ئا: ئازاد ئیبراهیم
وەزارەتی رۆشنبیری و گەشتوگوزار و شوێنەوارە دێرینەكانی عیراق رایگەیاند كە توانیویانە چەند كەلوپەلێكی كۆنی ونبووی عیراق بدۆزنەوە و وڵاتانیش هاوكاریانە بۆ ئەو مەبەستە، بۆ بەرەنگاربوونەوەی بازرگانیكردنی نایاسایی بەكەلوپەل و شوێنەوارەكانەوە.
لەو بارەیەوە، ئەحمەد عەلەوی وتەبێژی رەسمیی وەزارەتەكە، بە ئاژانسی هەواڵی عیراقی (INA)ی راگەیاندووە: عیراق یەكێكە لەو وڵاتانەی كە تێیدا بازرگانی نایاسایی بە كەلوپەلی كۆن و شوێنەوارەكانییەوە دەكرێت و لە راستیشدا زۆر زەحمەتە بتوانرێت كۆتایی بەو جۆرە بازرگانییە بهێنرێت.
جەختیشدەكاتەوە، رێكاری یاسایی گیراوەتەبەر بۆ پشكنین لە خاڵە گومرگییەكاندا، جگە لەوەش هاوكاری نێودەوڵەتی هەیە بۆ بەرەنگاربوونەوەی بازرگانیكردنی نایاسایی بە كەلوپەلی كۆن و پارچە شوێنەوارەكانەوە.
راشیگەیاندووە، وەزارەتی رۆشنبیری و گەشتوگوزار و شوێنەوارە دێرینەكان و دەستەی گشتی شوێنەوارە دێرینەكان بەدواداچوون دەكەن بە چاودێریكردنی سەرجەم ئەو بازاڕانەی كە دەزانن كەلوپەلی كۆنیان تێدایە.
عەلەوی راشیگەیاندووە، وەزارەت سەركەوتوو بووە لە وەرگرتنەوەی 17 هەزار و 338 پارچە لە دوو ساڵی رابردوودا، هەروەك 8 مانگ لەمەوبەر بڕی 6 هەزار پارچە لە مۆزەخانەی بەریتانیا وەرگیراوەتەوە.
