بەبۆنەی كۆچی دوایی و یادی چلەی ماتەمی شاعیری عیراقی ( موزەفەر نەواب ) كە تەنیا رابەری نەمر مام جەلال كە لەژیاندا بوو ناردی بەدوویدا و لەبەغدا رێزی لێ گرت.
هەتا دیاردەكانی هاوسەنگی و بە سەردەمكردنی ژیانی كۆمەڵایەتی تەنیا لە دیوی دەرەوەی بەرچاودابێ، دەبێ چاوەڕێی ئەوە بكرێ بە بێ ئاگا و لەپڕ، كە وەرچەخانی كاریگەر روودەدات خۆمان لەبەردەم كارەساتی پڕخەسارەتدا ببینەوە و هەست بكەین لەهەموو شتێ نزیكین لە روح و فیكریی بیناكاریی سەردەم نەبێ .
لە دوای كودەتا كەی 14 تەمموزی 1958 وە هەتا ئێستا عیراق و بەهەرێمی كوردستانیشەوە، چی روویداوە زۆربەی لاپەرەكانی دەخوێنیتەوە، یان دەتهێنێتە گریان یان پێكەنین !
لەو رۆژەوە سەرەڕای ئەو هەمووە هات و هوتەی بەناوی مێژوو و رەگەز و داخڵبوونی ئەحفادی حامورابی و كەیخوسرەو بە كۆڵێ عیلمەوە بۆ سەدەی سێیەمی ژیانی بەشەرییەت، كەچی لە 9 ی نیسانی 2003 دا هەموو ئەو خۆهەڵكێشانەی بەناوی باو و باپیرەوە دەكرا بەرەنگاری هەرەسی تەلارە بێ بنەڕەتەكانی پێنەكرا! قسە لەسەر میژوو وەک كورد وتەنی تەنیا قسەبوو، قسەش ناچێتەگیرفانەوە ئەوە بەسەرعیراقدا هات و هەموو دەیبینن.
پەنجا ساڵ زیاتر لەمەوبەر (موزەفەر نەواب) پاكترین خاوەن فیكری بەرەی چەپ چاوەرێی ئەوەی كردووە و هەستیكردووە، فیكری چەپ لە عیراق سەقەتە هەر دەبێ قوربانی بدات و هیچی دەستنەكەوێ، بۆیە لە قەسیدەی (بنفسج)دا دەڵێ : ( ترخص واغلیك واحبك! (
هاتەوە بیرم قەسیدەی «بنفسج» كە كراوە بە گۆرانی و خۆشترین و هەست بزوێنترین و بە ئاوازترین گۆرانییە هەموو تەفسیریكی عەشقی پاك هەڵدەگرێ، جا بۆ فكری شیوعی بێ یان بۆ نازدارێكی شایان بە رووناكترین تیشكی عەشقی دەروێشی بێ ... ئەم گۆرانی و قەسیدەیە حیكایەتی هەیە: (بەرلەوەی حیزبی شیوعی بچێتە جەبهە لەگەڵ حیزبی بەعس تالب قەرەغۆلی ئاوازی بۆ ئەم قەسیدەیە دانا و گۆرانی بێژی دەنگ پڕسۆز لیاس خدر دەیچڕێ، كە گۆرانی تەسجیلكرا و لە رادیوێی بەغدا بڵاوكرایەوە دەنگێكی نائاسایی دایەوە، تەقریر نووسەكانی ئەمن راپەڕین و سكاڵایان تەسجیل كرد كە رادیوێی بەغدا گۆرانی پێداهەڵدانی حیزبی شیوعی بڵاو دەكاتەوە !
گۆرانییەکە قەدەغەكرا و گوێی لیاس خدر یان راكیشا كە وریا نەبێ ئەمجارە سزای توند دەدرێ، گۆرانییەكە قەدەغە بوو هەتا حیزبی شیوعی بەرەسمی چووە جەبهە و (بنفسج)یش بەرەڵا بوو! تۆماری ئەو گۆرانیە لە ئوتومەبیلەكەمایە لەو رۆژەوەی قەدەغەكرا بوو، هەمیشە بەتەنیا گوێی لێ دەگرم و قوڵ هەستم دەهەژێنی و لە كۆتاییەكەیدا منیش هاوار دەكەم: (یا شنهی و احبك – ئەی ئەوەی نازانم چیت و كێیت، خۆشم دەوێیت و حەزم لێتە).
دوا قسە :
كورد لە دێر زەمانەوە گوتوویەتی :
نان بۆ نانەواو گۆشت بۆ قەساب!
