچە جیاوازەکانی هەرێمی کوردستانیش هەن و ناکرێت نادیدە بگیرێن.
هێزەکانی سوریای دیموکرات (هەسەدە) لە راگەیەندراوێکدا دەڵێت: «پاشماوە و شانە نووستووەکانی رێکخراوی تیرۆریستیی داعش، هێشتا هەڕەشەیەکی بەردەوام و جدین بۆ سەر ئاسایش و سەقامگیریی باکوور و خۆرهەڵاتی سوریا».
ئەمەش پێویستیی بە هەوڵی زیاتر و هاوکاریی هەواڵگریی و ئەمنیی ئیقلیمی و نێودەوڵەتییە بۆ رێگریی لە گەڕانەوەیان.
هەسەدە ئاماژە بەوەش دەکات، لە دوای رووخانی رژێمی سوریا، داعش بازنەی چالاکییە تیرۆریستییەکانی خۆی فراوان کردووە و توانیوێتی چەک و تەقەمەنیی زیاتر بەدەستبهێنێت.
ئەم هۆشدارییەی هەسەدە لە جێگەی خۆیدایە و کاری گرنگ ئەوەیە ئامادەکاریی جددی بکرێت بۆئەوەی داعش دەرفەتی ئەوەی بۆ نەڕەخسێت سیناریۆی هاوشێوەی پەلامارە دڕندانەکانی ساڵی 2014 دووبارە بکاتەوە و زیانی گەورە بە کورد و خاک و ئەزموونەکەی نەگەیەنێت.
داعش و چەندین گروپی تیرۆریستیی دیکە لە دۆخی ناسەقامگیریی سیاسی و ئەمنیدا دەردەکەونەوە، لە سوریا ئەو دەرفەتە بۆ داعش و هاوبیرەکانیان بەجۆرێک رەخساوە و دوور نییە دەستی دەرەکیش هاندەریان بێت بۆئەوەی دەست بە چالاکییە تیرۆریستییەکانیان بکەنەوە، لە هەمووشی زیاتر رۆژئاوای کوردستان ئامانجی ئەوانە و بەپێی راگەیەندراوەکەی هەسەدە ئێستا داعش زیاتر خۆی رێکخستووەتەوە و بارودۆخەکەش هاوکاریانە بۆ هەڵگیرساندنی شەڕ و ئاژاوە و دروستکردنی مەترسیی لەسەر رۆژئاوای کوردستان.
راستە هەسەدە بەهێزە و ئامادەیی تێدایە بۆ رووبەڕووبوونەوەی داعش، بەڵام نابێت هاوکاریی دەرەکیی بۆ داعش و پرۆژەی نەیارانی کورد بۆ تێکدانی ئەزموونی رۆژئاوای کوردستان نادیدە بگیرێت، بەڵکو پێویستی بە هاوکاریی زیاتری نێوان هێزە کوردییەکانە بەتایبەتی باشوور و رۆژئاوای کوردستان، چونکە هەردوو ناوچەکە داعش تیایاندا ئامادەیی هەیە و بیریشیان نەچووە پێشمەرگە و شەڕڤانان هۆکاری سەرەکیی تێکشکاندیان بوون و بەشێک بوون لە هاوپەیمانیی نێودەوڵەتی بۆ رووبەڕووبوونەوەیان. داعش مەترسییەکی گەورەیە و پێویستیی بە پلانی ورد و هاوئاهەنگیی زیاترە بۆ رووبەڕووبوونەوەیان، چۆن داعش هەر خۆیان تەنها نین لە پیلانگێڕان دژی کورد و کوردستان، پێویستە کوردیش یەکدەست و یەک هەڵوێست بن لە ئامادەکاریی بۆ رووبەڕووبوونەوەیان، ئەوە دەستەبەری سەرکەوتنی کوردە دژی هەر دوژمنێک کە بیەوێت کوردستان داگیربکات و خەڵکەکەی بکاتە کۆیلە وەکو چۆن دژی کوردانی ئێزدی کردیان.
