لە میدیای عەرەبییەوە

بایدن رەخنە لە نەتانیاهۆ دەگرێت

لەمیانی کۆبوونەوەی جۆ بایدن سەرۆکی ئەمریکا لەگەڵ وەزیرانی حكومەتەکەی لە کۆشكی سپی، رەخنەی لە بنیامین نەتانیاهۆ سەرۆک وەزیرانی ئیسرائیل گرت و رایگەیاند: من لەو باوەڕەدا نیم کە نەتانیاهۆ هەوڵی تەواو بدات بۆ ئەوەی  جەنگی حەماس – ئیسرائیل، رابگیرێت.
وتیشی: بەمزووانە  رێکكەوتن لەگەڵ حەماس دەکەین  بۆ ئازادکردنی بارمتەکان.
BBC

کوژرانی 14 داعش لە پارێزگای ئەنبار

 لیوا یەحیا رەسوڵ وتەبێژی  سەرۆکی هێزە چەکدارەکانی عیراق بە رۆژنامەی (المدی)ی راگەیاند:  پڕۆسەی لەناوبردنی چەتەکانی داعش لە پارێزگای ئەنبار، کە بە هەماهەنگی لەگەڵ دەزگای هەواڵگریی و ئیستیخباراتی گشتی سازکراوە، زۆر سەرکەوتوو بووە و 14 چەتەی داعشیش کوژراون.
وتیشی: کۆمەڵێک چەک و تەقەمەنیی و بەڵگەنامەی گرنگی داعشیش، کەوتۆتە دەستی سوپای عیراق.                                                         
المدی

کارەبای فەلەستین لە ئیسرائیلەوە دابین دەکرێت

لە لێکۆڵینەوەیەکی  (پەیمانگای  لێکۆڵینەوەی سیاسی و ئابووری فەلەستینی) کە کەناڵی « الجزیرة» بڵاویکردۆتەوە، 87 %ی کارەبای نیشتمانیی فەلەستین (کەرتی خۆرئاوا و کەرتی غەززە)، لەلایەن ئیسرائیلەوە دابین دەکرێت.
بەپێی لێکۆڵینەوەکە بێت،   2.7 % کارەبای فەلەستین لە ئەردەن دەکڕێت و تەنها 7.7 % ی، لە ناوخۆدا  بەرهەم دەهێنرێت.
الجزیرة