لەناو سروشت ژمارەیەک زیندەوەر هەن لە پێناوی بەرگریکردن لەخۆیان و راوکردن و بەدەستهێنانی خواردنی رۆژانەیان ژەهر دەردەدەن، هەندێک لەو ژەهرانە شلەی بەسوودن و خۆراکی مرۆڤن وەک هەنگوین، هەشە بۆ دروستکردنی داوودەرمان بەکاردێت، وەک ژەهری دووپشک کە بە گرانترین و پڕ بەهاترین ژەهر دەژمێردرێت لەهەموو جیهاندا.
ژەهری دووپشک جۆرێکە لە شلە و پڕە لە مادەی کلۆرۆتۆکسین کە رێگرە لەبەردەم هەردوو مادەی کلۆرید و ئایۆناتی کلۆرید ئەگەر بچنە نێو ماسولکەکانەوە ماسولکەکان رەق دەبن و شەلەل روودەدات، ئەو شلەیە زۆر جار لەلایەن کۆمپانیاکانی دروستکردنی داوودەرمانەوە بەکاردێت، بەڵام نرخەکەی خەیاڵییە و هەر لیترێکی بایی 10 ملیۆن دۆلاری ئەمریکیە، هەموو دووپشکێک لەو جۆرە گرانبەهایەی نییە، بەڵکو لەنێوان 2350 جۆری دووپشکدا تەنها 25 جۆریان لەمجۆرە ژەهرە بەنرخە دەردەدەن، هۆکاری گرانییەکەشی ئەوەیە کۆکردنەوە و دابینکردنی زۆر زەحمەتە و دەگمەنە، چونکە هەر دووپشکێک لەکاتی پێوەداندا تەنها یەک دڵۆپ دەردەدات و کۆکردنەوەی لیترێک ملیۆنێک پێوەدانی پێویستە.
کۆمپانیاکان لەمجۆرە ژەهرە بۆ دەرمانی چارەسەری شێرپەنجەی مێشک بەکاردەهێنن و بەبێ ئەوەی هیچ زیانێک بگەیەنێت، هەندێکجار لە نەخۆشخانەکاندا لە شێوەی ڤاکسین بەکاردێت بەر لە نەشتەرگەری وادەکەن نەخۆش تووشی شەلەلێکی سووک ببێت تا لەکاتی نەشتەرگەرییەکەدا جووڵەی لەبەر ببڕێت و لە ئازاری زۆردا خاوبێتەوە و نەبزوێت، نەبادا لەکاتی کارکردندا تووشی هەڵەتیان بکات.
سەرچاوە: www.Gio.de
