ئالان محەمەد جەزا
پرۆفایل
محەمەد قادر مستەفا ناسراو بە محەمەد قامیشی، لە دایكبووی 1960.
ساڵی 1978 پەیوەندیكردووە بە رێكخستنەكانی یەكێتیی نیشتمانیی كوردستانەوە و ساڵی 1980 بووە بە پێشمەرگە.
ئێستا راوێژكاری ئەنجومەنی باڵای كۆمەڵەی پێشمەرگە دێرینەكانی كوردستان و ئەندامی مەكتەبی شەهیدان و تێكۆشەرانی یەكێتیی نیشتمانیی كوردستانە.
چوونە ناو تۆڕی رێكخستنەكانی كەسێك بە چەند پێوەر و هەنگاوێك بوو، سەرەتا دەبوو ئەو كەسە دەستنیشان بكرێت و هەڵسەنگاندن بۆ بارودۆخەكەی بكرێت، دواتر بە تەواوی بپاڵێورێ و پاشان قۆناغی پەروەردەكردن و خۆڕاگرتن و رۆشنبیركردنی لە رووی چەندایەتی و چۆنایەتییەوە دەستی پێدەكرد، دەبوو بزاندرێت و دڵنیابن لەوەی كە ئاخۆ كەسەكە تا چەند دەتواندرێت پەروەردەبكرێت بۆ هەموو ئەو ئەگەر و كاروبارانەی كە لەدواتردا دەهاتنە بەردەمی، وەك: خۆڕاگری لە كاتی ئەشكەنجەو ئازاردان و پاراستنی ناوی هەڤاڵان، یاخود ئاگاداركردنەوەیان لە رووداوە سیاسییەكان و بابەتە رۆشنبیرییەكان.
وەك خۆشم، هەر كە چاوم كردەوە لەناو رێكخستندا بووم و ئاشنابووم بە خەباتی نهێنی و ئاشكرای شۆڕشی نوێ.
لە رێكخستندا گرنگی زۆر بەوە دەدرا لە ئەگەری ئاشكرابوونی هەڤاڵێك، سەرجەمی تۆڕەكە پارێزراوبێت، بۆیە هەر كەسێك دوای پاڵاوتنی و ئامادەكردنی بۆ كاری نهێنی، پەروەردەیەكی تەواودەكرا بۆ پاراستنی نهێنییەكان و خۆپارێزی لە حاڵەتی نەگونجاو یان دوربن لە خەڵكی گوماناوی و بابەتی كۆڕوكۆبوونەوەكانیش لای كەس نەدركێندرێت.
هەرچەندەش زۆركەم لە هەڤاڵان یەكترییان دەناسی، بەڵام دیسان گرنگی زۆر دەدرا بەو مەترسییەی ئەگەر یەكێكیان دەستگر بكرایە، خۆڕاگربێت و ناوی هەڤاڵان بۆ دوژمن نەدركێنێت، هەموو ئەمانەش بە ئامۆژگاری و بەرنامەیەكی پتەوی پەروەردەیی بەڕێوەدەچوو كە سودێكی زۆری بە رێكخستنەكان گەیاند و هەڤاڵ هەبووە كە دەستگیركراوە، خۆڕاگربووە لە ژێرئەشكەنجەی بێ رەحمانەی دوژمندا، خۆی فیدای نیشتمانەكەی كردووە بەڵام ناوی هاوڕێكانی ئاشكرا نەكردووە.
وەك وتم پێشتر خۆم لە رێكخستندا بووم، هەستمكرد چاودێری دەكرێم و گومانم لەسەرە، ئیتر بۆ رزگاربوونی خۆم و بۆ پاراستنی هەڤاڵانم و رێكخستنەكانیش چومە ناو هێزی پێشمەرگەوە.
دیارە پێشمەرگایەتیش قۆناغێكی سەختە، هەر بە ناوەكەدا دیارەكە مەرگی پێش خۆی خستووە، بۆیە لە هەر روبەڕووبوونەوەیەكی چەكداریدا پێشمەرگە گوێی نەداوەتە مەرگ، ئەوەش هۆكار بووە بۆ ئەوەی لە زۆربەی شەڕەكاندا بەسەر دوژمندا زاڵبووە و سەركەوتووبووە.
وەك شەڕو داستانەكانی یەكێتی كە بمانەوێ باسی بكەین كارێكی ئەستەمە، چونكە شەڕێك و دووشەڕ نییە، ئێجگار زۆرن، هەر لە گرتنی رەبایە و سەربازگەی گەورە و دانانی بۆسە تا بە سزاگەیاندنی كەسانی خراپ و سەر بەدوژمن لەناوشارەكاندا، لە زۆربەی شەڕەكانیشدا دوژمن دەشكا و زەرەری زۆری بەردەكەوت، تا وای لێهات لە كۆتایی ساڵی 1983 رژێمی بەعس چۆكی دادا و داوای دانوستانی لە یەكێتیی نیشتمانیی كوردستان كرد، ئەوەبوو گفتوگۆی لێكەوتەوە تا سەرەتای 1985.
من زیاتر وەك كادری رێكخستن كارم دەكرد، رێكخستنی شارەكان و گوندەكان، بەڵام كادرەكانیش هەر بەشێك بوون لە هێزی پێشمەرگە و لە شەڕەكاندا بەشدارییان دەكرد، منیش وەك كادرێك بەشداریی شەڕەكانم كردووە، لەوانە: داستانی قەیوان-ماوەت، دابان- هەلاج.
