وەكو هەموو بەیانییەك، كاتێك فەیسبووك دەكەمەوە، دەستم لەسەر دڵمە، چونكە دڵنیام خەبەری ناخۆش و مەرگی ئازیزان لە بەیانیان بڵاودەكرێتەوە، بۆیە بەداخەوە یەكەم پۆست كە هاتە بەرچاوم پۆستێكی كاكە شێركۆی عەباسی ڤیدیۆ بوو، كە نووسیبووی: خاڵی گەورەم و هاوڕێی نزیكم (هادی غوڵام) ئەمشەو لە وڵاتی كەنەدا گیانی پاكی سپارد.
هادی غوڵام، جگە لەوەی پێشمەرگەیەكی دێرین و رەسەن بوو، هونەرمەند و نووسەرێكی گەورەش بوو، من بەش بە حاڵی خۆم لە سەرەتای ساڵی 2023 ناسیم لە رێگەی مامۆستا عەباسی ڤیدیۆوە، بە شانازییەوە دەرگای بڵاوكردنەوە و گەڕانەوە بۆ نووسینم بۆ كردەوە لە رۆژنامەی كوردستانی نوێ، سەرەتا تەنها بە نامە و لە رێگەی عەباسی ڤیدیۆوە پەیوەندیمان هەبوو، دواتر خۆمان راستەوخۆ پەیوەندیمان دروستكرد، تا دواجار گەڕایەوە كوردستان و وەكو خۆی وتی: هەر كە هاتمە سلێمانی تۆم لە خەیاڵ بووە و ویستوومە یەكەم كەس سەردانت بكەم.
كە بینیم و لە ژوورەكەم لە كوردستانی نوێ میوانداریم كرد، هادی غوڵام ئەوەی من لە مێشكی خۆم وێنام كردبوو، ئەوە نەبوو، بەڵكو زۆر لەوە گەورەتر و بەویقارتر بوو، كە هات، سەر و سیمایەكی سپی و كەمێك ماش و برنجی بوو، بەڵام بە ئەندازەیەك هێمن بوو كە من بە شەرمەوە قسەم لەگەڵ دەكرد، خۆ ئەگەر عەباسی ڤیدیۆی لەگەڵ نەبوایە، دڵنیام تا نیوەڕۆ دوو قسەی نەدەكرد، چونكە دەمێكە مرۆڤی وام نەدیوە، كە 99 % گوێ بگرێ و 1 % قسە بكات، هەر ئەوكات وتم ئەم هادی غوڵام-ییە دەبێت چ پەپوولەیەك بێت وا ئەوەندە هێمن و لەسەرخۆیە و لەم زەمەنە دەژی.
كە لە نزیكەوە ناسیم، ئیتر پەیوەندیمان بەردەوام بوو، بەتایبەت كە یەكەم نووسینم بەناونیشانی (لە عیراق پێكەوە بژین یان نا؟!) بۆ بڵاوكردەوە لە مانگی 2ی 2023، ئیتر لە دوای ئەوە بەردەوام دەینووسی، بەڵام دەبێت ئەوەش بڵێم نووسینەكانیشی وەكو خۆی هێمن و سەنگین بوون، پەلەی نەبوو، بۆیە هەمیشە وتارەكانی جێگای تایبەت و لاپەڕەی تایبەتی بۆ تەرخان دەكرا.
بەداخەوە، لە ماوەكانی رابردوودا دووجار نامەم بۆ نارد دەنگی نەبوو، منیش وتم لەوانەیە سەرقاڵی سەختییەكانی تاراوگە بێت و وازم لێهێنا، كەچی بەم هەواڵە شۆكهێنەرەی كاكە شێركۆ هەواڵی مەرگیم بیست.
مامۆستا هادی غوڵام، نووسینی بە زمانەكانی كوردی و عەرەبی هەبوو، تەنانەت جارێكیان نووسینێكی بە زمانی عەرەبی بۆ ناردم تا بۆ سەكۆكانی یەكێتی بنێرم و بڵاوبكرێتەوە.
بەئەسەفەوە دەبێت بڵێم، وەكو چۆن خەباتی لە شاخ و تاراوگە بە هێمنی و سەنگینی بوو، مردنەكەشی هەر بەهێمنی و لە غەریبی بوو، بەڵام بە زمانە هێمنەكەی خۆی یەك وەسیەتی هەبووە، ئەویش ئەوە بووە: ئەگەر مردم بمبەنەوە خانەقی و لەوێ بمنێژن.
دروود بۆ رۆحی پاكی مامۆستا هادی و جێگای لە دڵماندا هەر دەمێنێتەوە.
