دوێنێ، د.لەتیف رەشید سەرۆك كۆمار، لە كۆشكی بەغدا، پێشوازییكرد لە وەفدێكی كۆمەڵەی خۆشنووسانی عیراق، بە سەرۆكایەتیی عەبدولمونعم خەیری حوسێن.
لە دیدارێكدا، سەرۆك كۆمار جەختیكردەوە لە گرنگی پاراستنی كەلەپووری شارستانی و مێژوویی و كەلتووری وڵات، لەوانەش خۆشنووسی عەرەبی و جۆرەكانی، ئاماژەشیكرد بە گرنگی چەسپاندنی فرە كەلتووری هەموو پێكهاتەكان.
سەرۆك كۆمار هانی پێویستی بەردەوامبوونی هەوڵەكانی دا بۆ پاراستنی هەماهەنگی نێوان خۆشنووسانی عەرەب و كورد لە رێگەی سازكردنی پیشانگە و كۆڕ و بەستنی كۆڕبەندی هاوبەش بۆ نزیكبوونەوە و پەیوەندی و پێشخستنی هونەر و كەلتوور بە شێوەیەك دۆخی ئەم هونەرە باشتر بكات كە رەنگدانەوەی قووڵی هونەری و شارستانییەتی وڵاتە، ئاماژەشی بە پێویستی گرنگیدان بە وانەی دەستنووسی عەرەبی كرد لە هەموو ئاستەكانی خوێندندا، بەتایبەتی خوێندنی سەرەتایی، بۆ پەرەپێدانی كارامەیی خوێندكاران، جگە لە خول و وۆركشۆپە تەكنیكییە رێكخراوەكان.
ئەندامانی وەفدەكەش باسیان لە كار و چالاكی و ئامانجەكانیان كرد لە بووژاندنەوەی قوتابخانەی بەغدادی بۆ خۆشنووسی.
