كەركوك، هێمن ئەحمەد
بەهۆی بەرزبوونەوەی پلەكانی گەرما، رێژەی كارەبای نیشتمانی دابەزیوە و ئێستا تەنها 800 مێگاوات دەدرێت بە كەركوك، بەڕێوەبەری فەرمانگەی دابەشكردنی كارەبای كەركوكیش بە كوردستانی نوێ_ی وتووە: ئەو بڕە بەشی پێداویستییەكانی شارەكە ناكات و خواست لەسەر كارەبا زۆر زیادی كردووە.
لەیس تەڵعەت بەڕێوەبەری فەرمانگەی دابەشكردنی كارەبای كەركوك، پێیڕاگەیاندین: پێدانی كارەبا بە گەڕەكەكانی كەركوك دابەش كراوەتەسەر 12 گروپدا و ئێستا بەشە كارەبای شارەكە بۆ نیوە دابەزیوە، ئەم بڕەش پێداویستییەكانی شارەكە پڕناكاتەوە، بۆ ئەوەش هەوڵەكانی نوێنەرانی كەركوك لەگەڵ وەزارەتی كارەبای عیراق، خراونەتەگەڕ و داوادەكرێت بەشە كارەبای شارەكەمان زیادبكرێت.
سەبارەت بە پڕۆژە نوێیەكانیش، دەڵێت: بڕیارە لە ئایندەیەكی نزیكدا چەند وێستگەیەكی نوێی بەرهەمهێنانی كارەبا لە قەزای دووبزی سەر بە پارێزگای كەركوك بچێتە بواری جێبەجێكردنەوە، كە هیوادارین ئەو هەنگاوە زوو بنرێت.
