هێمن ئەحمەد
لەسەر راسپاردەی رێبوار تەها پارێزگاری كەركوك، سەرجەم كۆڵانەكانی گەڕەكی پەنجاعەلی كۆنكرێت دەكرێن، ئەندامێكی ئەنحومەنی پارێزگای كەركوكیش رایدەگەیەنێت: توانرا 13 هەزار مەتر دووجا لە كۆڵانەكانی نزیك شوقەكانی ئەو گەڕەكە كۆنكرێت بكرێت.
لەوبارەیەوە، د.ئەحمەد كەركوكی ئەندامی ئەنجومەنی پارێزگای كەركوك، بەكوردستانی نوێ-ی راگەیاند: دوای هەوڵ و بەدواداچوونمان بۆ كێشەو گرفتی ئەو گەڕەكە، لە ئێستادا نزیكەی هەشت هەزار مەتر دووجای تری ئەو گەڕەكە تیمەكان سەرقاڵی كۆنكرێت كردنین، وتیشی: ئەو گەڕەكانەی پێشتر پەراوێز خرابوون و پڕۆژەكانیان لە شوێنانی تر جێبەجێ كراوە، پرۆژەی خزمەتگوزارییان پێدەگەیەنین.
لەبارەی گەیاندنی ئاو بۆ گەڕەكی دەروازە، ئامانج عاسی میراوی گەڕەكەكە، بەكوردستانی نوێ-ی راگەیاند: دوای گەیاندنی گرفتی كەمئاوی گەڕەكەكە بە پارێزگاری كەركوك كە ژمارەیان نزیكەی پێنج سەد ماڵ دەبوون، لەسەر بڕیاری رێبوار تەها هێڵی نوێی ئاویان بۆ راكێشرا، بەمەش كێشەی كەمئاوییان چارەسەر دەبێت.
