خەسرەو گورون
111
لە ژمارەکانی پێشوودا، باسی هەر چوار یاریی یانەی سلێمانیم كرد لە قۆناغی یەكەمی خولی پلەدووی یانەكانی عیراقدا (گروپی باكووری عیراق)، ئەنجامی هەرچوار یارییەكەشمان بەمشێوەیە بوون:
*یەكەم یارییمان رۆژی 9/11/1990 بەرامبەر تیپی یانەی برایەتی بوو، یارییەكە لە هەولێر كردمان و بەگۆڵێكی بێ بەرامبەر ئەو یارییەمان بردەوە.
*دووەم یارییمان رۆژی 16/11/1990 لەگەڵ تیپی یانەی 1 ی حوزەیران بوو، ئەم یارییەشمان لە یاریگای سلێمانی كردو یارییەكەشمان 2-0 لەو تیپەش بردەوە.
*سێیەم یارییمان لەگەڵ تیپی یانەی موسڵ بوو كەرۆژی 30/11/1990 لە یاریگای موسڵ كردمان و لەم یارییەشدا 1-1 یەكسان بووین.
*چوارەم یارییشمان رۆژی 6/12/1990 لە یاریگای سلێمانی (مەلعەبەكەی ئەوسا)بوو، یارییەكەشمان لەگەڵ تیپی یانەی سەورەی شاری كەركوك بوو، توانیمان 1-0 لە تیپی سەورە ببەینەوە، بەم بردنەوەیەوە، بوین بە خاوەنی 7 خاڵ لە سێ بردنەوەو یەك یەكسان بوون، چونكە ئەوكات بردنەوە 2 خاڵ و یەكسان بوون 1 خاڵ بوو.
پاش ئەو یارییانە یارییەكانی گەڕانەوەی قۆناغی دووەممان دەستپێكرد و یەكەم یارییمان لەگەڵ تیپی یانەی برایەتی بوو، یارییەكەمان لە یاریگای سلێمانی كرد، یاریی چوونمان 1-0 بردبۆوە، ئەم یارییەشمان رۆژی 4/1/1991 كرد، تیمێكی ناوبژیوانی لە شاری موسڵەوە هاتبوون بۆ بەڕێوەبردنی، یارییەكەش سەعات 2 -ی پاش نیوەڕۆ دەستیپێكرد، هاندەرانێكی یەكجار زۆر ئامادەبوون، ئێمە وەك یانەی سلێمانی بەدرێسی سوور و برایەتیش بە درێسی سپییەوە یارییان دەكرد، ئەم یارییەشمان 2-1 بردەوە، هەردوو گۆڵەكەی ئێمە بەختیار رەشید د:49، ئامانجی سەید برایم د:75 كردیان.
یەکەم یاریی قۆناغی دووەمی خولی پلە دووی یانەکانی عیراق (گروپی باکووری عیراق)- مان بەرامبەر تیپی یانەی برایەتی بوو، یارییەکەشمان لەیاریگای سلێمانی بوو، ئەم یارییەشمان بردەوە
مامۆستا ئازاد وەهاب و خوالێخۆشبوو فەهمی فەقێ رەشیدی قەشان بەڕێوەبەری تیپ و عومەر خەتاب و حەمە بچكۆلیش راهێنەرانی ئێمە بوون، بەپلانی 4-4-2 یارییمان كرد، پێكهاتەی سەرەكی تیپەكەشمان بۆ ئەم یارییە بەمشێوەیە بوو:
*گۆڵپارێز: رەفیق عەلی.
*بەرگری: خەسرەو گورون-كاپتنی تیپ، داخل جەبار، نەوزاد مستەفا، فەرەیدون ساڵح -نێرە.
*ناوەند: محەمەد عەبدوڵڵا –حەمەی هەڵەبجە، ئالان قادر، ئومێدی شێخ حسێن، ئامانجی سەید برایم.
*هێرشبەر: حەمەی كەریم و بەختیار رەشید.
هەردوو راهێنەریش ئەم گۆڕانكارییانەیان كرد:
* سڵاحی شێخ ئەمین بۆ شوێنی داخل.
* ئاسۆ قەلە بۆ شوێنی ئومێد.
ئەم یاریزانانەش یەدەك بوون:سابیری سەلامی مەلا سابیر، كاژاو كەمال، ئارام عەبدولكەریم-گۆڵچی، یاسین، ئالان محەمەد.
پاش ئەوەی توانیما ئەم یارییەش ببەینەوە، كۆی خاڵەكانمان بوون بە 9 خاڵ، لەبەرئەوەی موسڵ و سەورەش یەكسانبوون، ئێمە بووینەوە بە یەكەمی گروپەكەی خۆمان.
