قوباد تاڵەبانی، جێگری سەرۆک وەزیرانی هەرێمی کوردستان پێشوازیکرد لە جەنەراڵ جۆوڵ ڤاوڵ، فەرماندەی گشتیی هێزەکانی هاوپەیمان لە عیراق و سوریا و وەفدێکی یاوەری.
هەروەها لە کۆبوونەوەی نێوانیاندا دۆخی ئەمنی عیراق و ناوچەکە و پەیوەندیی نێوان هێزەکانی هاوپەیمانان و هێزەکانی پێشمەرگە تاوتوێ کران.
لە چوارچێوەی کۆبوونەوەکەی نێوانیاندا، کە رۆژی چوارشەمە 12/6/2024 لە هەولێر بەئامادەبوونی وەزیری پێشمەرگە و ئەمینداری گشتی ئەو وەزارەتە بەڕێوەچوو، جێگری سەرۆک وەزیران سوپاسی هاوپەیمانانی کرد کە بەردەوامن لە هاوکاریکردنی هێزەکانی پێشمەرگە، بە تایبەتیش لەڕووی راهێنان و پەرەپێدان بە توانا سەربازییەکان.
هاوکات لە تەوەرێکی تری کۆبوونەوەکەدا، قسە لەسەر مەترسییەکانی تیرۆر کرا. لەو بارەیەوە قوباد تاڵەبانی بە ئاماژەدان بەوەی کە هێشتا تیرۆر مەترسییەکی گەورەیە بۆ سەر ئاسایش و سەقامگیری عیراق و هەرێمی کوردستان، رایگەیاند: پێویستە هەماهەنگییەکان لەنێوان لایەنە ئەمنییەکان بەردەوام بن چونکە هێشتا تیرور مەترسییەکە نابێ بێئاگا بین لێی.
لە بەشێکی تری کۆبوونەوەکەدا، باس لە ریفۆرم لە وەزارەتی پێشمەرگەدا کرا. هەردوولا هاوڕابوون لەسەر پێویستیی بەردەوامبوون لەسەر چاکسازییەکان بەو شێوەیەی کە پلانی بۆ دانراوە.
