سەرۆکی یەکێتیی نیشتمانیی کوردستان و سه‌رۆكى هه‌رێمى كوردستان له‌گه‌ڵ فه‌رمانده‌ى هاوپه‌يمانان له‌ عيراق و سوريا كۆبوونەوە

04:36 - 2022-06-28
عیراق
117 جار خوێندراوەتەوە

ئه‌مڕۆ سێشه‌ممه‌ 2022/6/28 بافڵ جەلال تاڵەبانی سەرۆکی یەکێتیی نیشتمانیی کوردستان و نێچيرڤان بارزانى، سه‌رۆكى هه‌رێمى كوردستان و ‏فه‌رمانده‌ى گشتيى هێزى پێشمه‌رگه‌ى كوردستان، ‌پێشوازییان له‌ جه‌نه‌ڕاڵ جۆن برێنان ‏فه‌رمانده‌ى هێزه‌كانى هاوپه‌يمانان له‌ عيراق و سوريا و شاندێكى باڵاى سه‌ربازيى ياوه‌رى كرد.‏
له‌ كۆبوونه‌وه‌يه‌كدا وه‌زيرى پێشمه‌رگه‌ و سەرۆکی ئاژانسی پاراستن و زانیاری - زانیاری ھەرێم و سوپاسالارى پێشمه‌رگه‌ و ژماره‌يه‌ك له‌ فه‌رمانده‌ و پله‌دارانى ‏پێشمه‌رگه‌ ئاماده‌ بوون، پڕۆسه‌ى چاكسازى له‌ وه‌زاره‌تى پێشمه‌رگه‌ و دوايين هه‌نگاوه‌كانى ‏يه‌كخستنه‌وه‌ى هێزى پێشمه‌رگه‌ و گرفته‌كانى به‌رده‌م پڕۆسه‌كه و پێشنيازێكى ئه‌مريكييه‌كان ‏له‌مباره‌يه‌وه‌‌ تاوتوێ كرا.‏
سەرۆک بافڵ جەلال تاڵەبانی سوپاس و پێزانینی دەربڕی بۆ ھێزەکانی ئەمریکاو ھاوپەیمانانی نێودەوڵەتی کە لە جەنگی رووبەڕووبوونەوەی تیرۆریستانی داعش ھاوکاری ھەرێم بوون و پشتیوانی ھێزی پێشمەرگە بوون لە رووی مەشق و راھێنان و پڕچەککردن و پێشخستنی توانا سەربازییەکان روونیشیکردەوە پەرۆشیتان بۆ یەکخستنەوە و چاکسازیکردن لەوەزارەتی پێشمەرگە مایەی دەستخۆشییە و سوپاسگوزارین و راشیگەیاند ھەر پلانێک بۆ رێکخستنەوەی ھێزی پێشمەرگە دابنرێت پێشوازی لێدەکەین بەڵام پێویستە لەم ھەنگاوەدا ھەلومەرجی ھەرێم و واقیعی ئەمڕۆ لەبەرچاوبگیرێت و ھاوسەنگی بنەمابێت بۆ سەرخستنی ئەم پڕۆژە نیشتمانییە و بە بەرنامەی کوردستانی بیخەینە بواری جێبەجێکردنەوە و ھەرھەنگاوێکیش بنرێت دەبێت لە خزمەتی پاراستنی ئاسایشی ھەرێمدا بێت.
ھەر لە کۆبوونەوەکەدا نێچيرڤان بارزانى سەرۆکی ھەرێمی کوردستان سوپاس و پێزانينى هه‌رێمى كوردستانى بۆ ئه‌مريكا و هاوپه‌يمانان ‏دووپات كرده‌وه‌ بۆ ئه‌و پشتگيرى و هاوكارييه‌ى له‌ كاتى شه‌ڕى دژى داعشدا و ئێستاش ‏پێشكه‌ش به‌ پێشمه‌رگه‌ى ده‌كه‌ن و جه‌ختى له‌ پشتگيريى سه‌رۆكايه‌تيى هه‌رێمى كوردستان و ‏حكومه‌تى هه‌رێمى كوردستان بۆ پڕۆسه‌ى چاكسازيى له‌ وه‌زاره‌تى پێشمه‌رگه‌ و ‏يه‌كخستنه‌وه‌ى پێشمه‌رگه‌ كرده‌وه‌.‏
لاى خۆيه‌وه‌ جه‌نه‌ڕال برێنان دووپاتى كرده‌وه‌ كه‌ ئه‌مر‌يكا له‌ پشتگيرى و يارمه‌تيدانى ‏پێشمه‌رگه‌ به‌رده‌وام ده‌بێت بۆ ئه‌وه‌ى له‌ ژێر چه‌ترى وه‌زراه‌تى پێشمه‌رگه‌ و يه‌ك فه‌رمانده‌ييدا ‏كۆبكرێته‌وه‌ بكرێته‌ هێزێكى نيشتمانيى پيشه‌گه‌ر كه‌ به‌ هێز و توانا بێت بتوانێت ئه‌ركى خۆى ‏جێبه‌جێ بكات. ‏
دوايين پێشهاته‌كانى شه‌ڕى دژى تيرۆر و پێويستيى هاريكاريى نێوان پێشمه‌رگه‌ و سوپاى ‏عيراق و به‌رده‌واميى پشتگيريى هاوپه‌يمانيى نێوده‌وڵه‌تيى بۆ عيراق و هه‌رێمى كوردستان، ‏ته‌وه‌رێکی ديكه‌ى كۆبوونه‌وه‌كه‌ بوو.‏

 

#بافڵ جەلال تاڵەبانی

بابەتە پەیوەندیدارەکان